۲۴. یوحنا، عیسی‎نِه تعمید مِئَه

یوحنا کُر زکریا ئو الیزابت، گَپ بی ئو وِ پِیُمبَری پَسَن بی. او دِ بیابُو زِنِئی می‌کِرد، عسل کوهی ئو قُلَه می‌حَرد ئو جُومِه دِ پَشم شُتِر می‌کِرد دِ وَر.

بُر زیادی دِ مَردِم وِ بیابُو می‌اُمان وِ تِه یوحنا ئو حرف‎یاشِه گوش می‌دَن. او سی‌شُو مُوعِظَه می‌کِرد ئو می‌گُت: «توبَه بَکیت، سی‌یَه‌کِه پادشاهی خدا نِزیکَه.»

سی‌یَه‌کِه مَردِم پیغوم یوحنا‌نِه می‌شنَفتِن، خیلی دِشُو دِ گناه‎یاشُو توبَه می‌کِردِن ئو یوحنا اونُونِه وا آو تعمید می‎دَ. خیلی دِ رَبَریا مذهبی وِ تِه یوحنا هَم می‌اُمان ، اَما وِ گناه‌یا خُشُو اِتِراف نمی‌کِردِن ئو دِ وِنُو توبَه نمی‌کِردِن.

یوحنا تعمید دهندَه وِ رَبَریا مذهبی گُت: «اِ ماریا سَمی! توبَه بَکیت ئو رفتار خُتُونِه عوض بَکیت. خدا هَر درختی کِه میوَه خو نیارَه، مُرَّه ئو مُونَه دِ تَش.» یوحنا پیشگویی پِیُمبَریانِه تَمُوم کِرد کِه گُتِبین: «سِیل‌کُو، ایسِه مِ قاصُو خُومِه دِ نِها تو می‌فرِسِم تا رَه‌نِه سی تو صاف بَکَه.»

قَری دِ رَبَریا مذهبی دِ یوحنا پُرسین: «تو مسیحی؟» یوحنا جِوُو دَ: «مِ مسیح نیسِم، اَما کَسی دِما مِ میا کِه مقومِش دِ مِ خیلی بالاتِرَه. اُوقَه کِه مِ قابل نیسم بَن کالَه‌یاشِه واز بَکِم.»

روز بَد عیسی سی تعمید آو، اُما وِ تِه یوحنا تعمید دهندَه. وَختی یوحنا اونِه دیی گُت: «یَه هِه اُو بِرَه‌ خدائَه کِه گناه‌ تَمُوم دُنیانِه وِرمیارَه.»

یوحنا تعمید دهندَه وِ عیسی گُت: «مِ لایق نیسِم کِه تُونِه تعمید بِئِم. یَه مِنِم کِه بایس دِ تو تعمید بیرِم.» اَما عیسی گُت: «مِنِه تعمید بِه، سی‌یَه‌کِه کار دُورس هِه یِنا.» وِ ای خاطِر یوحنا عیسی‎نِه تعمید دَ، وا یَه کِه عیسی هیچ‎وقت گناهی نَکِردی.

وَختی عیسی دِما تعمید دِ آو دِراُما وِ دَر، روح خدا چی کَموتَری دیاری بی ئو اُما وِ هار ئو وِ ریی او قِرار گِرِت ئو هِه اُو مُوقَه، دَنگ خدا دِ آسِمُو رَسِس کِه: «یِنا کُر مِ کِه اونِه دوس دارِم ئو دِ او خیلی راضی‎یِم.»

خدا وِ یوحنا گُتَه بی: «روح‎القدس وِ کَسی کِه تو اونِه تعمید مِئی میا، اُو شخص پسر خدائَه.» خدا یَکی‌یَه ئو وَختی کِه یوحنا عیسی‎نِه تعمید دَ، دَنگ خدا بُوئَه‌نِه شِنَفت. خدا کُر یعنی عیسی‎نِه دیی ئو روح‎القدسِ هَم دِ طُور کَموتَری دیی.