۵۰- عیسی اَی گِردِنِه

۲۰۰۰ سالی بونه کِه دِنیایِ آدِما ، خَوِرِ خِش اِنجیل عیسایِ مسیح رِه اِشتونِنِه. کِلیسا دَییِّه روُش گیته. عیسی مُژدِه هِدا بی یِه کِه آخِر دِنیا دِوارِه بَرگِردِنِه. دِرِسِّه که عیسی هَنتا نیَمو، مُنتا شِه گَپِ سَر اِسّنِه و شِه وَعدِه رِه وِفا کِندِه.

خِدا اَمِه جِه خوانِه هَمینطی کِه مسیحِ دَگِرِسِنِ وِسِّه چِش بِه راه هَسِّمی، پاک زِندِگانی هَکِنیم َو وِنِه ارزش ره بَدونیم. اَی وِه اَمِه جا خوانِه کِه وِنِه پادِشاهیِ دَرواره هَمِة مَردِمِ جا گَپ بَزِنیم.مَسیح اونگِدِر کِه دِنیایِ دِله زِندِگانی کِرده، اینطی بِفَرمِسِّه: «مِه شاگِردا خَوِرِ خِشِ پادشاهی خِدا رِه هَمِة دِنیاِیِسّه گِنِنه، اونگِدِر آخِر دِنیا رَسِنِه.»

خَلِه قوما دَرِنِه کِه عیسایِ دَروارِه هَنتا هیچی نِشتوسِّنِه. مَسیح هَنتا آسِمون نَشی بی یه، مَسیحیا رِه بِفَرمِسِّه تا اینتا خَوِرِ خِش رِه اَتَنده آدِمایِسّه که هیچ زَمون نِشتوسِّنِة گوش بَرِسِنن. عیسی بِفَرمِسّه: «بُورین و هَمِة مَردِمِ دِنیا رِه مِه شاگِرد هَکِنین، چونکِه وِشونِ دِل اَتّا دَشتِ وَنِکِت بِتاشیِنِ وِسّه آمادوئِه.»

عیسی اینتارِم باته کِه: «خِدمِتکار ، شِه اِربابِ تون بالاتِر نی یِه. هَمونطی کِه دِنیایِ اِربابون مِه جِه بَد داشتِنِه، شِمارِم مِه خاطِری شِکِنجِه کِنِنِه و کِشِنِنِه. این دِنیایِ دِلِه دَرد و رَنج کَشِنِنی مُنتا شِمِه دِلِ دِلِه اُو تِکون نَخِرِه، چونکِه مِن این دِنیایِ پادِشاه کِه شیطون هَسّه رِه بِنِه بَزّومه. اَگِه تا آخِر مِه جا وِفا هَکِنین، اونگِدِر خِدا شِما رِه رِهایی دِنِّه.!»

عیسی شِه شاگِردایِ وِسِّه اَتّه داستان باتِه، تا وِشون ره هالی هَکِنِه کِه آخِرِ دِنیا مَردِمِ سَر چِه بِلا اِنِه. وِه باته: «اَتّا مَردی شِه زَمینِ دِلِه خارِه تیم دِکاشتِه. اون ماقه که بَخِت بی یه ، دِشمِن بیَمو وُ وِنِه گَنّمِ تیمِ دِل به دَله عِلِفِ تیم دِکاشتِه وُ شِه راه رِه بَیتِه ، بُوردِه.

تیما کِه نوچ بَزّونِه، اونتا مَردیِ کارگِرا باتِنِه: «اَی آقا، شِما که خارِه تیم زَمینِه دِلِه دِکاشتِنی! چی شیسِّه وِشونِ دِله عَلِف نوچ بَزّو؟» اونتا مَردی جِواب هِدا: «اینتا کار،مِه دِشمِنِونِ جِه بَر اِنّه. مِه اَتّه دِشمِن اینتا کارِه هَکِردِه.»

کارِگِرا شِه اِرباب رِه جِواب هِدانِه: «اِسا گِنی عَلِفا رِه وِنه وِجین هَکِنیم؟» اِرباب دَر جِواب باتِه: «نا اَگِه اینتا کارِه هَکِنین اَتی گَنّما رِم وِجِنِّنی . تا بِتاشیِن لَس هَدین وُ اونگِدِر عِلف رِه تَش بَزِنین، مُنتا گَنّما رِه مِه اِمبارِه دِلِه بیارین.»

شاگِردا نَیتِنه کِه اینتا داستان، چِشی ره خوانِه بَوِّه و مَسیحِ جه بِخواسّنِه تا داستان رِه وِشونِسّه قِشَنگ رُوشِن هَکِنِه. عیسی باته: «اونتا مَردی کِه خارِ تیم دِکاشتِه، مَسیح هَسّه. دَشت وُ لَتِکا هَمین دِنیا هَسّه و خارِه تیم اونتا مَردِمی هَسِّنِه کِه خِدایِ پادِشاهیِ دِلِه دَرِنِه.»

عَلِف اون آدِمایی هَسّنِه کِه شَرِّنه و شیطونِ وَر دَرِنه. اونتا مَردیِ دِشمِن هَمونتایی هَسّه که عَلِفِ تیم رِه دِکاشتِه، وِه هَمون اِبلیس هَسّه. بِتاشیِن ماقِه آخِر دِنیا هَسّه، و فِرِشتِهام هَمون گَنِّم تاشا هَسِّنِه.

دِنیا کِه آخِر بَرِسِه، فِرِشتِه ها اون آدِمایی کِه اِبلیسِ وَر دَرِنِه رِه ، تِمومِ دِنیایِ جِه اَتّه جا جَمع کِنّنِه و تَشِ دِریاچة دِلِه دِم دِنّنِه. اَتّه جا هَسّه کِه زار و بِلایِ جِه بِرمِه زاری کِننِه اَندِه که وِشونِ دَندون چِرَکِ چِریک کِنده. مُنتا پَریزکارا کِه عیسیِ دِمبال بوُردِنِه، شِه پی یِرِ پادِشاهیِ دِلِه اِفتابِ واری سو سو زَنّه.

عیسی اَی هَمطی باته کِه این دِنیا تِموم نَیّیِه پِه وِه دِوارِه بِنِه اِنِه. وِه هَمونطی کِه زمین رِه تَرک هَکِردِه، دِواره بَرگِردِنِه، اینطی کِه اَمِه واری تَن دارنِه و اَبرِ دِلِه آسِمونِ جِه بِنِه اِنِه. عیسی دَگِرِس پِه هَر مَسیحی کِه بَمِرد بی یه ،دِوارِه زِندِه بوُنِه و وِرِه آسِمونِ دِلِه وینِده.

مَسیحیایی کِه هَمون زَمون زِندِه هَسِّنِه، وِشونِم آسِمون شونِنِه و مَسیحی هایِ دیگِة پَلی شوننه کِه مِرده های دلهٔ جه زِندِه بَئینِه، هَمِه تایی هَمونجِه عیسایِ پَلی دَرِنِه وُ عیسی شِه قومِ پَلی زِندِگانی کِندِه. وِشون هَمیشِک آسایِش دله هِدی جا زِندِگانی کِنّنِه.

عیسی وَعدِه هِدا، هَر کَس کِه وِرِه بوُوِر هَکِنِه، وِرِه اَتّه تاج بَخشِنِه. وِشون خِدایِ هِمکِت تا هَمیشِک هَمِه چیِ سَر فَرمونرِوایی کِنِّنِه وَ هَمیشِک آسایِش دارنِنه.

مُنتا خِدا اونایی کِه عیسی رِه بوُوِر نَکِردِنِة جِه، حِساب کَشِنِه. وِه وِشون رِه تَشِ دِلِه دِم دِنِه. هَمونجِه ایکِه هَمیشک بِرمِه کِنّنِه و دَنّون چِریکه دارنِنه و دَرد کَشِنِنِه. اون تَشِ دِلِه کِه هیچ زَمون خاموش نانِه، وِشونِ پِتکا بونِنِه وُ اَجیکِ وِشونِ بَخِردِنِه جِه سِر نَوونه.

عیسی دَگِرِس پِه، شیطون و وِنِه فَرمونرِوایی رِه اَز دَم نیست و نابود کِندِه. شیطونِم تا اَبِد هَمونایِ هِمکِت کِه خِدایِ جا سَر وِنِه دِمبال بوردِنِة واری تَشِ دِلِه پِتکا بونِنِه وُ سوزِنِنه.

آدِم وُ حَوّایِ نافَرمونیِ جِه بی یه که گِناه دِنیایِ دِلِه بیَمو، هَمینتاسّه خِدا دِنیا رِه نَفرین هَکِردِه و بِخواسِّه تا وِرِه نابود هَکِنِه. مُنتا اَتّه روز خِدا نو آسِمون و نو بِنِه دِرِس کِندِه کِه هِچّی کَم نِدارنِه.

عیسی وُ وِنِه مَردِم، نو بِنة سَر زِندِگانی کِنِّنه، و وِه تا هَمیشِک هَمه چیه سَر ، پادِشاهی کِندِه. وِه مَردِمِ چِشِ اَسلی رِه پاک کِندِه. دیگِه نا داغ وینده و نا هیچکَس دَرد کَشِنِه. وِشون هیچ زَمون بِرمِه نَکِنِنِه، هیچکَس ناخِش ناُنِه و نَمیرنِه. هچی اونجه نَخِش نی یه و عیسی عدل و دادِ جا شِه پادِشاهیِ دِلِه، فَرمونرِوایی کِندِه. همه چی نوُ بَئی په وِه شِه قومِ جا تا هَمیشِک زِندِگی کِندِه. کِتابِ مُقَدِسّ جه بَئیته داستان :