۴۹. پِیمُون تازَه خدا

فرشتِه ی وِ دُختِر جِوُونی وِ نُوم مریم گُت کِه او پسرِ خدانِه وِ دُنیا میارَه. وَختی کِه مریم هَنی دُختِر ریی بَستِه بی، روح‎القدس وِش دَمِس ئو باردار بی. او کُرِی اُوِرد وِ دُنیا ئو نُومِش نیا وِ عیسی. وِ ای خاطِر، عیسی هَم خدا ئو هَم آیِمه.

عیسی معجزَه‎یا زیادی اَنجُوم دَ کِه نِشُو مِئَه او خدائَه. او وِ ریی آو رَه رَت، توفانِه آرُوم کِرد، مریضیا زیادی شفا دَ، دِ کَسُونِه زیادی روح‎یا گَنه وَن وِ دَر، مُردیانِه زِنَه کِرد ئو پنج نُون ئو دو ماهی کُچِکِه، برکت دَ ئو کِرد وِ غذائی وِ اندازه ، که سی سیر کِردِن بیشتِر دِ ۵۰۰۰ نفر بی.

عیسی معلم گَپی هَم بی. هَمَه چی‎یائی کِه او یاد می‎دَ حقیقت داشت. مَردِم اُو چی‎ئی کِه او وِشُو می‎گُت بایس اَنجُوم می‎دَن، سی‎یَه‎کِه او پسرِ خدا بی. سی نِمونَه او یاد می‎دَ کِه بایس وِ بَقیَه‎ چی خُمُو محبت بَکیم.

ئو او وِ اونُو یاد دَ کِه بایس خداوندِه بیشتِر دِ هَر چی‎ئی هَنی، حتی دارایی‎یا خُشُو دوس داشتَه بان.

عیسی گُت کِه بی‎یِن دِ پادشاهی خدا، با ارزشتِر دِ هَر چی‎ئی دِ ای دُنیائَه. سی رَتن وِ پادشاهی خدا، بایس او تونِه دِ گناه‎یات نجات بِئَه.

عیسی گُت قَری دِ آیم‌یا اونِه قبول می‌کَن، اوسِه خدا اونُونِه نجات مِئَه؛ اَما هَمَه اونِه قبول نمی‎کَن. او یَنِه هَم گُت کِه قَری دِ آیم‌یا چی خاک خو هیسِن، سی‎یَه‎کِه خَوَرِ خوشِ عیسی‎نِه قبول می‌کَن ئو خدا اونُونِه نجات مِئَه. قَری هَم چی خاک سُفت ئو سخت رُونَه رَه هیسِن. کَلُومِ خدا چی اُو تُمی‎ئَه کِه مُوفتَه وِ ریی اُو زِمی، اَما هیچ ثَمَری وِ بار نِمیا. یِنُو مَردِمی‎ئَن کِه پیومِ عیسی‎نِه قبول نمی‎کَن ئو نمی‎حان وِ پادشاهی خدا رُوئَن.

عیسی وِ اونُو یاد دَ کِه خدا گناهکاریانِه خیلی دوس دارَه. او میحا کِه اونُونِه بَوَخشَه ئو بَکَه وِ بَچُونِ خُش.

ئو عیسی وِ اونُو گُت کِه خدا دِ گناه نفرت دارَه. وِ خاطِرِ گناه آیِم ئو حوا، هَمَه نَسل اونُو هَم گناه می‎کَن. وِ ای خاطِر، هَر کَسی دِ دُنیا گناه می‌کَه ئو دِ خدا جِگا بی‎یَه. هَمَه دشمنِ خدائَن.

اَما خدا وِ هَمَه مَردِمِ دنیا چِنی محبت کِرد کِه تَنیا کُر خُش عیسی‎نِه دَ، تا هَر کَس وِش ایمان بیارَه وِ خاطِر گناه‎یاش تاووان نیه، بلکه تا ابد وا خدا زِنِئی بَکَه.

شِما وِ خاطِر گناه کِردِن، حقتو مردِنَ. خدا حق دارَه کِه وِ شِما عَصَبُونی با، اَما عیسی وا رَتِن وِ ریی صلیب ئو مُردنش، تقاصِ گناه‎یا اِیمانِه گِرِت وِ خُش.

عیسی هیچ وخت هیچ گناهی نَکِرد، اَما قبول کِرد کِه سی گناه‎یا آیم تاوون بیه. او حتی سنگین‎تِرین تاوونه کِه مُردنه، قبول کِرد. وِ ای طوری او قربانی بی عیوی بی تا گناه‎یا شِما ئو هَر کَسی هَنی‎نِه دِ ای دنیا پاک بَکَه. سی‎یَه‎کِه عیسی خُشِه وِ نوُمِ قربانی تقدیم خدا کِرد، اوسه خدا هَمَه گناه‎یا، حتی گناه‌یا خیلی گَنِه وِنُونی کِه وِ او ایمان میارَن می‎وَخشَه.

حتی کاریا خو شِما نمی‎تُونَه باعِثِه نجاتِ‎تُو با. کاری نیسا کِه وا اَنجُومِش بَتُونیت وا او سَرِ دوسی بَنِیت. وِ جاش بایس ایمان بیاریت کِه عیسی پسرِ خدائَه ئو وِ جا شِما وِ ریی صلیب مُرد ئو خدا دُوارَه اونِه دِ مُردِن بُلِن کِرد. اَر وِ ای حقیقت ایمان بیاریت خدا هَم کُلِ گناه‎یا شِمانِه می‎آمُورزَه.

خدا هَر کَسِ کِه وِ عیسی ایمان بیارَه ئو اونِ وِ نوُمِ خداوندِه خُش قبول بَکَه، نجات مِئَه. اَما خدا کَسُونی کِه وِ او ایمان نیارَن، نجات نِمِئَه. مهم نیسا فقیر یا پیل‎دار، پیا یا زینه، پیر یا جِوُو ئو یا یَه کِه مالِ کجا بایت. خدا شِمانِه دوس دارَه ئو میحا وِ عیسی ایمان بیاریت تا او بَتونَه وا شِما سَر دوسی داشتَه با.

عیسی شِمانِه مکیس می‌کَه تا وِ او ایمان بیاریت ئو تعمید بیریت. ایمان داریت کِه عیسی هِه اُو مسیحای موعود ئو تَنیا پسرِ خدائَه؟ ایمان داریت کِه گناهکارید ئو حقتونه خدا تقاص دتو بیره؟ ایمان داریت کِه عیسی وِ ریی صلیب مُرد تا گناه‌یا شِمانِه پاک بَکَه؟

اَر وِ عیسی ئو اُو چی‎ئی کِه او سی شِما اَنجُوم دِئَه ایمان داریت، پَ شِما مسیحی هیسیت! دِ ایسِه وا دِما دَ شیطان دِ پادشاهی تاریک خُش وِ شِما حکومت نمی‎کَه. ایسِه خدا دِ پادشاهی نورانی خُش وِ شِما حکومت می‎کَه. خدا وِ شِما قوت دِئَه تا چی گذشتَه گناه نَکیت ئو وِ شِما رَه دُرس زِنِئی کِردِنِه یاد دِئَه.

اَر مسیحی هیسیت، خدا گناه‌یا شِمانِه وِ خاطِر کاری کِه عیسی کِرد بَخشَنَه. ایسِه خدا شِمانِه دوس نِزیک خُش حِسآو می‌کَه ئو نَه دشمن.

اَر دوس خدا ئو خدمتکار عیسی خداوند هیسیت، میل داریت کِه دِ یاد دین‎یا عیسی فرمُون بری بَکیت. وا یَه کِه مسیحی هیسیت، شیطان هَنی شِمانِه وَسوَسَه می‎کَه تا گناه بَکیت، اَما خدا هَمیشَه وِ وَعدَه‎یا خُش وفا می‎کَه. او فرمایش می‌کَه اَر وِ گناه‌یا خُتُو اِتِراف بَکیت، شِمانِه می‌وَخشَه ئو وِ شِما قوت مِئَه تا وا گناه بجنگید.

خدا وِ شِما مُوئَه کِه دُعا بَکیت ئو کَلُومِ اونِه بُوحُونیت. ئو او وِ شِما مُوئَه تا وا مَسیحی‎یائی هَنی اونِه بَپِرَستیت ئو وِ بَقیَه هَم بُوئیت کِه سی شِما چی کِردَه. اَر تَمُوم یِنُونِه اَنجُوم بِئیت، دوسی قوی‎ئی دِ بِئن شِما ئو خدا پیش میا.