۲۲. وِ دُنیا اُمایِن یوحنای تعمید دهندَه
دِ قدیم خدا وِ وَسیلَه پِیُمبَریا خُش وا قومِش حَرف میزَه. اَما دِما گذشتِ ۴۰۰ سال کِه خدا وا قوم خُش حَرفی نَزِیَه بی، یِه گِلی فرشتَه خدا وِ کاهن پیری کِه نُومِش زکریا بی وِش دِراُما. او ئو زینَش الیزابت، آیِمیا خداترسی بییِن. اونُو پیر بییِن ئو الیزابت بَچَهدار نِمِوی.
فرشتَه خدا وِ زکریا گُت: «زینَه تو کُرِی میارَه وِ دیی. تو نُومِش مینی وِ یوحنا. خدا اونِه دِ روحِش پُر میکَه ئو یوحنا مَردِمِ سی اُمایِن مسیحِ موعود آمادَه میکَه.» زکریا دِ جِوُو گُت: « مِ ئو زینَم سی بَچَهدار بییِن خیلی پیریم! چطور دُونِسَه بام کِه وِ مِ راس مُوئی؟»
فرشتَه خدا وِ زکریا جِوُو دَ: «مِ دِ لا خدا اُمامَه تا ای خَوَر خوشِه وِ تو بَرَسِنِم. ایسِه کِه تو حرفیا مِنِه باور نَکِردی، قدرتِ حَرف زَئِنِه دِ دَس مِئی تا زِمُونی کِه اُو بَچَه بیا وِ دُنیا.» هِه دِ اُو مُوقَه، زکریا دَ نَتُونِس حَرفی وِ زِوُون بیارَه. اوسِه فرشتَه خدا دِ تِه زکریا رَت، زکریا وِرگَشت وِ حُونَه ئو وختی نگذشت کِه زینَش باردار بی
وَختی کِه الیزابت دِ ماه شیشِم بارداری بی، هِه اُو فرشتَه یِهدَفَه وِ فامیل الیزابت کِه نُومِش مریم بی وِش دِراُما. او دُختِر ریی بَستِه ئو دَسگیرُو پیائی وِ نُوم یوسف بی. فرشتَه وِ او گُت: «تو حامِلَه مویی ئو کُری میاری وِ دیی ئو نُومِش مینی وِ عیسی. او پسر خدای بزرگَ ئو سلطنتِش ابدییَه.»
مریم جِوُو دَ: «چطور چِنی چیئی مووَه دِ حالی که مِ دُختِر ریی بَستِه هیسِم؟» فرشتَه گُت: «روحالقدس وِ تو نازل مووَه ئو قوت خدا وِ تو سایَه مُونَه. وِ ای خاطِر وِ اُو کُر، قدوس ئو پسرخدا ی بزرگ مُوئَن.» مریم وِ حرفیا اُو فرشته ایمان اُوِرد ئو اُو چِیئینِه کِه او گُتی، قبول کِرد.
زِمُون کَمی دِما ای اِتفاق، مریم رَت وِ حُونَه الیزابت. تا الیزابت دَنگِ سِلام مَریَمِ شِنَفت، بَچَه دِ رحمِش تِکُو حَرد،. اونُو وِ خاطِر کاریائی کِه خدا سیشُو کِردی شادی زیادی کِردِن. مریم حدود سِه ماه مَن وِ تِه الیزابت ئو اوسِه وِرگَشتِن وِ حُونَه.
دِما ای اِتفاق الیزابت کُری اُوِرد وِ دیی. او ئو زکریا نُوم بَچَهنِه هِه اُو طور کِه فرشتَه گُتی نیان وِ یوحنا. اوسِه خدا دُوارَه دَم زکریانِه واز کِرد ئو زکریا گُت: «خدانِه شُکر، سییَهکِه او وِ یاری قومِش اُمائه! ئو تو اِ کُرِم وِت مُوئَن پِیُمبَر خدای بزرگ ئو وِ آیِمیا مُوئی کِه چِطور میتُونَن آمرزش گناهیاشُونه پیا بَکَن!»
مَتَلِی گِرِتِسَه دِ کِتآو مقدس: (کِتآو پیدایش فصل ۳ آیه ۱۵ ئو فصل ۱۲ آیه ۱ تا ۳، کِتآو تثنیه فصل ۱۸ آیه ۱۵، کِتآو دوئِم سموئیل فصل ۷، کِتآو ارمیا فصل ۳۱، کِتآو اشعیا فصل ۵۹ آیه ۱۶، کِتآو دانیال فصل ۷، کِتآو ملاکی فصل ۴ آیه ۵، کِتآو اشعیا فصل ۷ آیه ۱۴، کِتآو میکا فصل ۵ آیه ۲، کِتآو اشعیا فصل۹ آیه ۱ تا ۷ ئو فصل ۳۵ آیه ۳ تا ۵ ئو فصل ۶۱ ئو فصل ۵۳، کِتآو مزامیر فصل ۲۲ آیه ۱۸ ئو فصل ۳۵ آیه ۱۹ ئو فصل ۶۹ آیه ۴ ئو فصل ۴۱ آیه ۹، کِتآو زکریا فصل ۱۱ آیه ۱۲ ئو ۱۳، کِتآو اشعیا فصل ۵۰ آیه ۶، کِتآو مزامیر فصل ۱۶ آیه ۱۰ ئو ۱۱)
رایگان برای استفاده، اقتباس و اشتراکگذاری تحت مجوز باز (CC BY-SA 4.0).