۴۶- پولس مسیحی وونه

سولوس اَتّا جِوونِ مَردی بی‌یه که اِستیفانِ بَکوشتِنِ گِدِر وِه یَهودیایِ رَختِ جه پاسبونی کِرده وَ عیسی رِه بوُوِر نِداشته. وه مسیحیا ره آزار دائه و اورشلیم دِلِه اینتا کِندا اونتا کِندا مردا و زنای په شیه تا وِشونِ ره بَیره وُ دِم هَده زندون. گَتِ پیشوا وِره باته که تا دمشق بوُره وَ هر چی مسیحی دَره ره تَله دِمبَدِه وُ بیاره اورشلیم.

سولُسِم دمشقِ وَر رایی بَی‌یه. هَنتا اونجِه نَرِسی بی‌یِه کِه، آسِمونِ جِه اَتّا اِسپه سو وِنه دُورّ رِه بَیته و وِئَم بِنِه دَکِتِه. سولُس یِتّا وَنگ بِشتوسِّه که وِرِه باته: «شائول! شائول! چی شیِسّه مِرِه آزار دِنّی.» سولُس بَپِرسِیه: «مِه سَروَر! تِه کی هَسّی؟» عیسی وِرِه جِواب هِدا: « مِن عیسامِه. هَمونتایی که تِه وِرِه آزار دِندی»

اونگِدِر که سولُس شِه جا سَرِ جِه راس بَّیه، هیچ جا رِه نَتّونَسّه بَوینِه. وِنِه رَفِقا وِرِه دمشقِ وَر راهنِمایی هَکِردِنِه. سولُس سِه روزِ آزِگار نا خِراک بَخِرده ، نا اوُ.

حَنانیا اَتّا شاگِرد بی یِه که دَمِشقِ دِله زندِگانی کِرده. خِدا وِرِه بِفَرمِسِّه: « اَتّا سِرِة دِلِه بوُرکه سولُس اونجه دَره، شِه دَس رِه وِنِه سَرِ بالا بِی یِل تا وِنِه چِش سُو دَکِفِه.» مُنتا حنانیا باته: «اَی جان خِدا! مِن بِشتوس دارمه کِه اینتا مَردی چِطی مسیحیا رِه آزار کِرد بی یِه» خِدائِم اینطی جِواب هِدا: « بُور! مِن وِرِه نِشون هَکِردِمِه که یَهودیا و قومایِ دیگة پَلی مِه نوم رِه بَوِرِه. وِه مِه خاطری، خَلِه زار وُ بِلا کَشِنه.»

حنانیائِم سولُسِ پَلی بُوردِه و شِه دس رِه وِنِه سَر بِشتِه و باتِه: «هَمون عیسایی که راهِ دِلِه تِه چِشِ پیش دیار بَّیه، مِه رِه فَرمون هِدا که تِه چِشِ سو رِه رَج هَکِنِم و تِه، روحِ قِدّوسِ جِه پِر بَوّی.» دَر دَم سوُلوسِ چِشِ سُو بیَمو و اونگِدِر حنانیا وِرِه تعمید هِدا. سولوس اَته کَم خِراک بَخِردِه وُ وِرِه جان دَکِتِه.

هَمون آنِم سولوس شِروع هَکِردِه یَهودیایِ دِمِشق رِه دَرس هِدائِن و اینطی گِتِه: «عیسی خِدایِ ریکا هَسِّه» یَهودیائِم خَلِه گِج و مَنگ بیِنِه، چونکِه اونتا آدِم که هَمه کار کِردبی‌یه تا ایماندارا رِه اَز بِین بَوِرِه اِسا شِه عیسی رِه بووِر داشتِه!. سولوس ، یَهودیایِ جا کِلام کَلمه کِرده و وِشونِ رِه نِشون هِدا که عیسی همون مسیح هَسِّه.

چَن روز کِه بوگذِشتِه، یَهودیا خواسّنِه که سولوس رِه بَکوشِن. وِشون اَتّه خَلِه آدِم ره شَهرِ دَروازِه سَر رایی هَکِردِنِه که وِرِه پیدا هَکِنِن و بَکوشِن مُنتا سولُوس وِشونِ نَقشِة جة سَر دَر بیارده و شِه رِفقایِ هِمکِت اونجِه جِه دَر بوردِه. اَتّا شو وِرِه اَتّا سَوِدِ دِلِه بِشتِنِه و شهرِ دیوارِ جِه بِنِه بیاردِنهِ و شهَرِ جِه یور بَوَردِنه. سولُس کِه دمشقِ جِه دَر بُوردِه، عیسایِ خاطری شِه درس هِدائِن رِه پِه بَیتِه.

سولُس اورشلیمِ دِله بوُرده تارَسولا رِه بَوینِه، مُنتا وِشون وِنه جا بَتِرسینِه. هَمونگِدِر اَتّا ایموندار برنابا نوُم ، سولُوس رِه وِشونِ پَلی بَوِردِه. وِه عیسایِ شاگِردا رِه باتِه کِه سولُس، چِطی نِتَرسِا ،دَمشقِ دِلِه سِخِنرانی هَکِردبی‌یه. اینطی بَیّه که رَسولا سولُس رِه شِه دِلِه راه هِدانِه.

اَتی ایموندارا اَندِه کِه آزار بَدی بینِه اورشلیمِ جِه، اَتّا دِرِ شهر که وِنه نوم انطاکیِه بی یه، بوردِنِه وُ هَمونجِم عیسایِ دَرواره ، سِخِنرانی کِردِنِه. اَنطاکیة مَردِم ویشتِرا یَهودی نَیئ بینه ، مُنتا اَوّلِ کَش بی یه کِه ایمون بِیاردِنِه. برنابا و سولُوسِم هَمونجِه بوردِنِه تا تازه ایمونادارا رِه عیسایِ دَروارِه دَرس هَدِن و کلیسا رِه قِد و قوِّت هَدِن. انطاکیهٔ دِلِه بی یه کِه ایموندارایی کِه مسیح رِه بوُوِر داشت بینِه ، اَوّلِ کَش مسیحی باتِنِه.

اَتّا روز انطاکیةِ مسیحیا ، سَرگَرمِ دِعا و روزه بینه که روحِ قِدّوُس وِشونِ دَرواره بِفَرمِسِّه: « برنابا و سولس رِه که اَتّا کارِسّه وِشون رِه انتخاب هَکِردِمِه، ِدیگِرونِ جِه سیوا هَکِنین» اونگِدِر اَنطاکیةِ کلیسا، شِه دست رِه برنابا و سولسِ سَر بِشْتِنِه و وِشونِسِّه دِعا هَکِردِنه. هَمینتاسّه وشون رِه رایی هَکِردِنه تا عیسایِ خَوِرِه خِشِ ره هَر جا بَوِّن. برنابا و سولوسِم هَر تیر و تِوارِ جه اَتّه خَلِه مَردِم رِه درس هِدانه و خَلِه ها عیسی رِه بووِر هَکِردِنه و ایمون بیاردِنِه. کِتابِ مُقَدِسّ جه بَئیته داستان :