۱۵- وَعدِه بَئی سَرزَمین

آخِرسَر اون زَمون بَرِسیه که اِسرائیل قومِ وَعدِه بَئی سَرزَمین، یا هَمون کَنعانِ دِلِه بُورِن. اونجِه اَتّا شَهر دَئی‌بی یِه که وِنه نوم اَریحا بی‌یِه، وِنه دُورِ وَر زیلِ دیوار بَکِشی‌ بی یِه. اونجه اَتّا بَدکارِه زِنا کِه وِنه نوم راحاب بی یِه زنِدگی کِرد بی یِه. وِه خَوِرچینا رِه شِه پَلی جا بِدا. وِشون رِه کُمِک هَکِردِه تا اونتا شَهرِ جِه دَر بورِن. چونکِه وِه خِدا رِه بُووِر داشتِه این کار رِه هَکِرده. خَوِرچینام راحابِ جا قُول و قِرار بِشتِنه کِه اَریحا نابود هَکِردِه پِه، وِه وُ وِنه خِنِواده دَر اَمون بَمونِنِن.

وَعدِه بَئی سَرزمین بَوِردِنِ خاطِری، اِسرائیلیا وِسِّه کِه اُردُنِ روخِنة جِه هِدار هَکِرد بوئِن. خِداوَند یوشَع رِه باتِه: «پیشواها رِه جِلوجِلو رایی هَکِن». پیشواهای لینگِ کابْ کِه اُردن روخِنِة اُو بَرِسی یِه، اُو اِس هَکِردِه وُ اِسرائیلیا تونِسِّنه خِشکِ بِنِة سَر، اونوَرِ روخِنه بَرِسِن.

اونگِدِر که قُوم، اُردُنِ روخِنة جِه یور بوُردِنِه، خِدا یوشَع رِه باتِه که شِه خِدِرِه آماده هَکِن تا اَریحایِ شَهرکه خَلِه قَوی هَسِّه رِه هِجوم بَوِری. خِدا مَردِم رِه باتِه: پیشوائون و سَربازا وِنه شیش روزِ تِموم، هَر روز اَتّا کَش هَمِة شَهر دور بَزِنِن. پیشوائون وُ سربازام هَمین کارِ رِه هَکِردِنه.

هَفتِمین روز اسرائیلیا وِسِّه هَف کَش شَهرِ دور بَزِنِن، پیشوائونِم شَیپور بَزِنِن و مَردِمم شونگ بَکِشِن. وِشونِم هَمین کار‌ رِه هَکِردِنه.

اینطی بَیِّه که اَریحایِ دیوارا دَکِلِسّه. اِسرائیلیا هَرچی شهر دِله دَیِّیه رِه هَمونجوری که خِدا وِشون رِه باُت بی یِه نابود هَکِردِنه. تِنا راحاب وُ وِنه خِنواده که اِسرائیلیا ره هِمکِتی هَکِردِبینه دَر اَمون بَمونسِّنه. قُومایِ دیگه که اِسراییلِ وَر سامون دَیّنِه وَ کَنعانِ سَرزمینِ دِلِه زندگانی کِردبینه، بِشنوسِّنه که اِسرایلیا اَریحا رِه نابود هَکِردِنه، هُول و هِراس دَکِتِنه که نَکِنه اِسرایلیا بِخوان وِشون رِم هِجوم بَوِرِن.

خِدا اِسرائیلِ قُوم رِه فَرمون هِدا که، کَنعانِیایِ جا پَیمون نَوِندِن وُ دوستی نَکِنِن. مُنتا اَتّا کَنعانی قوم که جَبعونیون گِتِنه، یوشَع رِه دِرو بَزونه و باتِنه که کَنعانِ اونورترِ جِه بیَمونِه، وِشون یوشَعِ جِه بِخواسِّنه که وِشونِ جا پَیمونِ دوستی دَوِنِن. یوشَع و پیشوائون و گَت‌ترایِ اِسرائیل خِدای جا دَرمیون نِشتِنه و خِدسَر جَبعونیونِ جا پَیمون دَوِسِّنه.

سه روز بُگذِشتِه په، اسرائیلیا ره حالی بَیِّه که جَبعونیون هَمون کَنعانِ مَردِم هَسِّنه وَ وِشونِ دِروی جِه اسرائیلیا ره خَلِه غِظ بَیِته. مُنتا شِه پَیمون رِه نِشکِنینِه، چونکه خِدای پیش پَیمون رِه دَوِسْ‌ بینه. چَن وَقت بَیِّه په، اَتّا قومِ دیگه کَنعانی که وِشونِ نوم اَموریا بی یِه، بِشنوسِّنه که جَبعونیون اِسرائیلیایِ جا پَیمون دَوِسِّنه، شِه سَربازا رِه جَمْ هَکِردِنه و جَبعونیونِ سَر دَکِتِنه وُ وِشون رِه هِجوم بَوِردِنه. جَبعونیونِم یوشَعِ جا یاری بِخواسِّنه.

یوشَع هِم اسرائیلِ سَربازای سَر رِه جَم هَکِردِه وُ وِشونِم تمومِ شو راه بوُردِنِه تا که جَبعون بَرِسینه. هَمونگِدِرم، طِلا وَنگ، ناگِمونی اَموریایِ سَر دَخِتِنه.

اون روز خِدا اِسرائیلِ وِسّه جَنگ هَکِرده. وِه اَموریا رِه گِج وُ مَنگ هَکِرده، گَت گَتِه سَنگِتِریک آسمونه جا بِنه بَشِنیه وُ اَتّه خَله اَموریا رِه بَکوشته.

اَی هَمطی خِدا کاری هَکِرده که اِفتاب آسمونِ دِله هِرِستا، تا اسرائیلِ سَربازا ویشتِر زَمون دارِن که اَموریایِ کاره یِکسَرِه هَکِنِن. اون روز خِدا اَتّا گَتِ پیروزی اِسرائیلیایِ وِسِّه فِراهِم هَکِرده.

خِدا اونتا ارتشِ رِه شِکِست هِدا پِه، قومایِ دیگه کَنعانِ دِلِه هِدیِ جا پَیمون دَوِسِّنه تا اِسراییلِ جا جَنگ هَکِنِ. هَمینتاسِّه یوشَع و اِسرائیلیا وِشِون وَر هِجوم بَوِردِنِه وُ وِشون رِه نابود هَکِردنِه.

جَنگها تِموم بَئی پِه، خِدا وَعدِه بَئی سَرزَمینِ دِلِه هَر اَتّا طایِفِة اِسرائیل رِه اَتّا سَهم هِدا. خِداوند؛ اَی اِسرائیلِ مَرز‌ و سامونِ دِلِه آرامِش بِشتِه.

یوشَع پیرمَردی بَئی پِه، تِمومِ اِسرائیلِیا رِه جَم هَکِرده. هَمونگِدِرم مَردمِ یاد بیاردِه که وِشونِ قِرار بِشتْ بینه، پَیمونی که خِدا سینا کویِ دِله وِشونِ جا دَوِسْ بی‌یِه رِه فَرمون بَوِرِن. مَردِمِم قُول هِدانِه کِه خِدایِ جا وِفادار بَمونِنْ وَ وِنه دَستورِ رِه گِردِن بی یِلِّن و بِجا بیارِن.