۴۹- خِدایِ نو پِیمون

اَتّا فرِشتِه، یِتّا جِوونِ کیجا ،مَریِم نوم رِه باتِه که وِه ،خِدایِ ریکا رِه دِنیا ایارنِه.مَریِم که دَس نَخَردِه کیجا بی یه،روحِ قِدّوس شِه وایِ جه وِره آبِسِّن هَکِرده. وِئم اَتّا ریکا بَکِردِه وُ وِنه نوم رِه عیسی بِشتِه. هَمینتاسّه عیسی هَم خِدا هَسّه و هَم اِنسون.

عیسی خَلِه موجِز هَکِرده کِه نِشون دِنّه وِه خِدا هَسّه.وِه اویِ سَر راه بوردِه،توفان رِه رام هَکِردِه، خَلِه ناخِشایِ دَردِ دِوا هَکِردِه ، خَلِه دِب بَزِّه هایِ جِه ناپاک اِراوح رِه دَر هَکِردِه،مِردِه ها رِه زندِه هَکِردِه، پنج تا نون و دِتا کِچیک ماهی رِه فِراوونی هِدا و ۵۰۰۰ تَنِ بِتیم ره سِر هَکِردِه.

عیسی ،گَتِ آموزِگار بی یه.وِنِه دَرسا هَمِه راسّ وُ دِرِس بی یه.مَردِمِم ، هَر چی کِه وِه یاد بِدائه رِه وِسّه کِه هَکِرد بوُن، چونکِه وِه خِدایِ ریکا بی یه. نِمونِة وِسّه ، یاد دائه کِه وِنِه دیگِرون رِم شِه وَنِکِت دُوس داریم.

وِه اَی وِشون رِه یاد بِدا که خِداوند رِه ، وِنِه هَمه چیِ تُون ویشتِر دوس دارِن ، شِه دار وُ نِدارِ تون، ویشتَر.

عیسی باته کِه خِدایِ پادِشاهیِ دِله دَیّیِن ،هَر چی که دِنیا دَرِة تون،اَرزِش دارتِرِه. خِدایِ پادِشاهیِ دِلِه بُوردِنِ وِسّه، وِه ،وِنِه که تِره تِه گِناهایِ جِه آزاد هَکِنِه.

عیسی باته کِه اَتی آدِما وِرِه بُوِور کِنِنِه، هَمون ماقه هَسّه که خِدا وِشون رِه رِهایی دِنّه، مُنتا هَمِه وِرِه نِخوانِنِه.اَیِم باته کِه اَتی آدِما خارِه خاکِ واری هَسِّنِه،چونکِه عیسایِ خَوِر خِش رِه بُوِور کِنِنِه و خِدام وِشون رِه رِهایی دِنّه.اَتیِم سَنگِ کَتِک جادّه کِنارِ وَنِکِت هَسّنِه. وِشونِسّه خِدایِ کِلام اونتا تیم رِه موندِنه کِه کَتک سَر کَفِنِه،مُنتا هِچ بار نیارنه..وِشون هَمون مَردِمی هَسّنِه کِه عیسایِ پَیغوم رِه اِشتونِنه مُنتا رَد کِنِنه و نِخوانِنِه خِدایِ پادِشاهیِ دلِه بورِن

عیسی وِشون رِه یاد بِدا کِه خِدا گِناهکارا رِه خَلِه دوس دارنِه. وِه خوانِه کِه وِشون رِه بِبَخشِه وُ شِه وَچِه بَدونِه.

عیسی اَیِم وِشون رِه باته کِه، خِدا گِناهِ جِه بَد دارنِه. آدِم و حَوّاِیِ گِناهِسّه وِشونِ تِوارِم گِناه کِنِّنِه. هَمینتاسّه، هَمه دِنیایِ دِلِه گِناه کِنّنِه و خِدایِ جِه سیوا بونِنِه. هَمه خِدایِ دِشمِن هَسِّنِه.

مُنتا خِدا اَنده هَمِة آدِمایِ دِنیا رِه دوس داشتِه کِه شِه اَتّا ریکا ، عیسی رِه فِدا هَکِردِه تا هَرکَس کِه وِرِه بوُوِر هَکِنِه شِه گِناهِسّه سِزا نَوینِه کِه هّچی تا اَبِدِم خِدایِ هِمکِت زِندِگانی کِندِه.

شِمه گِناه هَکِردِنِسّه، شِمِه سِزا مَرگ هَسّه. خِدا وِنِه کِه شِمه جِه خَشم بَیره ، مُنتا چونکِه عیسی صَلیبِ دارِ تَن بوردِه و بَمِردِه، هَمِة گِناهِ سِزا رِه شِه گِردِن بَیتِه.

عیسی هیچ زمون گِناه نَکِردِه، مُنتا گِس هِدا کِه اِنسونِ گِناهِایسِّه جِزا هَیرِه. اَنده که سنگینتِرین جِزا کِه مرگ هَسّه رِه شِه گِردِن بَیتِه. هَمینتاسّه وِه دِرِسّه قِربونی بی یه تا شِمه وَ دِنیایِ دلِة آدِمایِ گِناهها رِه بَشورِه و پاک هَکِنِه. چونکِه عیسی شِه خِد رِه قِربونیِ وَنِکِت خِدا رِه پیشکَش هَکِردِه، اینطی خِدا تِمومِ گِناها، تا اونجه که آدِمایِ بَدتِرین گِناها رِم که وِرِه بوُوِر دارنِنه رِه بَخشِنِه.

بَدونین که شِمِه خارِ کارم نَتونّه شِما رِه رِهایی هَدِه. هِچ کاری دَنییِه هَکِنین تا شِمِه دوستی دِوارِه اَز سَر بَیرِه. وِنِه بَدِل وِنِه که بوُوِر هَکِنین ،عیسی خِدایِ ریکا هَسّه و شِمه جا سَر صَلیبِ دار بالا بَمِردِه و خِدا دِوارِه مِردهایِ جِه وِره زِندِه هَکِردِه. اَگِه اینتا حَقیقِت رِه بُووِر هَکِنین خِدام شِمِه تِمومِ گِناها رِه بَخشِنه.

خِدا هَر کَس کِه عیسی رِه بُووِر هَکِنِه وُ وِرِه شِه خِداوند بَدونِه ره نجات دِنِّه. مُنتا خِدا آدِمایی کِه عیسی رِه بوُوِر نَکِنِن و وِرِه ایمون نیارِن، نِجات نَدِنِه. وِه نِشِنه کِه نِدارهَسّی یا دارا، مَردی یا زَن، پیری یا جِوون و یا کِجَه ایی هَسّی. خِدا شِما رِه دوس دارنِه و خوانِه کِه عیسی رِه بُووِر هَکِنین تا وِئِم بِتّونِه شِمِه جِا دوسّی دَوِنده و شِمِسّه خارِ رَفِق بَوّه.

عیسی شِمِه جِه خوانه تا وِرِه بوُوِر هَکِنین و تعمید بَیرین. اِسا شِما بُووِر دارنِنی کِه عیسی هَمون مَسیحِ وَعدِه بَئي هَسّه و خِدایِ تِنا ریکا هَسّه؟ بُووِر دارنِنی کِه گِناهکار هَسِّنی وُ وِنِه کِه خِدا شِما رِه سِزا هَدِه؟ بُووِر دارنِنی کِه عیسی صَلیبِ دارِ تَن ، بَمِردِه تا شِمه گِناها ره بَشورِه وُ پاک هَکِنِه؟

اَگِه عیسی و هَر چی کِه شِمِسّه هَکِردِه رِه بوُوِر دارنِنی، اِسا شِما مَسیحی هَسِّنی! اِسا دیگِه شیطون شِه سیو پادِشاهیَ دِلِه شِمِه سَر بالا دَنی یِه و شِمِه سَر فَرمونرِوایی نَکِنده . اِسا خِدا شِه نورانی پادِشاهیِ دِلِه شِمِه سَر بالا دَرِه.خِدا شِما رِه تِوانایی هِدا تا قَذیمایِ واری گِناه نَکِنین و چِطی پاک و دِرِس زندِگی هَکِردِن رِه شِمارِه یاد بِدا.

اَگِه مَسیحی هَسِّنی،خِدا شِمِه گِناها رِه عیسایِ کارِسّه بِبَخشیه. اِسا خِدا شِما رِه شِه خارِه رَفِق دُوندِه نا دِشمِن.

اَگِه خِدایِ رَفِق هَسِّنی وُ خِداوند عیسی ره خِدمت کِنّنی.شِمه دِل خوانه کِه عیسایِ دَرسا ره پِه بیرین. دِرِسّه کِه مَسیحی هَسّنی، شیطون اَیِم شِمِسّه سوسِه اِنِه تا گِناه هَکِنین. مُنتا خِدا هَمیشِک شِه گَپِ سَر اِسّتِنه . وِه فَرمِنِه اَگِه شِه هَکِردِه گِناها رِه شِه تِکِ جا بَوّین، وِه شِما رِه بَخشِنه و شِما رِه تِوان دِندِه تا گِناهِ رو دَر بِیین وُ وِنه جِه سَر شاخ بَوّین.

خِدا شِما رِه گِنِه کِه دِعا و نیایِش هَکِنین و وِنِه کِلام و کِتاب رِه بَخونين. وِه اَیِم شِما رِه گِنِه کِه مسیحی هایِ دیگِة هِمکِت وِره پَرِستِش هَکِنِین و دیگِرون رِه بَوّین کِه شِمِسّه چیکار هَکِردِه. اَگِه هَمِة اینکارا رِه هَکِنین، شِما و خِدایِ میونِ اَتّا دوستی دَوِس وونه، موندِسّگار. کِتابِ مُقَدَسِ جِه بَئیته داستان :