۲۶. شُرو خدمت عیسی

دِما پیروزی وِ وَسوَسَه‌یا شیطان، عیسی وِ جلیل جائی کِه دِ اوچِه زِنِئی می‌کِرد، وِرگَشت. روح‎القدس وِ عیسی قُوَت زیاد می‎دَ ئو او سی تعلیم دِ جائی وِ جائی هَنی می‌رَت ئو هَمَه دِبارَه او وِ خویی یاد می‌کِردِن.

عیسی وِ ناصرَه، آبادی‌ئی کِه دُورُو بَچِه‌ایی خُشِه دِش گُذَرَنی، رَت. دِ روز شبات، او رَت وِ پرستشگاه. رَبَریا مذهبی نُسخِه دِ کِتآو اشعیا نبی‌نِه وِش دَن تا بُحُونَه، اوسِه عیسی طومارِه واز کِرد ئو قری دِش سی مَردِم حَن.

او چِنی حَن: «خدا روح خُشِه وِ مِ نیائَه تا خَوَر خوشِه وِ فقیریا بو وم. او مِنِه فِرسنائَه تا اسیریانِه آزادی، کوریانِه بینایی‌ ئو جورکشون را رهایی بَوَخشِم. سی‌یَه‌کِه زِمُون رحمت خدا وِ آیِم رَسِسَه.»

اوسِه عیسی نِشِس ئو هَمَه وا دَقَت سِیلِش می‌کِردِن. اونُو دُونِسِن کِه اُو جا دِ کِتآو مقدس کِه عیسی حَن، وِ مسیح موعود اشارَه می‌کِرد. عیسی گُت: «کلُومی کِه سی شِما حَنِم، هِه اِیسِه دِ حالِه اَنجُومَه.» هَمَه مَردِم وا رَتِن ئو پُرسی‎یِن: «مَر ای شخص کُر یوسف نیسا؟»

اوسِه عیسی فرمایش کِرد: «وِ راسی کِه یِه پِیُمبَرِ دِ وِلات خُش قبولِش نمیکن. زِمُونی کِه دِ دُورُو ایلیا پِیُمبَر وِ مدت سه سال ئو نیم بارُو نَبارِس، وا وجود بیوَه زَن‎یا زیاد دِ اسرائیل، خدا ایلیانِه وِ کمک بیوَه زنی فِرِسَن کِه دِ وِلاتی هَنی زِنِئی می‌کِرد.»

ئو چِنی اِدامَه دَ: «دِ زِمُون اِلیشَع پِیُمبَر، بُرّی دِ آیِم‎یا دِ اسرائیل بیماری پوسی گِرِتَه بین. اَما اِلیشَع هیچ‌کُوم دِ اونُونِه شفا نَدَه. او هِه نَعَمان سوری، فَرمُوندَه دشمن اسرائیلِه دِ اُو بیماری شفا دَ.» کَسُونی کِه گوش می‌دَن یهودی بی‎یِن، وَختی ای حرف‎یانِه شِنَفتِن خیلی عَصَبُونی بی‎یِن.

مَردِم ناصرَه، عیسی‎نِه دِ پرستشگاه کشین وِ دَر، بُردِن وِ لُو یِه کَمَری تا اونِه دِ اوچِه بُونَن وِ هار ئو بَکُشَن. اَما عیسی دِ مین بِئن اونُو گُوارِس ئو دِ شهر ناصرَه‌ رَت وِ دَر.

اوسِه عیسی وِ سراسر جلیل رَت. بری دِ مردم وا لاش می‌اُمان ئو بیماریا زیادی وا خُشُو می‌اُوِردِن. دِ مین اونُو قری علیل، کور ئو کَر بی، قَری هَم نِمی‌تُونِسِن رَه رُوئَن ئو حرف بَزِنَن. عیسی اونُون شفا می‎دَ.

ئو عِدَه زیادی‌نِه کِه گرفتار روح گَن بی‎یِن، وِ تِه عیسی می‌اُوِردِن. وِ فرمُون عیسی روح‌یا گَن دِ مَردِم می‌کِردِن وِ دَر. خیلی دِشُو هَوار می‌زَن: «تو پسر خدا هیسی!» ئو مَردِم وا تعجب خدانِه ستایش می‌کِردِن.

اوسِه عیسی دِ مین شاگریا خُش دُوزَه نفَرِه جِگا کِرد ئو نُوم‌شُو نیا وِ رسول‎یا. اونُو وا عیسی مسافرت می‌کِردِن ئو دِ او یاد می‌گِرِتِن.