41. परमेश्वर यीशु ने मारेल म थकी जिवाड़े है।

सैनिको द्वारा यीशु ने क्रूस इपर सढाव देवा ने बाद, यहूदी अगुवा वे पिलातुस थकी केइ , हणा झूठ यीशु वे केदू हेथो के इते तिन दाड ने बाद मरेला म थकी जीवे उठुंगा। केनेक यो जाणवा ने हारू कबर नी रखवाळी करवी पड़ हे के ऐना सेला ऐना शरीरी ने सोरा वेने ने जाए। अगर इ हेवु करे है। ते इ के हे के इते मरेला म थकी जीवे उठ्यो है।

पिलातुस ने केइ योडाक सैनिक ने ले जो अने जेम तमो करे सको है मेस कबर नी निगरानी करो। ऐतरे हारू हणी कबर न प्रवेशद्वार न पाण इतर एक मोहर लगाईं देदी। अणवे यु निश्चिन्त करवा ने हारू ता सैनिक ने होदो बहाड देदो। के काई भी ऐना शारीर ने सोरा वे ने सके।

यीशु ने मरवा ने बाद ना दाड़ो सब्त नो दाड़ो हेथो। काई भी सब्त ने दाडे काम नहे करे सकतो हेथो, ऐतरे हारू यीशु नो काई भी दोस्त कबर इपर नहीं आयो हेथो। पोंणे सबत ना बाद न दाडे परवाते घणो वेलो थोडिक बजेर यीशु नी कबर इपर जावा ने हारू तियार थाई। इ ऐना शारीर इपर अजु होदी मसालो ने लगाडवा मागती हेथी

हणी बजेर ने पुगावा ने पेल, कबर इपर एक मोटो भूकंप थायो। हण थकी एक हरगदूत वे आवेने हणा पावका ने हरकाव देदो जो कबर ने मोड़ा ने ढाकेलो थको हेथो। अने हेने इपर वेहे जो। यो हरगदूत उजवाळा ने वाणीय संमके रया हेथो। कबर इपर जी सैनिक हेथो अणवे ऐने दिख्यो। इ ऐतरो समकेजा हेथा के मरेला ने वाणीय जगा इपर पड़े जा।

जा इ बजेर कबर इपर जुगी ते हवा हरगदूत वे अण थकी केइ, नहे समको। यीशु आ नहे है। मरेला म थकी जीवे उठ्यो है, जेम के अने केइ हेथो के इते जीवे उठ है। कबर म जोवो अने देखो। हणयी बजेर वे कबर ने मय अने जा यीशु नो शारीर मेलेलू हेथू ता जोयु अने दिख्यु के ऐनो शारीर ता ने हेथो।

तर हंणे हरगदूत वे अपी बजेर थकी केइ जाएने ऐना सेल ने बताडो यीशु मरेल म थकी जीवे उठ्यो है अने इते तमारे अगाडी-अगाडी गलित म जा है।

इ बजेरे अचंभित थाई अने खुश थाई। इ सेल ने यु सुभ सन्देश हमाळावा ने रास दोडजी।

जर इ बजेरे सेल ने यु ताजू सन्देश वताडवा ने हारू वाटे म हेथी ते यीशु अणयी इपर प्रगट थायो। इ ऐना पोग इपर पड़े गजी। तर यीशु वे केइ , नहे समको। जाएने मार सेल थकी गलील जावा हारू को। इ मने टल देख हे।