۳۷- عیسی، ایلعازَرِ دیرِّ اِدیر

یر کیشیدِ ایلعازر آدلِه، اُ و ایکِه باجِسِه مریم و مارتا، عیسی نی صمیمی و یَخِن یُولّاش لَرِنَّندِلَر. بیرگین عیسی اِشِدِّ که ایلعازر سخت مَرِضدِر. اُنّا که عیسی بُو خبرِ اِشِدِّ، دِدِ:« بُو مَرِضلیگ اُنی اِلّیگِنَ ختم اُلماز بَلکَم طارِنی بِیگ لیگِ و جلالِ، آدامای داهانِچِه، نمایان اُلّار.»

عیسی با بُو وجود که اُلّارِ چُخ سِیردِ، ایکِه گین داهان اُ یِری که وارِدِ، تُوردِ. ایکِه گین گَچَنَّن سُورا عیسی شاگردلَرِنَ دِدِ:« گَلیز یَهودیِه یَ بیکِلَگ.» آمّا شاگردلَر دِدِلَر:« ای استاد، اَلَ نِچِّه گین مُونّان ایلَریدِ که یَهودیِه خَلخِ سِیرلَرِدِ سَنِ اِلِّرَلَّر! عیسی جواب وِردِ: « بیزِم یُولّاشُمُوز ایلعازر یادمُوش و من اُنِه اُیارداسُوم.»

عیسی شاگردلَرِ جواب وِردِلَر:« ای طارِه، اگر اُ یادمُوش، خوب اُلّار.» اُنّا عیسی روشن لیگَ دِدِ:« ایلعازر اِلمیش. خوشحالم که اُردا دَیلِدِم تا سیز باشارایز منَ ایمان گَتِرَیز.»

اُنّا عیسی اُ کَنّی که ایلعازر اُردا زندگانلیگ اِدیردِ اِتیشدِ، دِرد گین ایلعازری اِلّیگِنَّن گَچمیشِدِ. مارتا عیسی نی اِستِقبالِنَ گِدِّ و دِدِ:« سَرورِم، اگر بُوردایدی، کاکام اِلمَزِدِ. آمّا من ایمان وارُوم که سَن هَرنَه طارِدَن سِیَی، سَنَ باقُوشلیّام.»

عیسی جواب وِردِ:« من قیامت و حیاتَم. هَرکیم مَنَ ایمان گَتِرَ، حتی اگر اِلَه، دیرِّ اُلّار. هَرکیم مَنَ ایمان گَتِرَ هِچ وقت اِلمَز. آیا مَنِم بُو گَپِمَ ایمان واری؟» مارتا جواب وِردِ:« حَیَه استاد، من ایمان وارُوم که سَن مسیح، طارِنی اُغُلی یَی.»

اُنّاسُورا مریم عیسی یانُونا گَلِّه و اُنی قِچلَرِنَ دیشدِ و دِدِ:«سَرورِم، اگر بُوردایدی، کاکام اِلمَزِدِ.» عیسی اُلّاردان خبر آلِّه:«هاردا اُنِه تاپشُور مُوشایز؟» اُلّار جواب وِردِلَر:« بیر مقبرَه ایچِنَ، گَل و گِر.» اُنا عیسی آقلادِ.

ایلعازری مَزارِ شیکافِدِ که بِیگ داش آقزِه جُلُونَ قُومُوش لارِدِ. اُنّا که عیسی مقبرَه یَ اِتیشدِ اُلّارا دِدِ:« داشِه قِراقا وُوری !» آمّا مارتا دِدِ:« دِرد گین اُنی اِلّیگِنَّن گَچمیش. اینِّ داهان جِسمِ ایس تُوتمُوش.»

عیسی جواب وِردِ:« مَگِه دِمَدِم ‌اگر مَنَ ایمان گَتِرَی طارِه جَلالِنِ گِردَی؟» بنابر بُو اُلّار داشِه قِراقا وُوردُولار.

اُنّا عیسی آسمانا باخدِ و دِدِ:« آتّا، سَنِ شکر اِدیرَم که مَنِ اِشِدیرَی. بیلیرَم که همیشَه مَنَ‌قُولاق آسیرای، آمّا مُونِه بخاطرِ خَلخی که بُوردا دُولار دِدِم، تا ایمان گَتِرَلَّر که سَن مَنِ یُولّامُوشای.» اُنّاسُورا اوجَ سَسِنَن دِدِ:« ایلعازر یازّیا گَل!»

ایلعازر، با بُو حالی که بدنِ کَفَنِنَن دُولانمُوشِدِ، مزاردَن یازّیا گَلِّه. عیسی اُلّارا دِدِ: « اُنِه آچی تا باشارا یُول گِدَ.» یهودی لَری چُخِ چون بُو معجزَیِ گِردِلَر، عیسی یَ ایمان گَتِردِلَر.

آمّا یهودی مذهبِ رئیس لَرِ حَسِدّلیک اِدِّلَر، اُنا بیر بیر دُورِنَ یِقِلِّلَر تا عیسی و ایلعازری اِلِّردیگِنی نَقشَه سِنِ چَکَلَّر.