۲۲- یوحنایِ تعمید وِرَنی تولدِ

از قَدِم طارِه اَنبیالَر طریقِنَّن اِز قُومینَن دانُوشیردِ. آمّا دِرد ایز ایلَّن سُورا که طارِه اِز قُومینَن دانُوش ماموُشِدِ، بیردَن طارِنی فرشتَسِه قُوجا کاهنَ که آدِ زکریایدِ ظاهر اُلِّه. اُ و آروادِ الیزابت، اینسانلَری دِلَر که طارِدَن قُورخیلّارِدِ. اُلّار قَرِّمیشِدِلَر و الیزابت اُشاقلِه اُلمِیردِ.

طارِنی فِرشتَسِه زکریایَ دِدِ:« سَنی آروادی بیر اُغُل دُوقار. سَن اُنی آدِنِه یوحنا قُویارای. طارِه اُنِه اِز روحِنَّن دُولُّرار و یوحنا خَلخِ مسیح موعود گَلّیگِچِه آماده اِدَر.» زکریا جوابِنَّ دِدِ:« من و آروادُوم اُشاق گَتِردیگِچِه چُخ قَرّی یَگ! نَتَرکِه بیلَم که مَنَ گَرچَگ دِیرَی؟

طارِنی فِرشتَسِه زکریایَ جواب وِردِ:« مَنِ طارِه طَرفِنَّن یُولّامُوشلار تا بُو خوب خبرِ سَنَ اِتیشدِرَم. اینِ که سَن مَنِم گَپلَرِمَه اینان مادی، توانایی دانُوشدیگی اَلَّن وِردَی تا ا‌ُ زمانی که اُشاق دُنیایا گَلَه.» اَلَ اُ لحظَه زکریا داهان باشارمادِ گَپی دیلَه گَتِرَ. اُنّاسُورا طارِنی فِرشتَسِه زکریا یانُونّان گِدِّ، زکریا اَوَ بیکِلِّه و چُخ وقت اُلمادِ که آروادِ اُشاقلِه اُلِّه.

اُنّا که الیزابت آلتِه آیَه اُشاقلیدِ، اُ فرشتَه بیردَن الیزابتی قُومِنَ که آدِ مریَمِدِ ظاهر اُلِّه. ا‌ُ باکرَه و بیر کیشِه یوسف آدلیَّه نامزدِدِ. فرشتَه اُنا دِدِ:« سَن اُشاقلِه اُلارای و بیر اُغُل دُوقارای و آدِنِ عیسی قُویارای. اُ متعال طارِنی اُغُلِ و سلطنتِ اَبَدَنچَه اُلار.»

مریم جواب وِردِ:« نَتَرکِه بِلَی زاد اُلُور با بُو حال که من باکرِیَم؟» فرشتَه توضیح وِردِ: « روح القدس سَنَ سارِه گَلَر و طارِنی قوتِ سَنَ کِلگَه آتار. بنابر بُو ا‌ُ اُغُل، قدوس و متعال طارِنی اُغُلِ اُخُولار.» مریم اُ فرشتَنی گَپلَرِنَه ایمان گَتِردِ و اُ زادیکه اُ دِمیشِدِ، قبول اِدِّ.

بیر آز مدَّتدَن سُورا بُو اِتفاقدَن، مریم الیزابت اَوِنَه گِدِّ. اَلَ بُو که الیزابت مریمی سلامِ سَسِنِه اِشِدِّ، اُشاق اُنی رَحِمِنَّ حرکت اِدِّ. اُلّار بخاطرِ ایشلَری که طارِه بِلِلَرِچِه گِرمیشِدِ چُخ خوشحالّیگ اِدِّلَر. مریم حدود اوچ آی الیزابتی یانُونا قالِّه و اُنّاسُورا اَوَ بیکِلِّه.

بُو جریانَّن سُورا الیزابت بیر اُغُل دُنیایا گَتِردِ. اُ و زکریا اُساقی آدِنِه اُ جور که فرشتَه دِمیشِدِ یوحنا قُویدُولار. اُنّاسُورا طارِه گَنَه زکریانی آقزِنِه آچدِ و زکریا دِدِ:« طاریِّه شکر، چون اُ قُومِنی کِمَکِنَه گَلِّه! و سَن اُغُلُم طاریِّه متعالَ پیامبر اُلارای و ابنسانلَرَ دِیَرَی که نَتَرکِه باشاریلَّر گیناه لارُونی باقُوشلادیگِنِ بُولالّار!»