۳۸- خیانت عیسی یَ

یهودی لَر هر ایل، پَسخ عیدِنِ جشن تُوتیلّارِدِ. بُو جشن، یاد آور بُویدِ که نَتَرکِه طارِه ایز ایل مُونّان ایلَرِ، اُلّاری آتّاسِنِ مصری بندگیسِنَّن نجات وِرمیشِدِ. یَخِن به اوچ ایل اُنّان سُورا که عیسی شروع به موعظه و اِرگَدّیگ وارکَسَ اِدِّ، شاگردلَرِنَ دِدِ سِیر پَسخ عیدِنِ اُلّارِنَن اورشَلیمنَ جشن تُوتا. اُ اَلَ بِلَه دِدِ که اُردا اِلمیَّه گِدَر.

یهودا عیسی نی بیر شاگردلَرِنَّن و خزانه دارِ گروهِ شاکردلَرِدِ. چُخ تَرِ موقع لَر اُ پیلَّن اُقُورلِیردِ. اُنّا که عیسی و شاگردلَرِ اورشلیمَ اِتیشدِلَر، یهودا؛ یهودی بِیگ کاهن لَرِنی یانُونا گِدِّ و عیسی نی لُو وِردِگینی پیشناهادِنِ در عوضِ پیل آلّیگ اُلّارا وِردِ. اُ بیلیردِ که یهود رهبرلَرِ، مسیح اُلّیگِ عیسی یِ باور یُوخلارِ و سِیرلَرِدِ اُنِه اِلِّرَلَّر.

یهودی مذهبِ رئیس لَرِ بِیگ کاهنی رهبرلیگِنَ، یهودانی خیانتِ چِه و عیسی نی تحویل وِردیگِ اُلّارا ، اُتُوز نقرَه سِکَّسِه اُنا وِردِلَر. دورُست اَلَ اُ جور که اَنبیا پیشگویلیگ اِدمیشلَرِدِ. یهودا قبول اِدِّ و پیلِ آلِّه و یُولا دیشدِ. اُ موقعدَن سُورا اُ بیر فرصت قُولُونجونّایدِ تا عیسی یِ اُلّارا تسلیم اِدَ.

عیسی اورشلیمنَ، پسخ عیدِنِ شاکردلَرینَن بِلَنَ جشن تُوتدِ. موقعِ پسخ شامِنی یِدیگِ، عیسی چِرَگِ تُوتدِ اُنِه ایردِّ و دِدِ:« تُوتی و یِیی، بُو مَنِم بَدنِم دِر که سیزینچِه وِرِلیر. مُونِه مَنِم یادُوما، یادا گَتِری.» بِلَکیدِ که، عیسی دِدِ بخاطرِ اُلّار جان وِرَر و بدنِ اُلّارِچِه قربانی اُلّار.

اُنّاسُورا عیسی بیر جامِ شراب تُوتدِ و اُلّارا دِدِ:« بُو مَنِم قانِم تازّا عهدِ چینَّ دِر که سیزی گیناه لَرینزی باقُوشلادیگِچِه تِکِلیر، اُنّان ایچی. بُو ایشِه آیَندَه دَ مَنِم یادُوما گِری.»

اُنّاسُورا عیسی شاگردلَرَ دِدِ:« سیزی بیرینز مَنَ خیانت اِدَر.» شاگردلَر تعجب اِدِّلَر و خبر آلُّلار که کیم بُو ایشَه اَل وُوریر. عیسی دِدِ:« اُ که بُو تیکَیِه مَنَّن تُوتیر، خیانتکاردُور.» اُنّاسُورا چِرَگِ یَهودایَ وِردِ.

اُنّان سُورا که یهودا چِرَگِ گِتِردِ، شیطان اُنی ایچِنَ گِدِّ. اُ یهود رئیس لَرِنی یانُونا گِدِّ تا اُلّارا عیسی نی تُوتدیگِچِه کِمَک اِدَ. بُولاری وارِ گِجَه اتفاق دیشدِ.

خوراکِ یِدیگِنَّن سُورا، عیسی و شاگردلَرِ زیتون داغِنی طَرَفِنَه گِدِّلَر. عیسی دِدِ:« بِی گِجَه سیزی وارینز مَنِ تَک قُویارایز. چون یازُلمُوش:« شبانِ وُورارام و وارِقُوین لَر پخش اُلالّار.»

پترس دِدِ:« حتی اگر وارکَس سَنِ تَرک اِدَلَّر، من بُو ایشِه گِرمَم.» عیسی اُنا دِدِ:« شیطان سِیر سیزی وارینزِ اِزِکِه اِدَ. آمّا من سَنیچِه دعا اِدمیشَم تا ایمانی اُرتادان گِدمِیَه. با بُو وجود، بِی گِجَه، قبلِ خُروسی مُونگَسِه، سَن اوچ دَفَه اِنکار اِدَرَی که مَنِ تانُومِیرای.»

پترس عیسی یَ دِدِ:« حتی اگر اِلَم سَنِ اِنکار اِدمَم.» باقِّه شاگردلَردَ اَلَ بِلَه دِدِلَر.

ُنّاسُورا عیسی و شاگردلَر جِتسیمانی باغِنَه گِدِّلَر. عیسی اُلّارا دِدِ دعا اِدَلَّر تا شیطان باشارمِیا اُلّارِ وسوسه اِدَ. اُنّا اُلّارِ تَرک اِدِّ و بیر خلوتَ گِدِّ تا دعا اِدَ.

عیسی اوچ دَفَه بِلَکِه دعا اِدِّ:« ای مَنِم آتّام، اگر اُلیر، اجازه وِر تا بُو جامِ رَنجدَن ایچمِیَم. آمّا اگر آدام گیناهلَرِنی باقُوشلادیگِچِه آیرِ یُول یُوخ، اُنّا سَنی اِرادَی اُلا.» عیسی اُقاد نگران اُلمُوشِدِ که اُنی عَرَقِ قان تَکیدِ. طارِنی بیر فرشتَه یُولّادِ تا اُنِه تقویت اِدَ.

هَردَفَه دعادَن سُورا، عیسی شاگردلَری یانُونا بیکِلیردِ، آمّا اُلّارِ اُخُودا گِریردِ. اوچوم که دَفَدَ که بیکِلِّه، دِدِ:« تُوری اَقِه، اُ خیانتکار شاگرد بُوردا دُور.»

یهودا- یهود رهبرلَرِ، سربازلَر و بِیگ جمعیَّتِنَن بِلِنَه گَلِّه. اُلّار اِز لَرینَن شمشیر و چُماق حمل اِدیلَّرِدِ. یهودا عیسی طرفِنَه گَلِّه و دِدِ:« سلام ای استاد» و اُنِه ماچِدِّ. بُو بیر نِشانَیدِ تاعیسی یِ یهود رئیس لَرِنَ، تُوتدیگِچِه تانُودُورا. عیسی اُنا دِدِ:« یهودا، آیا بیر ماچِنَن مَنَ خیانت اِدیرَی؟»

ُ زمان که سربازلَر، عیسی یِ تُوتدُولار، پترس اِز شمشیرِنِ چَکدِ و بِیگ کاهِنی خدمتکارِنی قُولاقِنِ کَسدِ. عیسی اُنا دِدِ:« شمشیری غلاف اِد. من باشاریرَم آتّامنَن سِیَم که بیر لشکر فرشتَه لَردَن کِمَکِمَ یُولّیّا. آمّا آتّامنَن اطاعت اِدَسِم.» اُنّاسُورا عیسی اُ کیشِنی قُولاقِنِ شفا وِردِ و وارِ شاگردلَر قَچدِلَر.