۲۴- یَحیی عیسی رِه تَعمید دِنّه

یَحیی، زکِریا و اِلیزابِتِ ریکا گَت بَییِّه و پَیغُمبَری بَرِسیِّه. وِه بیابونِ دِلِه زِنْدِگی کِرد بی یِه، صَحرایِ عَسِلْ وُ مَلِخْ خِردِه َو اَتّا جِمِه داشتِه که شِتِرِپَشمِ جِه بَدوت بی یِه.

خَلِه آدِما یَحیایِ پَلی بیابونِ دِلِه ایی یَمونِه و وِنِه گَپْ رِه گوش گِیتِنه. وِه وِشون‌ رِه پَند ُواَندِرز دائه و گِتِه: «توبِه هَکِنین، چونکِه خِدای پادِشاهی نَزدیک هَسِّه.»

چونکِه مَردِم یَحیایِ پِیغوم رِه اِشتوسْتِنِه، خَلِه ها شِه گِناهایِ جِه توبِه هَکِردِنِه، یَحیامْ وِشون رِه اوُیِ جا تَعمید دائِه. پیشواهایِ دینِم خَله یَحیایِ پَلی اییَموِنه، مُنتا شِه گِناها رِه بِروز نِدانِنِه.َوشِه گِناه جِه توبه نَکِردِنِه.

یَحیا پیشْواهایِ دینی رِه باتِه: « آی زهردارِ مَرا ! توبِه هَکِنین و شِه رَفتار جه دَگِردین. خِدا هَر داری کِه خارِ میوِه نیارِه، وِرینِّه و تَشِ دِله دِم دِنِّه.» یَحیا پَیغُومبِرایِ پیشگویی رِه کِه باتْ بینِه: «هارِش، مِنْ شِه فِرِستادِه رِه تِه جِلو جِلو رایی کِمْبِه تا تِه وِسِّه راه ره تخت هَکِنِه»، سَراَنجامْ هِدائه.

اَتّی پیشواهایِ دینی، یَحیایِ جِه بَپِرسینِه: «تِه مَسیح هَسّی؟» یَحیا جِوابْ هِدا: «مِن مَسیح نیمِه، مُنتا مِه پِشتِ سَر اَت کَس اِنِه کِه وِنِه جایگاه مِه تون خَلِه بالاتِرِه. اَنّه کِه مِنْ لیاقِت نِدارمِه وِنِه کلوشِ وَنی رِه بُوشِم»

فِردایِ اونْ روز عیسی تَعمیدِ اویِ وِسّه، یَحیایِ پَلی بُوردِه. یَحیا کِه وِرِه بَدیِه ِوره باته: « وِه هَمون خِدایِ وَرِکا هَسِّه کِه تِمومه دِنیا گِناه رِه از بین وَرنِه.»

یَحیا عیسی رِه باتِه: « مِن شایِستِگی نِدارمِه تِه رِه تَعمید هَدِم. اینتا مِنِمه کِه وِنِه تِه جِه تَعمید بَیرِم.» اَمّا عیسی باته: « مِه رِه تَعمید هَدِه، دِرِسّه کارِ وِه هَسِّه.» هَمینتاسِّه یَحیا عیسی رِه تَعمید هِدا. دِرِسته که عیسی هِچ زَمونْ گِناهی نَکِرد‌ بی‌یِه.

عیسی تَعمیدِ بَیتِه پِه اوُیِ جِه دَر بی یَمو، خِدایِ روح اتِّ کوتِرِ واری دیار بَیّه وُ پایین بی یَمو وَ وِنِه دوشِ سَر هِنیشتِه وُ هَمونگِدِر خِدایِ وَنگ ،آسِمونِ جِه بَرِسی‌یه کِه: «وِه هَسِّه مِه جان ریکا کِه وِرِه دوس دارمِه و وِنِه جِه خَلِه خِشنودِمِه.»

خِدا یَحیا رِه بات بی یِه: «روح‌ِ قِدّوس، اونتا آدِمِ سَر کِه تِه وِره تَعمیدْ دِنّی اِنِه، هَمونتا خِدایِ ریکا هَسِّه.» خِدا یِتّا هَسِّه وَ یَحیا کِه عیسی رِه تَعمید دائه، خِدایِ پیِ یِر وَنگ رِه بِشتوسِّه. خِدایِ ریکا، یَعنی عیسی رِه بَدیه و روح‌ِ قِدّوسِ رِه که کوتِرِ واری بیَموئه رِم بَدیِه. کِتابِ مُقَدَسِ جِه بَئیته داستان: