1. یارادیلیش

باشلانغیج دَه خُدا هر زادِی بِلَه یاراتدِی: اُو، جهانِی و تمام موجودات لارِی آلتِی گینْدَه یاراتدِی. خدا یِرِی یاراتانْ دَنْ سُونرا، هَه نیز هیچ زاد یاراتمادِی غِی ایچینْ، تمام یِئرینْ ایزِی، بُوش و قارانْلیقْ ایدِی. لاکِن خدا نین روحِی سولارِنْگ ایزِنْدَه اِیدِی.

سونْرا، خدا بویورْدِی: »ایشیق اولْسینْ« و ایشیق اولْدِی. خدا ایشیغینْ یاخْشِی اولدوغونِی، گِرَنْدَه، اونَه »گِینْ دیزْ« آد قُویْدِی. خدا قارانلیغِی ایشیقْدَن، آییرْدِی و اونینْ آدینِی »گِئجَه« قویْدِی. خدا اِیلَکْ گینْدَه ایشیغِی یاراتْدِی.

یاراتْدیلیغینْ ایکینْجِی گینْدَه خدا بویورْدِی: »سُولارینْ ایسْتِنْدَه بیرْ فَلَک اولْسینْ« و فَلَک یاراتیلدِی. خدا او فلَکِینْ آدِینِی، آسمان قُویْدِی.

اوچونْچِی گینْدَه خدا بویورْدِی: »قوریلیقْ پیدا اولْماغِی ایچینْ، آسمانینْ آسْتِنْدَه، هَرنَه قَدَرْ سُولار بار، بیر یِئرَه ییغیلْسینْ، هرنَه قَدَر قورو تورپاق بار، آیرِی یِئرَه ییغیلْسینْ، خدا دِئیَنْ اولْدِی. « او تورپاقْلارِی »یِئرْ« سولارِی »دِنیزْ و چایْ« آدلانْدِیردِی. خدا یاراتان زادلارِی یاخْشِی گِردِی.

سورَه خدا بویورْدِی: »هرنَه جُورْ گؤیْرَنْمَه و دالْ–درخت اولَه بیلَرْ، یِئر اِیسْتِنْدَه بِیتْسین« خدا دِئیَنْ اولدِی. بو دفعه دَه خدا یاراتانْ زادلارِی یاخْشِی گِردِی.

یاراتْدیلیشینْ دورْدونچِی گینْ دَه، خدا بویورْدِی: »آسماندَه نور پیدا اولسین« بوجورَه خدا یِئرِینْگ اِیزِینْدَه ایشیقْ ساچماق ایچینْ، گِینَشِی، آیِی و اولدوزلارِی یاراتْدِی. بِلَه، گِینْدِیزْ، گِئجَه، فصل لَر و ایلْ لَر بیرْ بیرینْدَن آیریلْدیلار. خدا یاراتدِیغِی زادلارِی یاخْشِی گِئردِی.

بِئشْشینْجِی گینْ خدا بویوردِی: »دَنیز سویونْدَه یاشایانْلار، دَنیزِی دولْدورْسونْلار و قوشْلار آسمانْدَه اوچْسونْلار. « بِلَه لیکْلَه خدا بوتونْ سودَه یاشایانْ حیوانْلارِی و آسماندَه اوچان قوشْلارِی یاراتْدِی. خدا یاراتْدیغینْ زادْلارِی یاخْشِی گِئردِی و اونْلارَه خیر و بَرَه بِئرْدِی.

یاراتْدیلیشینْ آلْتینْجِی گینْدَه خدا بویورْدِی: »یِئرینْ ایزِی هَر جورْ جاندارْلارْدَن دولْسین. « خدا هَر نَه دِئیْدِی یِی ایشْلَر، یِئرینَه یِئدِّی. بو حیوانلارْ، ییرتینْجیلار، سؤرُونَنْلَر و بوجَکْلَر اِیدِی. خدا یاراتْدیغِی زادلارِی یاخْشِی گِئردِی و چوخْ سِئوینْدِی.

سونْرا خدا بویورْدِی: »اینْدِی گلِینْ اِیز شِکْلِی میزْدَه انسانِی یاراداقْ تا بو انسان هَرنَه جاندار کِه یِئرْ اِیزینْدَه بارْدِی اولارَه حُکْمْرانلِیق اِئدْسین. «

سونْرا خدا بیر آز تورْپاقْ اَلَه آلدِی، اونینْ نَنْ انسانِی یاراتْدِی. اونَه حَیات نِفسِی اؤفْلادِی. خدا اونین آدینِی »آدم« قویْدِی. آدَمینْگ یاشاماقِی ایچین و اونَه قولْلوقْ اِئدْمَه سِی ایچین اورْدَه بِیر کاتا باغ حاضِر و آماده اِئدِی.

خدا او باغینْ اورْتاسینْدَه ایکِی خاص دال-درخت اَکْدِی، اونْلارْدَن بیریسِی حیات و دیریلیکْ آغاجِی اِئدِی، او بیریسِی دَه، خیر و شرّ حَقِّنْدَه معلومات و بیلیمْ وِئرَنْ آغاجِی اِئدِی. خدا آدَمَه دِئدِی کِه، باغْدَه، حَیات و خیر-شرّی تانینانْ دَرختَنْ باشْقا، تمام دالْ-درختلَرین میوه لَرینِی یِئیَه بیلَرسَن، آنجاق، اگر بو ایکِی خاص درختلَرین میوه سینِی یِئیَه سَن، اِئلَه جَه سَن.

سونْرا خدا بویورْدِی: »انسانین تَک و یِئکّه قالْماسِی یاخْشِی دِئییلْ. « چون کِه حیوانْلار، آدَمَه یاخْشِی حَیات یولداشِی اولَه بیلْمَزلَر.

اونَه گِئرَه خدا آدَمِه دَرینْ یوخویَه سالْدِی. سونرا اونینْ قابیرغالارینْ دَن بیرینِی گؤتَردِه و اونْدَن بیر »قادینْ« یاراتْدِی و اونو آدَمینْ یانینَه گَتیرْدِی.

آدم قادینِی گِئرَنْدَه، دیدِی: »بو مخلوق مَنَه اوخْشاییرْ. مَن اونَه قادینْ و عَیال دِئییرَمْ. چون کِه او، کِیشِی دَن آلینیبْ دِی. « اِئلَه بونَه گِئرَه دَه کیشینِی آتَه – آنَه سِنْ دَن آیِردِی، کیشِی خاتینْ نینَه قووشْدِی، بونْدَن سونْرا، اونْلارینْگْ ایکیسِی بیرلیکْدَه بیر تِنْ اولْدیْلار.

خدا کیشِی و خاتینْ نِی اِیزینَه اوخشارْ یاراتْدِی. اونْلارَه خِیر و بَرَه بِئردِی و دِیدِی: »یوکْلِی و دولْلِی اولِینْگ. چاغَه دنیایَه گَتیرِینْگ و یِئرْ اِیزینِی آدَمدَن دولْدیرینْگ. « خدا هر یاراتانْ زادلارِی یاخْشِی گِئردِی و راضی و خشنود اولْدِی. تمام بو زادلارینْگ یاراتْماسِی آلْتینجِی گِینْدَه باش وِئردِی.

یِئدّینْجِه گینْ گلَنْدَه، خدا یارادیلیش ایشْلَرینِی بتیردِی، یِئدّینْجِی گِینْ نِی، خیر و بَرَه بِئردِی و اونِی مقدس گینْ آدلانْدیردِی؛ چون کِه خدا یارادیلیشْ ایشْلَرینِی بیتیرِیبْ قورتارانْدَن سونْرا، دینجَه لَمَه گِینْ نِی ایدِی، او گِینْ دَه آرام تاپْدِی، خدا جهانِی و تمام مخلوقاتْلارینِی بِئلَه یاراتْدِی.