19. १९. भविष्यवक्तो

परमेश्वर हमेशा इस्त्राएल्याइही भविष्यावक्ताल मोकलुतो आथो भविष्यवक्ता परमेश्वरायने संदेश उनातला आन फाची लोकाहान आखतला आथा.

जांहा अहाब इस्त्राएलावे राज्यावे राजो आथो तिया समय एलीय्याह भविष्यवक्तो आथो. अहाब एक खराब माहुं आथो. तियाय खोट्या बाल देवताहा उपासना केरा खातोर लोकांहान प्रोत्साहान केअले. तियाल एलिय्याम अहाबाल आख्यों का परमेश्वर तिया लोकाहान दंडीत केरा जाय रेह्लो आथो तियाय तियाल आख्यों, जांव लुग आंय वापस पांय पाडाखातोर नाय आखू तांव लुग इस्त्राएला राज्याम पांय नाय पडे आन नाय चांखलो पडयें इयो गोठीय आहाबाल ओतो क्रोधीत किई देदो का तियांय एलीयाल माय टाका निर्णय लेदो.

तियाल परमेश्वराय एलीयाल आखों का तोअ जंगलाम जो आहाबायने दबी जो. एलिया तिया चिरफा पाही गियो जिंही परमेश्वराय जां आखलो. हर रोज अकाली आन वाआतीवेल चिडे एलिया खातोर मांडो आन माहा लीई आवतले इया पुरा समयाम, अहाब आन सेना एलीय्याल होदता रिया. पेन ते तियाल होदी नाय सेक्या.

पांय नाय पडनुसे चिरफो हुकाम गियो. तियाल एलीया पाहीज एक देसाम गियो. तिया देसाम एक गरिब विधवा आथी तियो एक पोयरो आथो. तियाहा खावन लगभग पारवाय गेहलो आथो. काहाका तिही केअलो बी पिक नाहा पाक्यो. पेन तेबी बी तियो स्त्रिय एलीया देखभाल केअयी. तियाल परमेश्वराय तियो आन पोयरा आवश्यकता पुऱ्या केअया. इया कारणाकी तियो नोटा बासनो आन तियो तेला बरनी कधीज रिकामी नाहा वेअयी. तिया अकाला समयाम तियाहावे खावनू आथो. एलिया काहीक वोरेह लुग तिही रियो.

साठे तीन वोराहा बाद, परमेश्वराय एलीयाल आख्यों का वापस पांय पडी. तियाय एलीयाल वापस इस्त्राएलाम राज्याम जामन आहाबा आरी गोठ्या केरा खातोर आख्यो. तियाल एलिया आहाबा इंही गियो. जांहा आहाबाय तियाल देख्योंताहा तियाय आख्यों “ हारो तूं हाय, मुसिबत केराव नाये, एलीयाम उत्तर देदो, मुसीबत उबजावनारो तूं हाय. तूंये यहोवाल सोडी देदोह. तोच खरो परमेश्वर होय. पंरतू तू बाल देवताहा उपासना केअतोह आमी तूल इस्त्राएला बादो लोकाहान लीईन कमैल डोगावे जावनू हाय.

शेवटी बादां लोक कमैल डोगावे गिया तेअ पुरुष बी आला जे बाल देवताहा संदेश आखतला. ते बाल देवताहा भविष्यवक्ता आथा. तेअ वादा ४५० आथा. एलीयाय लोकाहान आख्यों कधीही लूग तुमा मनोफिरवी राखाहा? जर यहोवा परमेश्वर हाय ता तोयो आराधना केरा जर बाल परमेश्वर हाय ता तिया उपासना केरा.

तांहा एलीयांय बाला भविष्यवक्ताल आख्यों एका बैलाल बली किईन तिया माहाल बलिदान केरा खातोर एक वेदीवे थवा. पेन आग मा लागवाहा तियाबाद आंय बी ऐहेकी किही आन एक अलग वेदीवे आंय तिया माहाल थेवीही ताहा जर परमेश्वर वेदीवे आम पाडीता तुमा जांय लेजाका तोअ खेरो पर्र्मेश्वर हाय ताहा बाल भविष्यवक्ताहांय एक बलि तियार केअयी पेन आग नाय लागवी.

ताहा बाला भविष्यवक्ताहांय बालाल प्रार्थना केअयी का ऐ बाल आमा उनाया “ पुरो दिहीकी तियाय प्रार्थना केअयी आन बोबल्या आन इही लुग का स्वतः चाकुंकी वाढी लेतला पेन बालांय उत्तर नाय देदो आन तियाय काय आग नाय पाडी.

बाला भविष्यवक्ताहाय बलाल प्रार्थना केअनूम लगभग पुरो दिही लागवी देदो शेवती तियाहाय प्रार्थना केअनू बंद किई देदो. ताहा एलीयाह बिहिय बैला माहां परमेश्वरा वेदीवे थव्यो तिया बाद तियाय लोकाहान पांया मोडे बासनाहाकी तिया बलिदानावे वेअरा आख्यों. जिहीं लुग का माहा, लाकडे, आन इही लुग का वेदी पाहीने जमिन आखी पिजी नाय जाये.

तांहा एलीयाय प्रार्थना केअयी का, “ हे यहोवा, अब्राम, इसाक, आन याकूबा परमेश्वर आमाहान देखाव का तू इस्त्राएला परमेश्वर हाय, आन इं का आंय तोअ सेवक हाय मान उत्तर दे जियाकी ऐ लोक जांय ले का तूंज खेरो परमेश्वर हाय.”

तूरतूज आकासामेने आग पडी आन तियोय मांहा, लाकडे, खडके, कादू आन इंही लूग का वेदी आहीपाहीने पांयाल बी बाली टाक्यो. जाहां लोकाहांय इं देख्यो ते जमिनीवे उपडा पड्या आन आखा लाग्या, “ यहोवाज खरो परमेश्वर हाय! यहोवाज परमेश्वर हाय!

ताहा एलीयाय आख्यों, “बाला एक बी भविष्यवक्तो इंहीने नाय जाय,” तियाल लोकाहांय बाला भविष्यवक्ताहान तेअया आन तियाहान अलग लिईगिया आन तियाहान माय टाक्या.

ताहा एलीयाय आहाब राजाल आख्यों, “ माहारी तोअ कोअ नाही जो, काहाका पांय पडनारो हाय!” लगेच वादलो कालो बनी गियो आन मोडा पांयाल शुरुवात विई गियी. यहोवा तिया हुकालाल समाप्त किई रेह्लो आथो इयाकी (प्रगट) उघड वेअयो का यहोवा खेरो परमेश्वर हाय.

जांहा एलीयाय तिया काय बंद केअयो, ता परमेश्वराय एलिशा नावा एक पुरुषाल तिया भविष्यवक्तो बना खातोर निवड्यो. परमेश्वराय एलिशा हाताकी खूब चमत्कार केअया. एक चमत्कार नामाना आरी केअयो, तोअ एक शत्रु सेना सरदार आथो, परंतु तियाल चामडी रोग लागलं आथो. नामान एलिशा बाबतीत उनालो आथो, तियाल तोअ एलिशा इंही आलो आन तियाय तियाल हारो केरा विनंती केअयी एलीशाम नामानाल आख्यो का जाईन यरदन खाडीम सातदो डूबकी लेजे.

नामान क्रोधीत विई गियो तियाय ऐहकी केअतूसे नकार देदो, काहाका इं तियोल मूर्खता काम लागतो आथो. परंतू नंतर तियाय खत मन बदलीन यरदन खाडीम जायन सातदा डूबकी लेदो. जांहा शेवटी पांया बारे तोअ निग्यों ता परमेश्वराय तियाल हारो केअयो.

परमेश्वराय इस्त्राएल लोकाहा इंही खुबुज भविष्यवक्ता मोकल्या. तिया बादाहा लोकाहान मूर्ती पुजा बंद केरा आरवा लाग्या. तिया बदले, एक बिजा आरी न्यायपूर्वक-व्यवहार केरा जोजे आन एक बिजावे दया केरा जोजे तिया भविष्यवक्तीहाय लोकाहान चेतावनी देदी का तियाहांय खराब कामे बंद केरा आन परमेश्वरा हारी गोठीही पालन केरा. जर इया लोकाहांये ऐहेकी नाय केअयो ता परमेश्वर तियाहान दोषी ठरवीन तियाहा न्याय केरा, आन तियाहान सजा दी.

खुबूजदा, तिया लोकाहांय परमेश्वर आज्ञा नाहा मानी पेन तियाहांय भविष्यवक्ताहा आरी खराब व्यवहार केअलो आन इंही लूग का कधीही-कधीही तियाहान मे टाक्या, एकदा यिर्मया भविष्यवक्ताल हुकाली वेअयीम टाकी देदलो आन तियाल तिही मरा खातोर सोडी देदलो तोअ वेअयी डोराम फसी गेहलो. पेन ताहा राजाला तियावे दया आली आन तियाय तिया सैनिकाहान आदेरा देदो का यिर्मया मोअनू से पेअला तियाल वेअयी मेने बारे काढा.

भविष्यवक्ताहांय परमेश्वरा इंहीने गोगनू चालू थव्यो भले लोक तियाहान नफरत के तियाहान लोकाहान चेतावनी देदी का जर तियाहांय पश्याताप नाय केअयो ता परमेश्वर तियाहा नाश किई दी. तियाहांय लोकाहान इंबी इत केराव्यो का परमेश्वराय तियाहापाही मसीहाल मोकला प्रतिज्ञा केअयी.