۴۴- پترس ویوحنا اَتّه گِدا مَردی ره شِفا دِنّنِه

اَتّا روز پترس وُ یوحنا پَرِستِشگاهِ وَر شینِه. کِه دِروازه سَر اَتّا چِنگ و چِلِخِ مَردی رِه بَدینِه کِه گِدایی کِردِه.

پترس چِنگِ مَردی رِه هارشیِه و باتِه: «مِن پول نِدارمه که تِرِه هَدِم. مُنتا هَرچی دارِمِه تِرِه دِمبِه. عیسای نومِ جا، هِرِس وُ راه بور!»

خِدا همونگِدِر مَردی ره شِفا هِدا و مَردی راه دَکِته و وِشونِ دوُر وُ وَر خَندون و خِشال خِدا ره پَرِستِش کِرده. اون مردِمِم که پَرِستِشگاه دِله دَئی بینِه، مات بَمونِسّنِه.

اَت خَلِه مَردِم دوُ هَئیت جَم بَیّنِه تا شِفا بَیتِه مَردی ره بَوینِن. پِتُرس مَردِم رِه باتِه: «اینتا مَردیِ شِفا بَیتِنِ جه یِکّه نَخِرین اِما شِه تِوان و دینداریِ جا وِرِه شِفا نِدامی. اینتا، عیسایِ تِوانِ هَسِّه که وِره شِفا هِدا، چونکه اِما وِره بوُوِر دارمی.»

«شِما هَمونایی هَسِّنی که رومی فَرماندارِ جه بِخواس بینی عیسی ره بَکوشه. اونتا آدِمی کِه هَمِه رِه جان بَخشیه رِه بَکوشتِنی، مُنتا خِدا وِرِه مِردِه های دِلِه جه زندِه هَکِردِه. دِرِسّه کِه شِما نَدونِسِّنی دَرنی چیکار کِنِنی ،مُنتا پَیغُمبِرایِ پیشگویی ره سَر اَنجام هِدانی که بات بینه مَسیح وِنه زَجر بَکِشه و بَمیره. خِدا بِخواسّه اینطی بَوّه. هَمینتا سّه توبه هَکِنین و خِدای وَر دَگِردین، تا وِه شِمِه گِناها رِه پاک هَکِنِه.»

پَرِستِشگاهِ پیشواها که پِترُس و یوحنایِ گَپا ره بِشتوسِّنه خَله بَرزِق بَئینه. هَمینتاسِّه وِشون ره بَیتِنه و زندون دِمبِدانه. مُنتا اونایی کِه پِترُس پَیغوم ره بِشتوسِّنه خَلِه ها ‌ایمان بیاردِنه، و ایماندارا ۵۰۰۰ تِن بَئینه.

اَتّه روز بُگذِشتِ په، گَتای یَهود، پِترُس و یوحنا ره چِنگِ مَردیِ هِمکِت ، گَتِ کاهِنِ و گَتای دینی پیش بَوردِنه. وِشون پِترُس و یوحنایِ جِه بَپِرسینه:« کِمینتا تِوان جا چِنگِ مَردی ره شِفا هِدانی؟»

پِترس جِواب هِدا: «اینتا مَردی که شِمِه پیش اِس هَکِردِه عیسای مَسیحِ تِوانِ جا شِفا هَیتِه. شِما عیسی ره صلیبِ دار بَکِشینی، مُنتا خِدا وِره دِواره زِنده هَکِرده! شِما وِرِه رَد هَکِردِنی، مُنتا نجاتِ وِسِّه عیسایِ تِوان بَکِته هِچ راه دیگه دَنی یِه !»

پیشواهایِ دینی ، پِترُس و یوحنایِ دِلِریِ جه مات بَمونِسِّنه وُ یِکّه بَخِردِنه،چونکه وِشون بیسِواد بینه وُ سادِه چَم. هَمونگِدِر وِشونِ یاد بیَمو کِه این آدِما ،عیسای هِمکِت دَیْ بینه. همینتاسِّه وِشون ره باتِنه:« اگِه دِوارِه عیسای دَروارِه مَردِمِ جا گَپ بَزِنین شِمه سَر بِلا ایارمی.» وِشون پِترس و یوحنا ره تَرس وُ تُو هِدانه پِه، وشون رِه رِها هَکِردِنه. کِتابِ مُقَدِسّ جه بَئیته داستان :