۱۱- عید پسخ

خدا موسی و هارونِش بَشکینا فرعون را کُ بیش بُواجِندَ تا اسرائیلیون آزاد کِرِ. نُمین ب فرعون اخطارشون دا کُ اگِ قومِ اسرائیل آزاد نِکِرِ خدا پاکِ پیرِ اَوَّلی گَل وپاکِ حیوونونِ مصر نابود کیمی کَ. وَقتی کُ فرعون نِ بَشَشنُفت، باورِش نِکَ و دوبارَ جی از دستور خدا سرپیچیش کَ.

خدا نُمینِ را کُ ایمانشون دَ، ای راهی بَشسات تا پیرِ اوّلی گَل نِ بٌلا دِ نجات یابِندَ. هر خونواده ای اِیگا ای بَره بی عیب انتخاب کِرِندَ و قُربونیش کِرِندَ.

خدا ب قَومِ بَنی اسرائیلِش بُوات کُ خینِ وَرِگَل اطرافِ بَرِ کیه گَلِشون بُمالِندَ. نُمین اِیگا گوشت نُ بَرِهَ بریون بِکِرِندَ و هادِ نونِ بدون هِمیر مایَ ب سرعت بَشُن اَخَ. خدا ب نُمینِ بُوا کُ آمادَ بییَ تا بعدِ خوردنِ نُ، جَلی مصر ترک کِریَ.

اسراىیلیون پاکِ دستورونِ خدا خیلی با دقت اِنجامِشون بُدا. نِصفِ نُ شٌِیو، خدا از مصر دِ عبورِش کَ پاکِ پیرِ گُردُ و ارشدِ مصریگَل از بین د بَش بَ.

خدا ازپاکِ کیهِ گَلِ قَومِ اسرائیل کُ نُشونِ خین بر کییَ شُن دِ بُ عبور شُ اَکَ. پاکِ آدِمونی کُ نُ کیَ دِ بُدِندَ، نِ خاطر خینِ وَرَدر اَمان بُدِندَ.

ولی خدا از بِغَلِ کیِ مِصریگَلی کُ ب خدا ایمانشون نِدَ و اژ دستورونِ خدا پیرُویشون نَکَ عبورِش نَکَ و پاکِ پیرِ ارشدون نُمین را بَشکُشت.

پیرِ اَوَّلِ پاکِ مصریون بِمَردِندَ. پیرِ گُردِ فرعون بَشگیَتَ تا پیرِ گُردِ نُ غلامی ک زندون دِ بُ. خیلی از مردم مصر نِ خاطِرِ غم و غُصه ای کُ اَشُندَ، گریه و زاری شُ اَکَ.

فرعون نُ شِیوَ دِ، موسی و فرعونِ فَراش خوند و بَشوا: «قومِ اسرائیل آرگی و جلی از مصر بِشیَ بَر.» مصریون جی ب نمُین اصرارشون کَ کُ جَلی نِینِ ترک کِرِندَ.