۲۸. جِوُون دُولَمَن
یِه روز یَکی دِ گپیا دُولَمَن اُما وا لا عیسی ئو دِش پُرسی: «استاد خو، چی بایس بَکِم تا زِنِئی هَمیشهئینِه وِ دَس بیارِم؟» عیسی وِ او فرمایش کِرد: «سیچی وِ مِ خو مُوئی ؟ دِ حالی کِه، بِجُز خدا کَسِی خو نیسا. اَر میحای زِنِئی هَمیشهئی داشتَه بای، دِ فِرمُونیا خدا فِرمُبَری بَکُو.»
او پُرسی: «دِ کُومی فِرمُونیا بایس فِرمُوبَری بَکِم؟» عیسی جِوُو دَ: «قتل نَکُو، زِنا نَکُو، دُزی نَکُو، دِرو نُو، وِ بُوئَه ئو دات احترام بَنی ئو هُمساتِه چی خُت دوس داشتو.»
اَما پیا جِوُون گُت: «مِ دِ بَچِهاِیی دِ هَمَه اُو فِرمُونیا فِرمُوبَری کِردِمَه، اِیسِه دَ چی بایس بَکِم تا زِنِئی هَمیشَهئی داشتَه بام؟» عیسی وا محبت سِیلِش کِرد.
ئو جِوُو دَ: «اَر میحای بهترین کار انجُوم بِئی، رُو ئو هَرچی داری بَفروش ئو پیلِش بِه وِ فَقیریا تا گنج تو دِ آسِمُو با نه وِ ریی زِمی! اوسِه بیا ئو دِ مِ فِرمُوبَری بَکُو!»
وَختی اُو پیا جِوُون ای حرف عیسینِه شِنَفت، خیلی غمگین بی سییَهکِه دُولَمَن بی ئو نمیحاست مال ئو اموال خُشِه دِ دَس بِئَه. او ریی خُشِه وِرگَردَن ئو دِ عیسی دیر بی.
اوسِه عیسی وِ شاگِردیاش فرمایش کِرد: «یَنِه دُونِسَه بایت کِه رد بییِن یِه دُولَمَن دِ پادشاهی خدا خیلی سَختَه. هَنی هَم مُوئِم، رد بییِن شتر دِ سیلا سیزِه آسُوتِرَه دِ رَد بییِن یِه کَس دارندَه دِ پادشاهی خدا!»
شاگردیا دِ شِنَفتِن ای حَرف عیسی وا رَتِن ئو پُرسین: «پَه کی میتُونَه نجات پیا بَکَه؟»
عیسی سِیلی دِ شاگردیا کِرد ئو فرمایش کِرد: «آیِم نِمیتُونَه خُشِه نجات بِئَه، اَما وِ تِه خدا هَمَه چی مووَه.»
پترس وِ عیسی گُت: «اِیما دِ هَمَه چی خُمُو دَس کَشیمَه تا وِ دُم تو بیایم، ایسِه مُز اِیما چی مووَه؟»
عیسی جِوُو دَ: «هَرکَس سی مِ دِ بِرار ئو خُوَئر، بُوئَه ئو دا ئو بَچَه، حُونَه ئو زِمی چَش بَپوشَه، صد براوَر بیشتِر پیا میکَه ئو زِنِئی هَمیشهئِینِه وِ دَس میارَه. اَما خیلییا کِه اول هیسِن، آخِر مووَن ئو خیلییا کِه آخِرَن، اول مووَن.»
مَتَلِی گِرِتِسَه دِ کِتآو مقدس: (انجیل متی فصل ۱۹ آیهیا ۱۶ تا ۳۰، انجیل مرقس فصل ۱۰ آیهیا ۱۷ تا ۳۱، انجیل لوقا فصل ۱۸ آیهیا ۱۸ تا ۳۰)
رایگان برای استفاده، اقتباس و اشتراکگذاری تحت مجوز باز (CC BY-SA 4.0).