28. Бай ҳәм абырайлы жас жигит

Бир күни Ийсаға бай ҳәм абырайлы бир жас жигит келип, Оннан былай деп сорады: «Ийгиликли Устаз, мәңгилик өмирге ерисиўим ушын не қылыўым керек?» Ийса оған: «Мени не ушын ийгиликли деп атап атырсаң? Тек Қудай ғана ийгиликли. Егер де мәңгилик өмирге ерискиң келсе, Қудайдың буйрықларын орынла», — деди.

«Мен қайсы буйрықларды орынлаўым тийис?» — деп сорады жас жигит. Ийса: «Адам өлтирме. Неке ҳадаллығын бузба. Урлық ислеме. Жалған гүўалық берме. Ата-анаңды ҳүрмет ет ҳәм өзиңди сүйгениң сыяқлы жақыныңды да сүй», — деп жуўап берди.

Жас жигит: «Мен бул буйрықлардың ҳәммесин жаслығымнан орынлап киятырман. Мәңги өмирге ерисиўим ушын және не қылыўым керек?» — деди. Ийса оған сүйиспеншилик пенен нәзер салып, оған былай деп жуўап берди:

«Егер минсиз болыӯды қәлесең, барып барлық мал-мүлкиңди сат, кейин ақшасын жарлыларға үлестирип бер ҳәм сонда сен аспаннан ғәзийне аласаң. Соңынан келип, Мениң изиме ер».

Жас жигит Ийсаның айтқан бул сөзлерин еситкенде, қатты қапа болып Ийсадан кетип қалды. Өйткени, ол жүдә бай адам болып, ийелигиндеги барлық байлығын бергиси келмеди.

Сонда Ийса шәкиртлерине былай деди: «Бай адамның Аспан Патшалығына кириӯи қатты қыйын! Бай адамның Қудайдың Патшалығына кириӯинен гөре, түйеге ийнениң көзинен өтиӯ аңсатырақ».

Бул сөзлер Ийсаның шәкиртлерин таң қалдырды. Сонда олар: «Олай болса, ким қутқарыла алады?» — деп сорады.

Ийса шәкиртлерине қарап, былай деп жуўап берди: «Адам өзин өзи қутқара алмайды. Бирақ Қудай ушын мүмкин емес нәрсе жоқ».

Сонда Петр Ийсадан: «Шәкиртлер болған бизлер ҳәммесин қалдырып, Сениң изиңнен ердик. Бизлердиң сыйлығымыз қандай болады?» — деп сорады.

Ийса жуўап берип: «Мен ушын үйлерин, аға-инилерин, апа-қарындасларын, әкесин, анасын, балаларын ямаса мал-мүлкин қалдырып кеткен ҳәр бир адам жүз есе артығы менен алады. Ол және де мәңгилик өмирди алады. Сонда бириншилердиң көпшилиги соңғылар, ал соңғылар — бириншилер болады», — деди.