۲۷. مَتَل سامری خو
یِه روز یَکی دِ اوسایا مذهبی یهود اُما وا لا عیسی. او میحاست نِشُو بِئَه کِه تعلیمیا عیسی اشتباهَه. او پُرسی: «استاد، آیِم چی بایس بَکَه تا زِنِئی هَمیشهئینِه بیارَه وِ دَس ؟» عیسی جِوُو دَ: «دِ کِتآو تورات دِ ای بارَه چی نوشتَه بییَه؟»
اُو پیا گُت: «خداوند، خدا خُتِه وا تَمُوم دل، وا تَمُوم جُون، وا تَمُوم قوت ئو وا تَمُوم فکرِت دوس داشتو. هُمساتِه هَم چی خُت، دوس داشتو.» اوسِه عیسی فرمایش کِرد: «دُورس مُوئی! تو هَم چِنی بَکُو تا زِنِئی هَمیشهئی داشتَه بای.»
اَما اُو دُونِشمَن مذهبی سییَهکِه میحاست خُشِه آیِم خوئی نِشُو بِئَه، یِه دَفَه هَنی پُرسی: «هُمسا مِ کییَه؟»
عیسی وِا مَتَلِی جِوُو اُو گپ مذهبینِه دَ: «پیائی یهودی دِ اورشلیم وِ لا اریحا دِ سفر بی.
دِ رَه، رَهزِنیا وِش یورِش بُردِن ئو تَمُوم داراییشِه گِرِتِن، اونِه زَن ئو بدن نیمَه جُونِشِه دِ رُونَه جَدَه وِل کِردِن.
دِما ای جریان، کاهن یهودیئِی دِ اوچِه رَد مِوی. وَختی اُو پیانِه دِ مین جدَه اُفتائَه دیی، دِ لائِی هَنی دِ جَدَه وِ رَه خُش اِدامَه دَ ئو اونِه وِ کُلی نِئییَه گِرِت.
کَمِی دِما وَ یِه لاویئی دِ رَه رَسِس (لاوییا، طایفِه دِ اسرائیل بییِن کِه وِ کاهنیا معبد کمک میکِردِن.). او هَم رَت وِ لائِی هَنی دِ جَدَه ئو وِ اُو پیا کمک نَکِرد.
اوسِه پیائی هَنی اُما کِه سامری بی. (سامرییا ئو یهودییا دِ یَکتِری نفرت داشتِن). وا یَه کِه دیی اُو پیا زخمی یهودییَه، اَما دِلِش وِ حال او سُخت ئو زخمیاشِه شُست، مرهم مالی ئو بَست.»
اوسِه پیا سامری اونِه ِ سُوآر خَر خُش کِرد، بُرد وِ مِمُونخُونِه ئو دِ اوچِه هَم دِش تیمارش کِرد.
«با صُوش روز، پیا سامری بایس وِ سفر خُش اِدامَه میدَ. او قری پیل دَ وِ صِحاو مِمُونخُونَه ئو گُت: « ویردار ای کَس با ئو اَر بیشتِر دِ یِنَه خرج بَکی، وَختی کِه وِرگَشتِم وِ تو مِئِمِش.»
اوسِه عیسی دِ اُو دُونِشمَن مذهبی پُرسی: «اِیسِه فکر میکی کُومی دِ اُو سِه نفر، هُمسا اُو پیائی بی کِه دِش دُوزی کِردِنی ئو زِیَه بینش؟» دُونِشمَن مذهبی جِوُو دَ: «وِنَه کِه سیش دل سُوختَه بی.» عیسی وِ او جِوُو دَ: «تو هَم رُو ئو چِنی بَکُو.»
مَتَلِی گِرِتِسَه دِ کِتآو مقدس: (کِتآو انجیل لوقا باب ۱۰ آیهیا ۲۵ تا ۳۷)
رایگان برای استفاده، اقتباس و اشتراکگذاری تحت مجوز باز (CC BY-SA 4.0).