۱۰- دِه بِلا

خدا ب موسی و هارون نِ هُشدارَ شادا کُ فرعون سرسخت کیمیم بُ. موسی و هارون پَلی فرعون بُشتِندَ و بَشُنوات: «نِ پِیامِ خدای اسراییلَ تو را: قوم مَ رَها کَ بِشِندَ. »فرعون ب حرف نُمین اعتناییش نِکَ و یاغا نِ کُ قوم بنی اسرائیل آزاد کِرِ، نُمینِش مجبور کَ از قَبل ویشتَر کار کِرِندَ.

فرعون هَنی جی از رِها کَردنِ قومِ بنی اسرائیل سَرپیچیش شَکَ. نِ خاطر را خدا دَه بِلای وَحشتناک مصر دِ نازلِش کَ. از طِریقِ نُ بِلاعون، خدا ب فرعون نُشونِش دا کُ قُدرتِش از فرعون و پاکِ خدایونِ مصر ویشتَرَ.

خدا اُووِ رودِ نیلِش به خین واشگَردَنا. ولی فرعون هَنی جی، قَومِ اسرائیلِش رِهاش نِکَ.

خدا پاک سرزمینِ مصر از وِزَغ پُرِش کَ. فرعون از موسی درخواستِش کَ کُ وِزَغون از سرزمینِشون دور کِرِ. ولی بَدِ نِ کُ وِزَغون از بین بُشتِندَ، دل فرعون سخت تر آبُ ب نُمین اجازَشون نَدا مصر دِ بَرشِندَ.

پَس خدا بِلای پَشَ و بَدِ نُ مَگَسِش بِکینا. فروعن ب موسی و هارونِش بُوا کُ اِگَ نِ بِلا دور کِرِندَ، ب نُمین اجازَ کیمی دا تا مصر دِ خارِج بِندَ. بَدِ دعای موسی، خدا نِ بِلاعون دورِش کَ، ولی فرعون قلب خوش سختِش کَ و دوبارَ ب نُمین اجازَشون نُدا مصر دِ خارج بِندَ.

بَدِ نُ، خدا کاریش کَ تا پاکِ حیوونون مصریگَل بیمار بِبِندَ و بِمیرِندَ. ولی قلب فرعون سخت بُبُدِ بُ و نِ بارَ جی نُمین اجازِ خر‌وجِشون نُدا.

خدا ب موسی ش بُوا مُشتونِش از خاکستر پُرکِرِ و جِلِیِ فرعون هوا دِ پَخش کِرِ. وقتی موسی نِ کارِش کَ، پاکِ مردم مصر ب جز اسرائیلیون دُچار تاوَلون دردناکی بُبُدِندٕ. اما خدا قلب فروعونِش سخت کَ و فرعون اجازَش نُدا کُ نُمین بِشِندَ.

بَدِش خدا بِلایِ تِگَرگِش بَشکینا و ویشتَرِ محصولون و پاک جونورونی کُ هوای آزاد بُدِندَ بین دِ بَشُن بَ. نُ وَقتی فرعون، موسی و هارونِش فَراش خوند و بَشوات: «مَ نِ قَرتَ گنام کَ شُمَ آزادیَ کُ بِشیَ.» بَدِش موسی دعاش کَ و بارونِ تِگَرگ بَند اَمَ.

ولی فرعون دوبارَ گناهِش کَ و قلبِ خوش سَختِش کَ و اجازَش نِدا کُ اسرائیلیون آزاد بِبِندَ.

نِزِینی بُبُ کُ خدا ایی گَلَ مَلَخ به سرزمین مصر بَشکینا. نُمین پاک محصولونی کُ از بلای تگرگ باقی بِمَندِ بُدِندَ، بَشُنخَ.

بَدِش خدا بلای تاریکی بَشکینا کُ سه روو طولِش کِشا. پاکِ یاغا نِزَ تاریک بُبُدِ بُ کُ مصریون نَشُ اَتونا کییَ دِ بَر اوورِندَ. ولی یاغایی کُ اسراییلیون زندگی شُ اَکَ روشنایی بُ.

حتی بَدِ نُه بِلا، فرعون ب اسرائیلیون اجازَشون نِدا کُ بِشِندَ. از یاغایی کُ فرعون گوش شِنِواش نِدَ، خدا قَصدِش کَ کُ آخرین بَلا جی بِکینه. نِ بِلا باعث اَبِ کُ فرعون تصمیم خوش عوض کِرِ.