۴۵- اِستیفان و فیلیپُس

استیفان اَتّا قَدیمی کِلیسایِ رَهبِر بی یِه کِه هَمِه وِرِه اِحترام اِشتِنِه. روح‌ِ قِدّوس وِرِه توانایی و دونایی هِدا بی یِه. اِستیفان خَلِه موجِزِ هَکِرد بی یِه و خَله هام وِنه سِخِنرانیِ جِه عیسی رِه بوُوِر هَکردِنه.

اَتّا روز که اِستیفان دَی بی یِه عیسایِ دَروارِه دَرس دائِه، اَتِّه یَهودی کِه عیسی رِه بووِر نِداشت بی یه، اِستیفانِ جا بِگو مَگو هَکِردنِه. وِشون خَلِه بَرزِق بَئینه، و پیشواهایِ دینیِ پَلی اِستیفانِ خَوِری دِراغ باتنه کِه: «اِما بِشتوسِّمی کِه وِه ، موسی و خِدایِ دَروارِه بَد بَدِ گَپْ زوئِه.» هَمینتایِ وِسِّه پیشواهایِ دینی، اِستیفان رِه گیر دِمبِدانه وُ وِره گَتِ پیشوا و رَهبرایِ یَهودیِ پیش بَوِردِنه. اَتّی دیگِم دِراغی شاهدا ویشتر بَئینِه و وِنه خَوِری دِرو بَزّونه.

گَتِ پیشوا اِستیفانِ جِه بَپِرسیِه: « این گَپا که وِشونْ تِه خَوِری گِننِّه، دِرِسّه؟» اِستیفان اینتا پِرسِشِ جِوابِسّه، گَتِ پیشوایِ وِسِّه خَلِه گَپْ بَزو. وِه باتِه کِه خِدا اِبراهیمِ دورِه تا عیسایِ دورِه، خَلِه گَتْ گَتِ کار یَهودیای وِسّه هَکِردِه، مُنتا اینتا قُوم هَر کَشْ وِنِه جِه نافَرمونی هَکِردِنه. اِستیفان شِه گَپِ پِه بَیتِه ُو وِشونِ باته: « شِما خَله چَموش وُگِردِن دَکِتِ قومِ هَسّنی و خِدایِ رو دَر رو اِس کِنِنی. شِما هِچْ زَمونْ روح‌ِ قِدّوس رِه نِخواسِّنی، دِرِس هَمونطی کِه اَمِه پیِ یِرون خِدا رِه رَد هَکِردنِه و وِنه پَیغومبِرا رِه بَکوشتِنِه شِما ئم وِشونِ تونْ بَدتِرِ هَکِردِنی، شِما مَسیحِ رِه بَکوشتِنی!»

اونگِدِر که پیشواهایِ دینی این گَپا ره بِشتوسّنه وِشون ره خَله غِظ بیته، شِه گوش ره بَیْتِنه و شونْگ بَکِشینِه. وِشون اِستیفان رِه شَهرِ جِه یور بَوِردِنه و وِرِه سَنگِ روُش هَکِردِنه تا بَمیرِه.

اِستیفان ،جانِ کِنّونِ ماقعْ وَنگِ وا هَکِرده : «عیسی جان! مِه روح رِه شِه وَر بَوِر» هَمونگِدِر زانو دَکِتِه وُ اَیِم وَنگ وا هَکِرده: «ای خِداوند! اینتا گِناه رِه وِشونِسّه نَنِویس» و جان دَر هِدا.

اون روز اَت خَله اورشَلیمِ مَردِمون ُعیسایِ یارایِ آزار هِدائِنْ ره اَز سَر بَیتِنه و هَمینتاسّه ایماندارام این وَر وُ اون وَر رَت وُ رَم بَئینه. مُنتا وِشون اَتّنِه پیشآمِدِ رِه که بَدینِه اَیِّم هَر جا که شینِه عیسایِ دَروارِه سِخِنرانی کِردِنه.

فیلیپُس که عیسایِ اَتّا شاگِرد بی یِه،وِئِم هَمونگِدِر ایماندارایِ هِمکِت آزار وینّسِه ،هَمینتاسّه اورشَلیمِ جِه دَر بَوِردْ بی یِه. وِه سامِرِه بُوردِه، اونجِه عیسایِ دَروارِه دَرس هِدا و اونجِة مَردِمون خَلِه ها نِجات پییدا هَکِردِنه. اَتِّه روز، اَتّا فِرِشته خِدایِ وَری فیلیپُس رِه فَرمون هِدا کِه بیابونِ دِلِه اَت جادِه ُبورِه. هَمونگِدِرکه وِه اونتا جادة دِله دَیییِّه، یِتّا گَتِ مَردیِ حَبَشِه رِه بَدیِه کِه شِه ارابِة جا سَفِر کِردِه. روح‌ِ قِدّوس فیلیپُس رِه بِفَرمِسِّه مَردیِ پَلی بُورِه و وِنِه جا گَپْ بَزِنه.

فیلیپُس کِه اَرابِة تَنِ وَر بُورْدِه، بِشتوسِّه که اونتا حَبِشیِ مَردی دَرِه اِشعیای نَبیِ کِتاب رِه خوندِنِه. اونجِه که گِنه: «گِسفِنِ وَنِکِت که خوانِنه وِره بَکوشِن و اونتا وَرة واری که شِه پَشم تاشِ پَلی چِمِر نَکِندِه، اَتِّه کَلوم گَپ نَزّوُ. وِنه جا بَد تا هَکِردِنِه وَ وِنه اِحترام ره نِداشتِنه. وِشون وِنه جان رِه بَیتِنه.»

فیلیپُسْ حَبِشی مَردیِ جِه بَپِرسیِه: « اون بَنوِشتِ که دَرِی خوندِی تِرِه هالی بوُنِه؟» حَبِشی جِواب هِدا: « نا. مِرِه هالی ناُنهِ مَگِر اینکِه اَتِّ کَس مِسِّه شَرح هَدِه تِه جا خوامّه که بِئی مِه وَر هِنیشی. اِسا مِرِه باُو که اِشْعَیا وِرِه شِه دَروارِه گِنِه یا کِه اَت کَسِ دیگهِ دَروارِه ؟»

فیلیپُسِم بوردِه اَرابِه دِلِه وُ وِنه وَر هِنیشته، اونگِدِر حَبِشی وِسِّه شَرح هِدا که اِشعَیا اینتا بَخش رِه عیسایِ خَوِری بَنوِشته. فیلیپُس ،ویشتِرِ جایِ خِدای کِلامِ ره وِنِسِّه شَرح هِدا و عیسای اِنجیلِ پَیغومِ رِه وِرِه هِدا.

فیلیپُسْ و حَبِشی مَردی هَمینطی کِه شینِه، اَتّا اِنْدونِ وَر بَرِسینِه. حَبِشی مَردی باتِه : «هارِش اینجِه اُو دَرِه! بوُنِه تَعمید بَیرِم؟» و شِه خِدمِتکار رِه فَرمونْ هِدا کِه ارابِه هَمونجه اِس هَکِنِه.

اینطی بَییِّه کِه وِشونْ اُویِ دِلِه بورْدِنِه و فیلیپُسْ حَبِشی مَردی رِه تَعمید هِدا. اُویِ جِه کِه یور بیَمونِه، روح‌ِ قِدّوس ناگِمونی فیلیپُسْ رِه اَتِّ جا دیگِه بَوِردِه. فیلیپُسْ هَمونجِم عیسایِ خَوِری شِه سِخِنرانی رِه پِه بَیتِه.

حَبِشی مَردی شِه راه رِه شِه سِره وَر اِدامه هِدا. وِه چون عیسی رِه بِشناسیِّه خَلِه خِشال بی یِه.