۵۰. عیسی وِرمی‎گَردَه

نِزیک وِ ۲۰۰۰ سالَه کِه آیِم‎یا زیادی دِ دُنیا، خَوَر خوشِ انجیلِ عیسی مَسیحِه می‎شنَوَن. کلیسا دِ حال رشد بی‎یَه. عیسی وَعدَه دا کِه دِ آخِرِ دنیا وِرمی‎گَردَه. هَر چَن عیسی هَنی نیومائَه، اَما وِ وَعدَه خُش وفا می‌کَه.

خدا دِ اِیما میحا دِ حالی کِه چَش وِ رَه وِرگَشتِن مسیح هیسیم، طوری زِنِئی بَکیم کِه مقدس بوئِیم ئو وِ او عزت بَنیم. ئو او دِ اِیما میحا کِه دِبارَه پادشاهی او وا بَقیَه حرف بزنیم. وَختی کِه هَنی مسیح وِ ریی زِمی زِنِئی می‎کِرد، چِنی فرمایش کِرد: «شاگردیا مِ خَوَر خوشِ پادشاهی خدانِه دِ هَمَه دُنیا مُوعِظَه می‎کَن، اوسِه آخِر زِمِو می‎رَسَه.»

قوم‌یا زیادی هیسِن کِه هَنی دِبارَه عیسی چی‎ئی نَشنَفتِنَه. وِرَز وَ کِه مسیح وِرگَردَه وِ آسِمُو، او وِ مَسیحی‎یا فرمایش کِرد تا ای خَوَر خوشِه وِ هَمَه کَسُونی کِه وَنِه هیچ وخت نَشنَفتِنَه وازگو بَکَن. عیسی فرمایش کِرد: «رِیت ئو هَمَه ملت‎یان بَکیت وِ شاگردیا مِ، سی‎یَه‎کِه قلب‎یا چی کِشت‎یا سی دِرو آمادان.»

عیسی یَنِه هَم گُت کِه: «نوکَر دِ اَربآو خُش بالاتِر نیسا. هِه ‌اُو طُور کِه اَربآو‎یا ای دُنیا دِ مِ نفرت داشتِن، شِمانِه هَم وِ خاطِر مِ عذاو می‌ئن ئو می‌کُشَن. دِ ای دُنیا رنج می‌کَشیت اَما دلگرم بایت؛ سی‌یَه‌کِه مِ، شیطانِ کِه حاکم ای دُنیائَه شِکَس دَمَه. اَر تا وِ آخِر وِ مِ وفادار بَمُونیت، اوسِه خدا شِمانِه نجات مِئَه!»

عیسی سی شاگردیا خُش مَتَلِی تَریف کِرد، تا سی اونُو واز بکه دِ آخِر ای دُنیا چی وِ سَر مَردِم میا. او گُت: « پیائی دِ زِمی خُش تُم خو کاشت. وَختی هَنی دِ خآو بی، دشمنِش اُما ئو لا وِ لا تُم گَنِم، تخم گیاه هرزکاشت ئو رَت وِ رَه خُش.

وَختی تُم‎یا جیک زَن، کارگریا اُو پیا گُتِن: «آقا، شِما تُم خو دِ ای زِمی کاشتیت! سی‌چی دِ مینشُو گیاه هرز سُوز کِردَه؟» اُو پیا جِوُو دَ: «یَه تَنیا می‎تُونَه کارِ دشمن‎یا مِ با کِه وِنُون بَکارَن. یَکی دِ دشمن‎یا مِ ای کارِه کِردَه.»

کارگریا دِ جِوُو اَربآو خُشُو گُتِن: «آیا بایس گیایانِه بَکَشیم وِ دَر؟» ارباب جِوُو دَ: «نَه. اَر ای کارِه اَنجُوم بِئیت، قَری دِ گَنِم‌یان هَم واشُو می‌کَشیت وِ دَر. تا مُوقَه دِرُو بَکُومیت ئو اوسِه گیایان جَم بَکیت بَسوزِنیت، اَما گَنِم‌یان بیاریت وِ انبار مِ.»

شاگردیا معنی ای مَتَلِ نَفَمِسِن ئو دِ مسیح حاستِن تا ای مَتَلِه سی اونُو واز بکه. عیسی گُت: «پیائی کِه تُم خونِه کاشت، مَسیحَه. زِمی ای دُنیائَه ئو تُم خو مَردِمی‎ئَن کِه هان دِ پادشاهی خدا.»

گیا هَرز کَسُونی هیسِن کِه مالِ شیطان، یَعنی شرآشون. دشمن اُو پیا یعنی کَسِی کِه گیا‌یا هرزِ کاشت، هِه اُو اِبلیسَه. فصل دِرُو، آخِر دُنیائَه، ئو دروگریا فرشته‎یائَن.

وَختی دُنیا وِ آخِر بَرَسَه، فرشته‎یا هَمَه مَردِمی کِه مال اِبلیسَن، دِ تَمُومِ دُنیا جَم می‌کَن دِ دریاچَه تَش مُونَن. جائی کِه اونُو وا رنج ئو عذاو وحشتناکی می‎گِریوَن ئو دِنُون‌یا خُشُو می‎سائَن وِ یَک. اَما عادل‎یا کِه دِ عیسی فرمون بری کِردِنَه چی اَفتآو دِ پادشاهی بُوئَه خُشُو، خدا، می‎درَخشَن.

ئو عیسی گُت کِه وِرَز آخِر دُنیا وِرمیگَردَه وِ زِمی. او هِه وِ ‌اُو طورِی کِه دِ زِمی رَت وِرمیگَردَه، یعنی یِه بدنِ جسمی دارَه ئو دِ آسِمُو وِ ریی اُوریا میا. وَختی عیسی وِرگَردَه، هَر مسیحی‎ئی کِه مُردَه، دِ مین مُردیا وِرمِسَه ئو وا او دِ آسِمُو یکترین مینن.

اوسِه مسیحی‎یائی کِه هَنی زِنَه هیسِن، وِ آسِمُو بالا می‎رَن ئو وِ مسیحی‎یائی هنی می‎رَسَن کِه دِ مین مُردیا وِریسانَه. هَمَه اونُو وا عیسی دِ اوچِه هیسِن ئو عیسی وا قومِ خُش زِنِئی می‎کَه. اونُو دِ دوسی هَمیشَه‎ئِی وا یَکتِری زِنِئی می‌کَن.

عیسی وعدَه دَ کِه وِ هَر کَس کِه وِ او ایمان دارَه، تاجی می‎وَخشَه. اونُو وا خدا تا ابد وِ هَمَه چی حکومت می‎کَن ئو دِ آرُومِش کامل هیسِن.

اَما خدا کَسُونی کِه وِ عیسی ایمان نی‎اُوِردِن، داوری می‌کَه. او اونُون مُونَه دِ جَنِم. اوچِه جائی‎ئَه کِه اونُو تا ابد می‎گِریوَن ئو دِنُون‌یا خُشُو فشار مِئَن وِ یَک ئو رنج می‎کَشَن. تَشی کِه هیچ وَخت خاموش نِمووَه اونُون می‎سوزِنَه ئو کِرم‌یا دِ حَردِنشُو هیچ نِمِسَن.

وَختی کِه عیسی وِرگَردَه، شیطان ئو حکومَتِشِه کامل نابود می‌کَه. شیطان تا ابد وا هَمَه کَسُونی کِه وِ جا فرمون بری دِ خدا، دِ او فرمون بری کِردِن دِ اوچِه می‎سوزَن.

وِ خاطِر نافِرمُونی آیِم ئو حوا ئو اُوِردِن گناه وِ ای دُنیا، خدا دُنیانِه لَنَت کِرد ئو تصمیم وِ نابودیش گِرِت. اَما یِه روز خدا آسِمُو ئو زِمی نوئِی دُورس می‌کَه کِه کامل هیسِن.

عیسی ئو قومِش دِ زِمی نوئِ زِنِئی می‌کَن، ئو او تا وِ ابد وِ هَر چی‎ئی کِه هیسا سلطنت می‌کَه. او هَر اَسری‎نِه دِ تیا مَردِم پاک می‌کَه. دَ غَمی نیسا ئو هیچ کَس عذاو نمی‎کَشَه. اونُو هیچ وخت نمی‎گِریوَن، دَ کَسی مریض نِموئَه ئو نِمی‎میرَه. ئو هیچ چی گَنِی دِ اوچِه نیسا ئو عیسی وا دوسی ئو عدالت دِ پادشاهی خُش حکومت می‎کَه. دِ وَ وا دِما او وا قوم خُش تا ابد هیسا.