۱۶- رِها کِنِنده ها

یوشع بَمِرده په، اسرائیلیا خِدای فَرمونا ره گِس نِدانه و تِمومِِ کنعانیا ره وَعده بَئی سَرزمین جِه یورنَکِردِنه. وِشون هَمطییِم یَهوه ،راسّی خِدایِ بَدِل کنعانیای بُتا ره َپرستِش کِردِنه. اون زَمونا، اِسرائیلیا پادشاه نِداشت بینه، هَمینتاسّه هَرکی هَر کاری که دِرِس دونِسِّه،هَمونتا ره انجام دائه.

اسراییلِ قومِ سَرکِشی، باعث بَیّه که پِشتِ سَرِهَم وِشونِ سَر بِلا بی یِه ُو وِنِه دِم نوُسّه. پیشامِدایی که هَی رج به رَج ایموئه اینا بینِه: اسرائیلِ قوم خَله سال بی یِه که خِدا ره گِس نِدا بینه.هِمینتاسّه خِدام وِشونِ سِزایِ وِسّه، اِجازه دائه که وِشونِ دِشمِنون وِشونِ سَرسِوار بَوِّن . دِشمِنونِم خَلِه ها ره کِشتِنه وُ وِشونِ دار و نِدارِ وَردِنه و هَمه چی رِه نابود کِردِنه. اَت چَن سالی کِه دِشمِنون وِشونِ ره آزار هِدا بینِه پِه ، اَی خِدایِ وَر دَگِرسِنه و شِه کارا ی جه توبه هَکِردِنه و خِدا جا بِخوِاسّنه که دِشمِنونِ دَسِ جه وِشون ره رِها هَکِنه.

هَر کَش که وِِشون توبه کِردبینه ، خِدا شه رِها کِنِنده رِه رایی کِرده تا وِشونِ رِه دِشمِنِ چنگِ جِه آزاد هَِکِنه. اون رِها کِنِنده دِشمِنونِ جا جَنگ کِرده و وِشون ره شِکَست دائه. .اینطی اَتِه دوره وِشونِ سَرزمینِ آرامِش داشتِه و اون رِهانندهم خارِ فَرمونرِوا بی یه . خِدام اسراییلِ قومِ وِسّه خَلِه رِها کِنِِنده بَرِسِنیه. خِدا اِجازه هِدا پِه که اسراییلیا ، شِه دِشمَن یَعنی مِدیانِ دَس شِکَست بَخِرِن، اَت وار دیگم وِشونِسّه رِها کِنِندِه بَرِسِنیه.

مِدیانیا هَفت سالِ آزِگار اسراییلیایِ زَحمِت بَکِشی ره بِچاپِسّنِه، اِسراییلِ قوم وِشونِ تَرسِ جه غارایِ دله جا خِردِنه،تا نَکِنه مِدیانیا وِشون ره گیر بیارِن.آخِرِ کار خِدایِ دَس دامِن دَکِتِنِه تا وِشون ره آزاد هَکِنه.

اَت روز اَت مَردی، جِدعون نوم بی چِمِر، دَیّیِه گَنّم کِتِنیِه تا مدیانیا نَتونِن وره بِچاپِن. هَمونگِدِر یَهوَُة فِرِشته وَنه جِلو دیار بَیّیه و باتِه:«آهای دِلِرِ جنگی، خِدا تِه هِمکِت دَره.بور و اسراییلِ رِه مِدیانیایِ چَنگِ جِه دَر بَوِر.»

جِدعونِ پی یِر، شِه قِربونگاه ره اَتّا بُتِ وِسّه پیشکَش هَکِرد بی یِه.خِدا شِروعِ کار جدعونِ جِه بِخواسّه کِه اونتا قِربونگاه ره خِراب بِکِنه.ُ چونکِه جدعون مَردِمِ جه تَرسیه تا نصفِه شو لَس هِدا.اونگِدِر قِربونگاه ره بَزّوئه ، بِشکِنیِه و رِز رِز هَکِردِه.وه هَمون نَزیک پِه اَتّا دیگِه قِربونگاه خِدایِ وِسّه بِساتِه و وِنه سَر قِربونی هَکِردِه.

فِردا سِوایی مَردِم که بَدینه وِشونه قِربونگاه ره اَت کَس بّزو خِراب هَکِرده خَله جوش بیاردِنِه. وِشون جِدعون سِرِه وَر بوردِنه که وِره بَکوشِن. امّا جدعونِ پی یِرِ باته «چیشی وِسّه خوانِنِی ِشه خِدا ره کمک هَکنین؟ اَگه وِه خِدا هَسّه بِی ِیلّین وِه شِه، شِه جِه نیگَداری هَکِنه.» وِشونِم اینتا گَپِ که بِشتوسِّنه جدعون ره نَکوشتنه.

اَی دِواره مدیانیا بیَمونِه تا اسرائیلیا ره بِچاپن.وِشون اَندِه زیاد بَینِه که شِمارِش نَی بینِه. جِدعون، مِدیانیایِ جَنگِ وِسّه شِه ِتمومه قوم ره وَنگ هَکِرده. جِدعون خِدا جِه اَتّا نِشونه بِخواست بی یِه که وِ رِه هالی بَوّه که راس راسی، خِدا وِنه جه بِخواسّه که اسرائیلِ جانِ دَر بَوِره.

یِکِمین نِشونه وِسّه، جِدعون اَتّا تیکه گِسپِن ِپوس ره بِنه سَر بِشته و خِدا جه بِخواسّه بِنه سَر خِشک بَمونِه، و پوسِ سَر شِبره هِنیشِه. خِدام هَمینکاره هَکِرده. فِردا خِدا جه بِخواسّه که بِنه سَر شیر بَوّه مُنتا پوسِ خِشک بَمونِه. خِدا اینتا کاررِم هَکِرده. این دِتا نِشونه َجدعون خیالِ تخت هَکرده که خِدا وِنه جه بِخواسّه که اسرائیل ره مدیانیایِ دَسِ جه دَر بَوِره.

۳۲۰۰۰ تا اِسرائیلی سرباز، جِدعون پیش بیَمونِه، مُنتا خِدا وِره بِفَرمِسّه که وِشون خَله زیاد هَسِّنه. هَمینتاسّه جدعون بیست و ۲۲۰۰۰ سرباز که جَنگه جه تَرسینه ره سِرِه رایی هَکِرده. خِدا این کَش جدعون ره باتِه اَتَنّه آدِم خَله زیاد هَسّنه.اونگِدِر ۳۰۰ تن بَکِتِه جِدعون هَمه ره سِره رایی هَکِرده.

هَمون شو خِدا جدعون ره باتِه: «بی چِمِر مِدیانیایِ اِردوگاه بُور،وِشونه حَرف و گَپِ که بِشتوُیی، دیگه نَتِرسِنی که وِشونِ سَر هِجوم بَوِری.» جدعون وِشونِ اِردوگاهه وَر بُورده و بِِشتوسّه که اَتّا مدیونی سَرباز،شِه خُو ره شه رَفِقِ وِسّه شَرح دِنّه. وِنه رَفِق ،وِره باته :«تِه خوُ اینطی سَر دَر ایارنِه که جدعون ارتش اِما ره شِکَست دِنِّنِه.» جدعون که اینتا گَپ ره بِشتوسّه خِدا ره شکر هَکِرده.

جِدعون شِه سربازایِ پَلی دَگِرِسّه وهَر سَربازی ره اِتّا شَیپور و اِتا گِلی کوزه هِدا که ونه دِلِه تَشکَل دَیّیِیه. وِشون اونگِدِر که مِدیانیایِ سربازا بَخِت‌بینه وِشون ِره دوره هَکِردنه. اون سیصد تا سرباز شِه تَشکَلا ره گِلی کوزة دِله بِشت‌بینه که مدیانیا نَتونِن وِشونِ تَشکِلایِ سوُ ره بَوینِن.

اینطی جِدعونِ سربازا، شِه هِمکِت گِلی کوزه رِه هَمِه تایی بَزّونِه بِشکِنینِه و وشون تَشکِل سُو دیار بَّیِیه. هَمینطی که شَیپور زونِنِه،شونگ َکشینه: «شمشیر، یَهوَه و جدعون‌ وِسّه»

خِدا اَندِه مدیانیا ره گِج هَکِرده که شِروع هَکِردِنه هِدیِ سَر دَکِتِن و دِیی ره بَکوشتِن. جدعون دَر دَم اسرائلیایِ دیگه ره وَنگ هَکِرده وَ وِشونِ جِه بِخواسّه تا مدیانیایِ فِراریِ هِدائنِ وسّه وشون ره یاری هَدِن. وِشون اَته خَله مدیانیا ره بَکوشتنه دیگِرون رِم اسرائیل جا یور هَکردِنه. اون روز ۱۲۰۰۰۰ تَن مِدیانی بَمِردِنه.اینطی خِدا اسراییلِ قوم ره نِجات هِدا.

مَردِم بِخواسِّنه کِه جدعون ره ِشه شاه هَکِنِن. وِه وِشون رِه نِشتِه اینتا کار رِه هَکنن، مُنتا وِشونِ جا بِخواسّه که اون حلقه هایِ طِلا ره که مدیانیایِ جِه بَیت بینِه ره هَدِن وِره. مَردِمِم ،جدعون ره خَله طِلا هِدانه.

اونگِدِر جدعون طِلاهای جا اَتّا جِلیزقه گَتِ پیشواهایِ جِلیزقِه واری بِساته. مُنتا مَردِم اون جلیزقه ره بُتِ واری پَرَستِش کِردبینِه. همینتاسّه، دواره خِدا اسرائیل قوم ره گوشمالی هدا ، چونکه وِشون بُت ها ره پرستِش کِردبینِه، وشونِ دِشمِنون رِه اِجازه هِدا که وِشون ره شِکِست هَدن. دسِ آخر وِشون اَی دِواره خِدای جه یاری بِخواسّنه ، خِدام وشونِسّه اَتّا رِها کِنِندة دیگِه رایی هَکِرده.

اینتا کار هَی گِردِش کِرده : اسرائیل قوم گِناه کِرِدبینِه ، خِدام وِشون ره سِزا دائه ، وِشون توبه کِردِنه و خدا وشو‌نِسّه اَتّا رِها کِنندِه رایی کِرد بی یِه.سالهایِ سال ،خِدا خَله ها ره رایی هکِرد بی یِه تا اسراییلِ قوم ره وِشونِ دِشمِنونِ دَسِ جه دَر بَوِرِه.

آخرسَر اسرائیل قوم خِدا جِه بِخواست بینِه که قوم های دیگه واری وِشون رِه اَتّا شاه هَده. وِشون اَتّا پادِشاهِ بِلندِ بالاو قوی خواست بینِه که جَنگای دِلِه وِشون ره راهنِمایی و رَهبَری هَکنه. خِدا اینتا خواستِة جه خِشنود نَی بی یه، مُنتا هَمینطی که بِخواست بینِه وِشون ره شاه بِبَخشیه.