۲۱. خداوند وعدَه اُمایِن مسیحِه مِئَه
هِه دِ اُو اول آفرینش خدا وِ خویی دُونِس کِه دِما مدتی طولانی مسیح موعودِه میفِرسنَه. او وِ آیِم ئو حوا وعدَه دِئی کِه ای کارِه بیگِمُو اَنجُوم مِئَه. خدا وعدَه دَ کِه دِ نسل(پُشت) حوا کَسی میا کِه سَر مارِه میکوئَه. ماری کِه حوانِه گول دَ هِه اُو شیطان بی. وعدَه یَه بی کِه مسیح، شیطانِ کامل شِکَس مِئَه.
خدا وِ ابراهیم وعدَه دَ کِه وِ وَسیلَه او هَمَه ملتیا دُنیا برکت پیا میکَن. او وِ وَعدَه خُش دِما مدت زِمُونی وا فِرسَنِن مسیح عمل میکِرد. مسیح موعود بایس مَردِمِه دِ هَر قومی دِ دنیا دِ گناهشُو نجات بِئَه.
خدا وِ موسی وعدَه دَ کِه دِ آینده نجات دهندِه چی او وِرْمِسَه. ای نجات دهندَه هِه اُو مسیحای موعود بی. وِ ای طور خدا یِه گِل هَنی وعدَه اُمایِن مسیحِه دَ.
خدا وِ داود پادشاه وعدَه دَ کِه کَسی دِ پشت او میرَسَه وِ پادشاهی ئو تا وِ ابد وِ قوم خدا سلطنت میکَه. یَه وِ اُو معنی بی کِه مسیح دِ پُشت داود میا.
وِ وَسیلَه ارمیای نبی خدا وعدَه دَ کِه پِیمُون جدیدی جور میکَه، اَما نه چی عَدی کِه خدا وا اسرائیل دِ کوه سینا بستَه بی. دِ پِیمُونِه جدید، خدا قانون خُشِه وِ ریی قلبیا مَردِم مینِویسَه، مَردِم خُشُو اونِه میشناسَن ئو وِ او محبت میکَن دِ احکام او فِرمُونبَری میکَن. مسیح کَسی بی کِه ای پِیمُون تازَهنِه وا اونُو میبَست. اونُو موئَن وِ قوم او ئو خدا گناهیاشُو میوخشَه.
پِیُمبَریا خدا گُتِن کِه مسیح موعود موئَه وِ نبی، کاهن ئو پادشاه موئه. نبی کَسیئَه کِه کَلُوم خدانِه میشنَوَه ئو وَنِه سی مَردِم وازگو میکَه. مسیح موعود خدا، نبی کاملی موئَه سییَهکِه او پیامیا خدانِه کامل میفَمَه ئو وَنِه وِ طور کامل وِ مَردِم وازگو میکَه.
کاهنیا یهودی دِ لا مَردِم سی خدا قربانی میکِردِن کِه جانشینی بی سی مجازات گناهیا اونُو. ئو کاهنیا سی مَردِم وِ درگاه خدا دُعا میکِردِن. وا ای حال قِرار بی مسیح موعود کاهن گَپی با کِه خُشِه وِ عنوانِ یِه قربانی کامل پیشکَش خدا میکَه. یعنی او هیچ وخت گناه نِمیکَه ئو وَختی او خُشِه وِ عنوان قربانی پیشکَش بَکَه، دَ نیازی وِ هیچ قربانی هَنی سی گناه نیسا.
پادشایا ئو ریاستیا وِ گروهیائی دِ مَردِم حکومت میکَن ئو بَضی مُوقَهیا هَم اشتباهیائی دارَن. داود پادشاه تَنیا وِ اسرائیلییا حکومت کِرد. اَما مسیح موعود کِه دِ پُشت داود میا وِ تمُوم دُنیا تا ابد حکومت میکَه. او عادلانَه حکومت میکَه ئو تصمیمیا دُرسی مِیرَه.
پِیُمبَریائی کِه دِ لا خدا فِرسنائین نبوتیا زیادی دِبارَه مسیح موعود کِرده بین. ملاکی نبی نبوت کِردی کِه وِرَز اُمایِن مسیح موعود، پِیُمبَر گَپِی هَنی میا. اِشعیای نبی نبوت کِردی کِه مسیح موعود دِ دُختِر ریی بَستِه میا و دیی. میکاه نبی هَم گُتی کِه او دِ شهر بیت لحم میا وِ دِی.
اشعیا نبی گُت کِه مسیح دِ جلیل زِنِئی میکَه. او قلبیا اِشکِسَه آیِمیانِه آرُومِش مِئَه ئو اسیریانِه رها میکَه. ئو او نبوت کِرد کِه مسیح موعود، بیماریا یعنی کوریا، شَلیا، کَریا ئو لالیانِه هَم شفا مِئَه.
ئو اشعیا نبی نبوت کِردی کِه مَردِم دِ مسیح موعود نفرت دارَن ئو دِ گِردِش نمیرَن. پِیُمبَریائی هَنی هَم نبوت کِردین کِه یَکی دِ دوسیا مسیح وِش پُشت میکَه. زکریا نبوت کِرد کِه ای دوس وِ خاطِر سی سِکَه نُقرَه وِ او خیانت میکَه. پِیُمبَریائی هَنی هَم نبوت کِردین کِه مسیحِ میکُشَن ئو وِ جُمَش قُرَه مُونَن.
ئو پِیُمبَریا دِبارَه یَه کِه مسیح موعود چِطوری میمیرَه نبوت کِردین. اشعیای نبی گُتی کِه مَردِم وِ او آو دَم مُونَن ئو اونِه میزِنَن ئو مَسخِرَه میکَن. اوسِه بدن اونِه سیلا میکَن تا وا رنج گَپی بَمیرَه، وا وجود وَ کِه هیچ گُناهی نَکِردی.
ِیُمبَریائی هَنی هَم نبوت کِردین کِه مسیح موعود بایس آیِم کامل ئو بی هیچ گناهی با. او بایس بَمیرَه، سییَهکِه خدا اونِه وِ جا گناه هَمَه مَردِم جهان مجازات میکَه. مجازات او بائث مِوی کِه دِ بِئن انسان ئو خدا آرُومِش ئو صلح بَرقِرار با. هِه وِ ای خاطِر، ارادَه خدا یِنَه بی کِه مسیح زخمی ئو کُشتَه با.
پِیُمبَریائی هَنی یَنِه هَم نبوت کِردِن کِه خدا مَسیحِ دِما مرگ بُلِن میکَه. وِ ای خاطِر وا مُردِن ئو وِریسائِن مسیح دِ مرگ، خدا میحاست کِه نَقشَه نجات گناهکاریانِه کامل بَکَه ئو عَد تازِه وا آیِم بَوَنَه.
خدا چیا زیادی دِبارَه اُمایِن مسیح وِ پِیُمبَریا دیاری کِرد. اَما مسیح دِ زِمُونِ هیچ کُم دِ ای پِیُمبَریا هَنی نیاُمائی. بیشتِر دِ ۴۰۰ سال دِما آخِری نبوت، وَختی کِه زِمُون وِ کمال رَسِس، خدا مَسیحِ وِ دُنیا فِرسَن.
مَتَلِی گِرِتِسَه دِ کِتآو مقدس: (کِتآو پیدایش فصل ۳ آیه ۱۵، فصل ۱۲ آیه ۱ تا ۳، کِتآو تثنیه فصل ۱۸ آیه ۱۵، کِتآو دوئِم سموئیل فصل ۷، کِتآو ارمیا فصل ۳۱، کِتآو اشعیا فصل ۵۹ آیه ۱۶، کِتآو دانیال فصل ۷، کِتآو ملاکی فصل ۴ آیه ۵، کِتآو اشعیا فصل ۷ آیه ۱۴، کِتآو میکا فصل ۵ آیه ۲، کِتآو اشعیا فصل ۹ آیه ۱ تا ۷ ئو فصل ۳۵ آیه ۳ تا ۵ ئو فصل ۵۳، کِتآو مزامیر فصل ۲۲ آیه ۱۸ ئو فصل ۳۵ آیه ۱۹ ئو فصل ۶۹ آیه ۴ ئو فصل ۴۱ آیه ۹، کِتآو زکریا فصل ۱۱ آیه ۱۲ ئو ۱۳، کِتآو اشعیا فصل۵۰ آیه ۶، کِتآو مزامیر فصل ۱۶ آیه ۱۰ ئو ۱۱)
رایگان برای استفاده، اقتباس و اشتراکگذاری تحت مجوز باز (CC BY-SA 4.0).