۴۷. پولس ئو سیلاس دِ فیلیپی

سولُس وَختی کِه دِ کُلِ امپراتوری روم سَفَر می‌کِرد، تصمیم گِرِت دِ نُوم رومی خُش کِه پولُس بی، استفادَه بَکَه. یِه رو، پولس ئو دُوسِش سیلاس رَتِن وِ شهر فیلیپی تا خَوَر خوش عیسی‎نِه وازگو بَکَن. اونُو وِ رُونَه روئِی کِه دَر دِ شهر بی رَتِن. مَردِم دِ اوچِه وِ دور یَکتِری جَم مِوین تا دُعا بَکَن. اونُو دِ اوچِه زَنی وِ نُوم لیدیَه‎نِه دین کِه تاجر بی. او خدانِه دوس داشت ئو اونِه پرستش می‎کِرد.

خدا لیدیَه‌نِه قادر کِرد تا وِ عیسی ایمان بیارَه. پولس ئو سیلاس اونِه وا خانوادَش تعمید دَن. اوسِه او، مِکیس پولُس ئو سیلاس کِرد تا بَمُونَن دِ حُونَه‌ش ئو اونُو هَم مَنِن وِ تِه او.

پولُس ئو سیلاس بیشتِر دِ جائی کِه یهودی‎یا دُعا می‌کِردِن، وِ ملاقات مَردِم می‎رَتِن. دِ اوچِه کنیزی بی کِه روحِ ناپاک داشت ئو هَر روز وِ دُم اونُو می‎اُما. او وِ کمک ای روح پلید، آیندَنِه سی مَردِم پیشگویی می‌کِرد ئو وِ ای طور وِ نومِ یِه غِوگو، سود زیادی نِصیو اربابیاش می‌کِرد.

اُو کنیز وَختی کِه اونُو رَه می‌رَتِن، وا دَنگ بُلِن می‌گُت: «ای پیایا خدمتگزاریا خدای بزرگن. اونُو رَه نجاتِه وِ شِما نِشُو مِئَن!» او روزیا زیادی چِنی ‌کِرد تا یَه کِه طاقَت پولس تَمُوم بی.

آخِر یِه روز وَختی کِه اُو کنیز هَوار می‌زَه، پولس ریی کِرد وا لاش ئو وِ روح ناپاکی کِه دِ او بی گُت: «وِ نُومِ عیسی دِ ای دُختِر بیا وِ دَر.» روح ناپاک دَرجا اونِه وِل کِرد.

وَختی اَربآویا کنیز دییِن چی پیش اومائه، خیلی عَصَبُونی بی‎یِن. یَه وِ اُو معنی بی کِه مَردِم دَ وِ اَربآویا اُو دُختِر پیل نمی‌دَن، سی‌یَه‌کِه فَمِسِن کِه بی اُو روح پلید، کنیز دَ نمی‌تُونِس غِوگویی بَکَه.

وِ ای خاطِر اَربآویا اُو کنیز، پولس ئو سیلاسِه بُردِن وِ تِه مقام‎یا رومی. اونُو پولس ئو سیلاسِه زَن ئو وَنِن دِ زِندُون.

اونُو پولُس ئو سیلاسِه وَنِن دِ جائی دِ زِندُون، کِه نگَه‎بُون زیادی داشت. ئو اونُو پایاشُونِه وا تیکَه‎یا گَپ چو بَستِن. وا ای حال اونُو دِ نیمَه‌یا شُو، سِرویائِی دِ ستایش ئو پرستش خدا می‌حَنِن.

یِه‌دَفَه، زِمی لرزَه قوی پیش اُوما! تَمُوم دریا زِندُون واز بی ئو زنجیریا هَمَه زِندُونی‎یا افتان.

اوسِه نگَه‌بُون زِندُون بیار بی ئو دیی کِه دروازه یا زِندُون واز بی‎نَه. او گمو کِرد کِه هَمَه زِندُونی‎یا جیستِنَه ئو دِ تَرسِ مجازاتِ مُردن وِ دَس مقام‎یا رومی، قصد کِرد خُشِه بَکُشَه. اَما پولس اونِه دیی ئو هِنا کِرد: «وِ خُت صدمَه نَزِه! هَمَه اِیما هیسیم ایچِه.»

نِگَه‌بُون زِندُون دِ حالی کِه زَلتِراق بی‎ئِی ئو می‎رِکِس اُما وِ تِه پولس ئو سیلاس ئو پُرسی: «چی بَکِم تا نجات پیا بَکِم؟» پولُس جِوُو دَ: «وِ عیسی خداوند، ایمان بیار. اوسِه تو ئو خانوادَت نجات پیا میکیت.» اوسِه نِگَه‌بُونِ زِندُون، پولس ئو سیلاسِه بُرد وِ حُونَه خُش ئو زخم‎یاشُونِه شُست. پولس خَوَر خوش عیسی‎نِه سی هَمَه کَسُونی کِه دِ حُونَه او بی‎یِن، مُوعِظَه کِرد.

اُو نِگَه‌بُونِ زِندُون ئو هَمَه خانوادَش وِ عیسی ایمان اُوِردِن ئو پولس ئو سیلاس اونُونِه تعمید دَن. اوسِه نِگَه‌بُونِ زِندُون وِ پولُس ئو سیلاس غذا دَ ئو اونُو وا یَک شادی کِردِن.

روز بَد(روز دِمان)، رَبَریا شهر، پولس ئو سیلاسِه دِ زِندُون آزاد کِردِن ئو دِشُو حاستِن تا دِ فیلیپی بَکَن وِ دَر. پولس ئو سیلاس رَتِن وِ دییِن لیدیَه ئو قَری دِ دوس‎یاشُو ئو اوسِه دِ شهر کِردِن وِ دَر. خَوَر خوش دِبارَه عیسی هَنی هَم پخش مِویی ئو کلیسا رشد می‌کِرد.

پولس ئو بَقیَه رَبَریا مسیحی وِ شهریا زیادی سفر می‌کِردِن. اونُو وِ یاد دیین ئو مُوعِظَه دِبارَه خَوَر خوش عیسی سرگرم مِوین. ئو اونُو نامَه‌یا زیادی نوشتِن تا ایمانداریانِه دِ کلیسایا یاد بیین ئو تشویق بَکَن. قَری دِ ای نامَه‌یا بی‎یِن وِ کِتآویائی دِ کِتآو مقدس.