۳۷- پولوس و سیلاس فیلیپی شهرِ دِلِه

سولوس اونگِدِرکه تِمومِ رومِ امپرطوری دِلِه سَفِر کِردبی یه ، بِنا بِشتِه که شِه رومی نومِ جِه استفاده هَکِنِه. اَتّا روز پولوس وُ وِنِه رَفِق بوردِنِه فیلیپیِ شَهرِ دِلِه تا خَوِرِ خِشِ عیسی ره هَمسّة بَوّن .وِشون، شهَرِ جِه یور بُوردِنِه و اَتّا روخِنِه یِ پَلی بَرِسینِه. مَردِم اونجِه جَم بَینِه و دِعا کِرد بینه‌. اونجِه وِشون یِتّا زِنا ،لیدیه نوم که بازرگان بی‌یه رِه بَدینه . که وِه خِدا رِه دوس داشتِه و پَرَستِش کِردبی یه.

خِدا لیدیه رِه تِوانایی هِدا کِه عیسی رِه بوُوِر هَکِنه. پولوس و سیلاس وِه و وِنِه خِنِواده رِه تَعمید هِدانِه. اَتِّه کَم که بوگذِشتِه، وِه پولس و سیلاس رِه شِه سِرِة دِلِه مِهمون هَکِردِه کِه وِشون هَمونجِه بَمونِن، وِشونِم هَمونجه بَمونِسِّنه.

پولوس و سیلاس ویشتِرِ جاهایی کِه یَهودیا دِعا کِرد بی‌نه شینه تا مَردِم رِه بَوینِن. اونجِه اَتّا دَسمَره دَیيّه کِه ناپاکِ روح داشتِه و هَر روز وِشونِه پِه دَیّیه. وِه هَمین ناپاکِ روحِ جِه ، مَردِم آیندِه رِه پیش پیش گِته و اینتا کارِ جِه پیشگویِ وَنِکِت اَتّه خَلِه شِه اِربابایسّه دَرآمِد داشتِه.

اونتا دَسمَره هَر زَمون وِشون کِه این وَر وُ اون وَر شینِه ، وِشونِ پِشتِ سَر شونگ کَشیه وُ گِتِه: «اینتا مَردا گَتِ خِدایِ خِدمِتگِزار هَسّنِه. وِشون رِهاییِ راه رِه شِمارِه سِراغ دِنّنِه! » وِه ویشتِرِ روزا اینطی گِذِرون کِردِه تا کِه دیگِه پولوسِ تاب نیاردِه.

آخِرِ سَر اَت روز کِه اونتا دَسمَره وِشونِ پِه هَی شونگ کَشِیه ،پولوس دَسمَره رِه هارِشیِه وُ ناپاکِ روح رِه باته: «عیسایِ نومِ جا گِمه اینتا زِنایِ جِه یور بوُر.» ناپاکِ روحِم دَر دَم ونِه جّ دَر بوُرده.

اونگِدِر که دَسمَرة اِربابون بَدینِه چی‌شی بَیّه ، خَلِه بَرزِق بَئینه. اینتا کارِ جا مَردِم دیگه دَسمَرة پیشگویی وِسّه اِربابون رِه پولی نِدانِه و وِشون رِه هالی بَیّه اَگِه ناپاکِ روح دَنی بَوِّه ، دَسمَره نَتّونِّه دیگه پیشگویی هَکِنه.

هَمینتاسّه دَسمَرة اِربابون پولوس و سیلاس رِه بَوِردِنه رومیِای گَت گَتای پیش. وِشونِم پولوس و سیلاس رِه دَروشتِنِه وُ، زندونی هَکردنه.

وِشون پولوس و سیلاس رِه زِندونِ دِلِه اَتّا بَند دِله دِم بِدانِه که ویشتِرین پاسِبون رِه داشتِه. وِشُونِ لینگ و پِه رِه گَته چویِ جا دَوِسِّنه. مُنتا وِشون نیمِه هایِ شُو، سِرود و آوازِ خونِسِّنِه وَ خِدا رِه پَرستش کردنه .

ناگِمونی اَتّا گَتِ زَمین لَرزِه بیَمو! زِندونِ دَرا هَمِه وا بَّیِه و تِمومِ زندونیایِ زنجیر، وِشونِ دَس ولینگِه جِه بِنه دَکِته.

سَر پاسِبون که بیشار بَّیه بَدیِه که زِندونِ دَرا اَز دَم وا بَیّه و گِمون هَکِردِه که تِمومِ زِندونیا فِرار هَکِردِنه و اَندِه وِرِه مَرگِ تَرس بَیتِه کِه اِسا رومیای گَت گَتا وِرِه کِشِنِنِه، بِنا بَیتِه کِه شِه خِدِرِه بَکوشه ،مُنتا پولوس وِرِه بَدیِه و شونگ بَکِشیه که: «شِه خِدِرِه نَکوش، اِما همه هَمینجه دَرِمی.»

سَر پاسِبون کِه خَلِه بَترسی بی یِه پولوس و سیلاسِ پَلي بیَمو و بَپِرسیه: «چیکار هَکِنِم که نِجات پيیدا هَکِنِم؟» پولُس وِرِه جِواب هِدا: « عیسایِ خِداوند رِه بُووِر هَکِن . اونگِدِر هَسّه که تِه وُ تِه خِنِواده آزاد بونِنی» هَمونگِدِر اینتا پاسِبونِم پولس و سیلاس رِه شِه سِره بَوِردِه وَ وِشونه زَخما ره بَشِسّه و دَوسّه. پولوسِم خَوِرِ خِشِ عیسی رِه اون خِنِوارِسّه باتِه.

سَر پاسِبون وُ وِنِه خِنِواده عیسی ره ایمان بیاردِنه و پولوس و سیلاس، وِشون رِه تَعمید هِدانه. اونگِدِر سَر پاسِبون پولوس و سیلاس ره خِراک هِدا و هِدی جا خَنده خِشالی هَکردنه.

اَتّا روز کِه بوگذِشتِه، شهرِ گَت گَتا، پولوس و سیلاس رِه زِندونِ جِه آزاد هَکِردِنِه و وِشونِ جِه بِخواسّنِه که فیلیپی شَهرِ جِه دَر بورِن. پولوس و سیلاسِم لیدیه و شِه رَفِقا رِه بَدینِه پِه، شَهرِ جِه یور بوردِنه. خَوِرِ خِش عیسی ،هَمِه جا دَپیتِه ُو کِلیسام لَس‌لَس جان گِیتِه.

پولوس وُ گَت گَتایِ مَسیحیِ ، خَلِه شَهرا ره شینه، وِشون عیسایِ خَوِرِ خِشِ دَرواره سِخِنرانی کِردنه ومَردِم رِم یاد دانِنِه. وِشون اَی اَتِّه خَلِه نامِه بَنِویشتِنه تا کِلیسایِ دِلِه ایماندارا رِه یاد بَدِن و وِشونه دِلگَرمی هَدِن. اَتّیِ اون نامِه ها، چَنتا کِتاب ِ کتابِ مُقَدّس بَیّه. کِتابِ مُقَدِسّ جه بَئیته داستان :