۲۵. شیطان عیسینِه وَسوَسَه میکَه
دِما تعمید عیسی، روح خدا دَرجا اونِه بُرد وِ بیابُو، جائی کِه او وِ مدت چهل شُو ئو چهل روز، روزَه گِرِت. اوسِه شیطان اُما وِ تِه عیسی، اونِه وَسوَسَه کِرد تا گناه بَکَه.
شیطان عیسینِه وَسوَسَه کِرد ئو گُت: «اَر تو پسر خدا هیسی، وِ ای بَردیا بُو کِه بووَن وِ نُون تا بَتُونی بُحُوری!»
عیسی جِوُو دَ: دِ کَلُوم خدا نوشتَه بییَه «آیِم سی زِنَه مَنِه تَنیا نیاز وِ نُون نارَه، بلکه وِ هَر کلمِه کِه دِ دَم خدا بَکَه وِ دَر!»
اوسِه شیطان اونِه بُرد وِ بُلِنترین جا معبد ئو گُت: « اَر تو پسر خدا هیسی، خُتِه دِ ایچِه بُون وِ هار؛ سییَهکِه کِتآو مقدس فرمایش میکَه: «خدا وِ فِرشتَهیا خُش فِرمُون مِئَه تا تونِه دِ کول بیرَن ، نَکَه پاتِه بَزِنی وِ بَردی.»
َما عیسی وِ اُو چیئی کِه شیطان گُتی عمل نَکِرد ئو جِوُو دَ: خدا دِ کَلُومِش وِ قوم خُش فِرمُون دِئَه: «خداوند خدای خُتِه اِمتِحُو نَکُو.»
اوسِه شیطان اونِه بُرد وِ تُک کوه بُلِنی ئو تَمُوم کشوریا دُنیا ئو قدرت ئو ثروت وِنونِه وِ او نِشُو دَ ئو گُت: «اَر زُونی بَزِنی ئو مِنِه بپرستی، هَمَه یِنُونِه وِ تو میوَخشِم.»
عیسی جِوُو دَ: دِ مِ دیر با اِ شیطان! دِ کَلُوم خدا، او وِ قوم خُش فِرمُون دا کِه: «تَنیا خداوند خدای خُتِه پرستش بَکُو ئو تَنیا وِ او خدمت بَکُو.»
عیسی دِ دُوم وَسوَسَهیا شیطان گرفتار نِوی. پس شیطان اونِه دِ تِه اوسه رَت وهِیشت ئو فِرشتَه یا اُمان ئو وِ عیسی خدمت کِردِن.
مَتَلِی گِرِتِسَه دِ کِتآو مقدس: (کِتآو انجیل متی باب ۴ آیه ۱ تا ۱۱، کِتآو انجیل مرقس باب ۱ آیَه ۱۲ ئو ۱۳، کِتآو انجیل لوقا باب ۴ آیه ۱ تا ۱۳)
رایگان برای استفاده، اقتباس و اشتراکگذاری تحت مجوز باز (CC BY-SA 4.0).