۲۰. تبعید ئو وِرگَشتِن

پادشاهی اسرائیل ئو پادشاهی یهودا هَر دو وِ ضد خدا گناه کِردِن. اونُو عَدی کِه وا خدا دِ کوه سینا بستَه بی‎یِن، اِشکِنان. خدا وِ وَسیلَه پِیُمبَریا وِ اونُو هشدار دَ تا توبَه بَکَن ئو دوارَه اونِه بپرستن، اَما اونُو دِ خدا فِرمُونبَری نَکِردِن.

وِ ای خاطِر خدا اونُون تنبیه کِرد ئو اِجازَه دَ کِه دشمن‎یاشُو، اونُونِه نابود بَکَن. دِ اُو زِمُون قوم قدرتمنی هَنی وِ نُوم آشور بی. آشوری‎یا نسبت وِ قوم‌یائی هَنی خیلی بی‌رحم بی‎یِن. پادشاهی اسرائیل وِ وَسیلَه آشور دِ بِئن رَت. آشوری‎یا خیلی دِ مَردِم پادشاهی اسرائیلِه کُشتِن، هَرچی کِه می‎حاستِن غارت کِردِن ئو خیلی دِ جایا سرزمین‌شُو سُختِنان.

آشوری‎یا هَمَه رَبَریا، آیِم‎یا دُو‎لَمَن ئو کَسُونی کِه دَسِلات خوئی داشتِن وا خُشُو بُردِن وِ آشور. هِه قَری دِ آیِم‎یا خیلی فقیر مَنِن دِ اسرائیل.

اوسِه آشوری‎یا، بیگُونَه‎یانِه اُوِردِن وِ سرزمین اسرائیل کِه دِ اوچِه زِنِئی بَکَن. بیگُونَه‎یا شهریا ویرُون بی‌یَه‌نِه دِ نو ساختِن ئو وا بَقیَه اسرائیلی‎یائی کِه دِ اوچِه باقی مَنِنی، دُوئَت کِردِن. وِ ثمره ای دُوئَت‎یا ، سامری گُتِن.

مَردِم پادشاهی یهودا، دییِن کِه خدا مَردِم پادشاهی اسرائیلِ وِ خاطِر بی ایمانی ئو نافِرمُونی مجازات کِرد. اَما وا ای وجود هَنی هَم بُت‎یا ئو خدایا کنعانی‎یانِه پرستش می‌کِردِن. خدا پِیُمبَریائی فِرسَن کِه وِ اونُو هُشدار بِئَن، اَما اونُو هَنی هَم وِ کار خُشُو اِدامَه می‌دَن.

حدود صد سال دِما نابودی پادشاهی اسرائیل وِ دَس آشوری‎یا، خدا نِبوکَدنِصَّر پادشاه بابِلِه فِرسَن تا وِ پادشاهی یهودا یورِش بُورَه. بابلی‌یا قوم قدرتمَنی بی‎یِن. پادشاه یهودا قبول کِرد کِه خدمت‌گزار نِبوکَدنِصَّر با ئو هَر سال پیل زیادی وِش بِئَه.

اَما دِما چَن سال، پادشاه یهودا وِ ضد بابل شورش کِرد. هِه وِ ای خاطِر بابلی‌یا وِرگَشتِن ئو دُوارَه وِ پادشاهی یهودا یورِش بُردن. بابلی‌یا شهر اورشلیمِ گِرِتِن، معبدِ دِ بین بُردن ئو هَر ثروتی کِه دِ شهر ئو دِ معبد بی، وا خُشُو بُردِن.

سی تنبیه پادشاه یهودا، سَروازیا نِبوکَدنِصَّر، کُریا اونِه ری‌وِری خُش کشتن ئو تیا اونِه کور کِردِن. دِما یَه، اونُو پادشاهِ وا خُشُو بُردِن تا دِ زِندُونِ بابل بَمیرَه.

نِبوکَدنِّصَّر ئو قُشونِش حدوداً هَمَه مَردِم پادشاهی یهودانِه وا خُشُو بُردِن وِ بابل ئو هِه آیِم‎یا خیلی فقیرِه هِیشتِن تا کشاورزی بَکَن. وِ ای دُورُو کِه قومِ خدا مجبور وِ ترکِ سرزمین موعود بی‎یِن، تبعید مُوئَن.

هَرچَن خدا وا تبعید، قوم خُشِه وِ خاطِر گناه‌یاشُو مجازات کِرد، اَما اونُونِه ئو وعدَه‌یایی کِه وِشُو دِئی دِ ویر نُوِرد. خدا ویردار قوم خُش بی ئو وِ وَسیلَه پیومبریا خُش وا اونُو صُبَت می‌کِرد.خدا وعدَه دَ کِه دِما هَفتا سال دُوارَه قومِ اسرائیلِه وِرمی‎گَردِنَه وِ سرزمین موعود.

دِما هَفتا سال، کوروش پادشاه پارسی‎یا، بابلی‎یانِه شِکَس دَ ئو وِ ای طوری امپراطوری پارسی‎یا وِ جا امپراطوری بابلی، وِ خیلی دِ قوم‌یا زور گِرِت. دِ ای زِمُون وِ مَردِم اسرائیل یهودی می‌گُتِن ئو بیشتِر اونُو تَمُومِ عمر خُشُو دِ بابل زِنِئی کِردَه بی‎یِن. هِه کَسُونی کِه خیلی پیر بی‎یِن، می‌تُونِسِن سرزمین یهودانِه وِ ویر بیارَن.

پارسی‎یا وا یَه کِه زوردار بی‎یِن، وا قوم‌یا زیر سُلطَه خُشُو، وا نَرمی ئو مهربُونی تا می‎کِردِن. دِما مدت کَمی کِه کوروش رَسِس وِ پادشاهی پارس، او فِرمُون دَ کِه هَر یهودی کِه میحا وِ یهودا وِرگَردَه، می‌تُونَه دِ سرزمین پارس رُوئَه ئو وِرگَردَه وِ سرزمین یهودا. او حتی وِ اونُو پیل دَ تا معبدِ دِ اورشلیم دُوارَه دِ نو بَسازَن! اوسِه، هَفتا سال دِما تبعید، بُر کُچِکی دِ یهودی‎یا وِرگَشتِن وِ شهر اورشلیم دِ سرزمین یهودا.

وَختی قوم رَسِسِن وِ اورشلیم، معبد ئو دیوار دُور شَهرِه دِ نو ساختِن. پارسی‎یا هَنی هَم وِ اونُو وِ زور بین، اَما اونُو دُوارَه دِ سرزمین موعود بین ئو می‌تُونِسِن خدانِه دِ معبد پرستش بَکَن.