۲۵- شِیطون عیسایِسّه سوُسِه اِنِه
عیسی تَعمید بَیتِه پِه، دَر دَم خِدایِ روح وِرِه بیابونِ دِلِه بَوِرْدِه. اَتِّه جا کِه وِه چِل روز وُ شوُ، روزِه بَیتِه. اونگِدِر شیطون عیسایِ پَلی بی یَمو و وِنِسِّه سُوِسه بی یَمو تا وِه گِناه هَکِنه.
شِیطون عیسایِسّه سوسِه بی یَمو وُ باتِه: «اَگِه تِه، خِدایِ ریکا هَسّی، اینتا سنگا رِه باوُ که نون بَوِّن تا بِتونی بَخِری.»
عیسی جِواب هِدا: خِدایِ کِلامِ دِلِه بَنِوشْتِه کِه «آدِم؛ زِندِه بَمونِسِّنِ وِسِّه، تِنا نون نِخوانِّه، بَلکُمْ هَر کَلومی کِه خِدایِ کِتارِ جِه دَر اِنِه، نیاز دارنِه!»
همونگِدِر شَیطون وِره بِلِن تِرین جایِ پَرِستِشگاه بَوِرْدِه وُ باتِه: «اَگِه تِه؛ خِدایِ ریکا هَسّی، شِه خِدِرِه اینجِة جِه بِنه دِم هَده، چونکِه کِتابِ مُقَدِّس گِنِه: «خِدا شِه فِرِشتِه ها رِه دَستور دِنِه کِه تِه هِوا رِه دارِنْ تا نَکِنه تِه لینگْ اَتّا سَنگِ چَکْ هَیْرِه.»
مُنْتا عیسی هَر چی کِه شَیطون وِرِه باتْ بی یِه رِه اَنجام نِدا و دَر جِواب باتِه: خِدا شِه کِلامِ دِلِه شِه قُوم رِه اینطی دَستور هِدا: «خِداونْد شِه خِدا رِه آزمایِش نَکِن.»
اونگِدِر شَیطون وِره اَتّا بِلِندِ کویِ تِک بَوِردِه وُ تِمومِ کِشوَرایِ دِنیا، وَ وِشونِ تِوانایی وُ سَرمایِه رِه وِرِه سِراغْ هِدا و باتِه: «اَگِه ساخْ بِنِه بَزِنی وُ مِرِه پَرِستِش هَکِنی، اینا هَمِه رِه تِرِه بَخشِمبِه.»
عیسی جِواب هِدا: شِیطون، مِه سَرِ جِه رَد بِواش! خِدایِ کِلامِ دِله دَرِه که، وِه شِه قُوم رِه اینطی دَستور هِدا، «تِنا خِداوند، شِه خِدا رِه پَرِستِش هَکِن وُ تِنا وِرِه خِدمِت هَکِن.»
عیسی شِیطونِ سوسِة دوُمْ دِله نَکِتِه. هَمینتاسِّه شِیطون وِنِه جِه نا اُمید بَیِّه وُ بُورْدِه، هَمونگِدِر فِرشتِه ها بی یَمونِه و عیسایِ دور ره بَیتِنه وُ وِنه جا بَرِسینه.
کِتابِ مُقَدَسِ جِه بَئیته داستان: (کتاب انجیل متی باب ۴ آیه ۱ تا ۱۱، کتاب انجیل مرقس باب ۱ آیه ۱۲ و ۱۳، کتاب انجیل لوقا باب ۴ آیه ۱ تا ۱۳)
رایگان برای استفاده، اقتباس و اشتراکگذاری تحت مجوز باز (CC BY-SA 4.0).