5. وَعْدَه نینْ اوغْلو

اون ایلْ کنعانینْ اؤلْکَه و تورْپاقینَه گِئچَنْ دَنْ سونْرا، اَبرام و سارایْ هَه نِئزْ هِئچْ چاغالارِی یوخْیدِی. ابرامین قادینِی سونْرا سارایْ اونَه دیدِی: »اینْدِی کِه خدا مَنَه اولادْ اَیَه سِی اولماغیمَه اِجازَه وِئرْمَه دِی و مَن آرْتیقْ حامِلَه و یا ایکِی جانْلِی اولْماغیمَه گِئرَه قوجالْمیشام، سَنْ کَنیزْ هاجَر نَنْ اِئوْلَنْ کِه، مَنْ اوچون چاغَه دوغْسونْ. «

بِئلَه لیکْلَه ابرام هاجَرْ نَنْ اِئوْلَنْدِی. هاجَر بیر اوغولْ دوغْدِی و اَبرام اونینْ آدْدینِی »اسماعیل« قویْدِی. لاکینْ سارایْ هاجَرِی قیسْقانیرْدِی. اسماعیل اونْ ایچْ یاشِی اولانْدا خدا یِئنِی دَنْ آبرام نَنْ دانیشْدِی.

خدا دیدِی: »مَنْ اوجا و اَنْ قادیرْ خدا اَمْ و سَنینْ نَنْ عَهْدْ باغْلایاجاغام. « سونْرا اَبرام خدا هینْ قارْشیسینْدا باشینِی اَیْدِی. همچنین خدا ابرامَه دا دیدِی: »سَنْ چوخْلو ملّت لَرینْ آتاسِی اولاجاقْسانْ. کنعان اؤلْکَه سِی و تورْپاقینِی سَنَه و سَنینْ نَسْلینَه اِرثْ و میراثْ وِئرَرَمْ و هَمِئشَه اونْلارینْ خدا هِی اولاجاغامْ. سَنْدَه عائِلَه نَنْ دَه کِه اوغْلانْلارینْ هامِی سینِی سُنَّتْ اِئدْمَه لِی سَنْ. «

»قادینینْ سارایْ، وَعْدَه اِئدیلْمیشْ بیرْ اوغولْ دُنیایَه گَتیرَه جَکْ. اونینْ آدینِی اِسحاقْ قویینْ. اونینْ نَنْ عَهْدْ باغْلاجاغامْ و اونْدانْ کاتَه نَسْل یِئتیشْدیرَه جَه یَم. مَنْ دَه اِسماعیلْ دَنْ کاتَه بیر قوم یاراداجاغامْ، امّا، عَهْدیم اِسحاق نَنْ اولاجاقْ. « سونْرا خدا ابرامینْ آدینِی بیر چوخْ خَلْقْلَرینْ آتاسِی معناسینِی وِئرَنْ اِبراهیمْ قویْدِی. همچنین خدا سارایْ نینْ آدینِی سارَه یَه دَییشْدیرْدِی کِه »مَلکه« معناسینِی وِئریرْ.

او گینْ اِبراهیمْ عائِلَه سینینْ بوتونْ اوغْلانْلارینِی سُنَّتْ اِئدِی. تَخْمینَنْ بیر ایلْدن سونْرا، اِبراهیمینْ یوزْ، سارانینْ دَه دوخْسانْ یاشِی اولانْدا سارَه بیر اوغولْ دوغْدِی. خدا هینْ ایسْتَه دِئییی کیمِی آدینِی اِسحاقْ قویْدولار.

اِسْحاق گَنْج و جَوانْ اولانْدا، خدا اِبراهیمینْ ایمانْ نینِی سینادِی و دیدِی: »بیرجَه اوغلونْ اِسحاقِی مَنَه قربان اِئدینْ. اِبراهیم بیر دَه گَنَم خدا هَه اِطاعت اِئدِی و اوغْلونو قُربانْ وِئرْمَه یَه حاضِرلاشْدِی.

اِبراهیم و اِسحاق قُربانْگاهَه گِئدَنْدَه اِسحاق سوروشْدِی: »ایْ آتا، اودینْ قُربانْلیقْ اوچونْ حاضِردِی. امّا، بَسْ قِربانْلیقْ قوزوسو هارْدادِی؟ « اِبراهیم جَوابْ وِئرْدِی: »اوغْلومْ، قَربانْلیقْ قوزوسونو خدا وِئرَه جَکْ. «

اونْلار قُربانْگاهَه چاتانْدا اِبراهیم اوغْلو اِسحاقِی ایپْ نَنْ باغْلادِی و اونو قُرْبانْگاهینْ ایسْتینْدَه قویْدِیْ. اِبراهیم اوغْلونو قَرْبانْ وِئرْمَکْ ایسْتَه دیکْدَه خدا بویورْدِی: »دورْ! بیر اَلْ ساخْلا، اوغْلانا ضَرَرْ یِئتیرْمَه! اینْدِی بیلْدیمْ کِه سَنینْ اؤرَه یینْدَه مَنیمْ قورْخومْ وارْ، چون کِه تَکْ اوغْلونو مَنْدَنْ اَسیرْگَه مَه دینْ. «

اِبراهیم او یاخینْلیقْ دا بیتیکْلَرینْ ایچینْدَه ایلیشْمیشْ بیر قوچو گیرْدِی. خدا اِسحاقینْ یِئرینَه قَربانْلیقْ اوچونْ او قوچو حاضِرلامیشْ ایدِی. اِبراهیم سِئوینْجْ نَنْ او قوچو خدا هَه قُرْبانْ وِئرْدِی.

سونْرا خدا اِبراهیمَه دیدِی: »سَنْ هَر زادِی حَتّا یِئکَه اولادینِی دا قُرْبانْ وِئرْمَه یَه حاضِر اولدوغونْ اوچون سَنَه خیر و بَرَه وِئرَه جَه یِی مَه سؤزْ وِئرَرَمْ. « سَنینْ نَسْلینْ آسْمانْدا کِه اولدوزْلارْدانْ چوخْ اولاجاقْ. مَنَه اِطاعت اِئدیینْ اوچونْ یِئرْ ایزینینْ بوتومْ عائِلَه لَرِی سَنینْ عائِلَه نینْ واسِطَه سیلَه خیر و بَرَه آلاجاقْلار. «