۳۹- عیسی نی محاکِمَسِه

گِجَه یارِ سربازلَر عیسی یِ بِیگ کاهِنی اَوِنَه آپاردُولار تا اُنّان بازجولیگ اِدَ. پترس دَ ایراقدان اُلّار قُولُونجونّان گَلیردِ. اُنّا که عیسی یِ اَو ایچِنَ آپاردُولار، پترس اَوی یازُّسُونا اُد قِراقُونا تُوردِ تا اِزِنِ ایسِّدَ.

اَو ایچِنَ، یهود رئیس لَرِ عیسی دَن بازجولیگ اِدِّلَر. اُلّار چُخ یالانچِه شاهدلَر گَتِردِلَرکه پِس تُهمت لَر عیسی یَ وُوریلّارِدِ. آمّا، اُلّاری گَپلَرِ بیربیرِنَن بیر دَیلدِ، بنابر بُو یهود رهبرلَرِ باشارمادُولار اُنّان گیناهی ثابت اِدَلَّر. عیسی دَ هِچ گَپی دیلَه گَتِرمَدِ.

بالاخره، بِیگ کاهن عیسی یَ باخدِ و دِدِ:« بیزَ، دِ، آیا سَن مسیح دیرِّ طارِنی اُغُلیّای؟»

عیسی دِدِ:« حَیَه وارَم، و بیرگین مَنِ گِرَرَیز که طارِنی ساق اَلِنَ اُتُورمُوشام و آسمانّان یِرَ بیکِلَّم.» بِیگ کاهن، که عیسی گَپلَرِنَّن عصبانی اُلمُوشِدِ، اِز رَختِنِ ایردِّ و داهان مذهبِ رهبرلَرَ دادُونان دِدِ:« بیز آیرِ شاهدَ نیاز یُوخُمُوز. وارینز اِشِدّینز که اُ دِدِ مَن طارِه اُغُلیّام. نَه رأی وِریرَیز؟»

یهود رهبرلَرِ بِیگ کاهِنی جوابِنَّ دِدِلَر:« اُ اِلّیگ لایِقِدِر» اُنّا عیسی نی گِزلَرِنِ باقلادُولار، اُنی ایزِنَ تیفِردِلَر، اُنِه وُوردُولار و مسخرَه اِدِّلَر.

پترس اَوی یازُّسُونا تُورمُوشِدِ. بیر کنیز اُنِه گِردِ و دِدِ:« سَنَّ عیسی یْنَن بِلِنَیدی.» پترس انکار اِدِّ. بیر آز مدَّتدَن بیر کنیزِ داهان اَلَ بُو گَپِه اُنا وُوردِ و پترس گَنَه انکار اِدِّ. بالاخره، اُلّاری که اُتُورمُوشلارِدِ اُنا دِدِلَر:« بیلیرَگ که سَن عیسی نی بیر شاگردلَرِنَّنَی، چون سَنَّ جَلیلی یَی.»

اُنّا پترس آن ایچدِ و دِدِ:« طارِه مَنِ لعنت اِدَ اگر بُو کیشیِّه تانیّام.» اَلَ اُ موقعَ خروس مُونگَه وِردِ و عیسی بیکِلِّه و پترسَ باخدِ.

پترس گِدِّ و زار زار آقلادِ. اَلَ اُ زمان، یَهودایِ خیانتکار گِردِ که یهود رهبرلَرِ عیسی یِ اِلّیگَ محکوم اِدمیشلَر. غم و غُصَّه اُنِه تُوتدِ، گِدِّ و اِزِنِ اِلِّردِ.

بُو گین لَر پیلاتُس روم فرماندَه سِه یهودَ حکمرانلیگ اِدیردِ. یهود رئیس لَرِ عیسی یِ اُنی یانُونا آپاردُولار. اُلّاری سَدیگِ بُویدِ که پیلاتُس عیسی یِ اِلّیگَ محکوم اِدَ. پیلاتُس عیسی دَن خبر آلِّه:« آیا سَن یهود پاشاسی یَی؟»

عیسی جواب وِردِ:« گَرچَگ دِدی. آمّا مَنِم پاشالیگِم یِری که دَیل. اگر بِلَکیدِ، پیرُوانُم مَنِمِ چِه جنگ اِدَلَّرِدِ. آمّا من بُو دنیایا گَلمیشَم تا حقیقتِ طارِه دربارَه سِنَه وارکَسَ دِیَم. هَرکیم که حقیقتِ چُخ سِیَه مَنَ قُولاق آسار.» پیلاتُس خبر آلِّه:« حقیقت نَدِر؟»

پیلاتُس عیسی یْنَن گَپ چالانّان سُورا یازّیا، جمعیت یانُونا گِدِّ و دِدِ:« من گیناهی بُو آدامنان بُولمادُوم که لایقِ اِلّیگ اُلا.» آمّا یهود رئیس لَرِ و جمعیت داد وُوردُولار:« مصلوب اِد.» پیلاتُس جواب وِردِ:« اُ گیناهکار دَیل.» أمّا بُو دَفَه اُلّار اوجَتَر سَسِنَن داد وُوردُولار. اُنّاسُورا پیلاتُس اوچُوم که دَفَه چِه دِدِ:« اُ کیناهگار دَیل.»

پیلاتُس قُورخُدان که شورش اُلمِیا، قبول اِدِّ و عیسی یِ سربازلَرِنَ وِردِ تا مصلوب اِدَلَّر. روم سربازلَرِ عیسی یِ شلاق وُوردُولار و سلطنتی رَدا اُنا گِیدِر دِلَر و بیر تاج تیکانّان باشُونا قُویدُولار. اُنّا مسخرَه لیگِنَن دِیلَرِدِ:« دیرِّ قالا یهود پاشاسِه.»