۳۶- بیربیرَ تِکِلّیگِ مسیح نی ایزِ

بیرگین، عیسی اوچ نفر شاگردلَرِنَّن یعنی پترس، یعقوب و یوحنایِ گِتِردِ و بیر اوجَه داغ باشُونا آپاردِ تا بِلِنَه دعا اِدَلَّر.( یوحنایی که عیسی یِ تعمید وِردِ، آیرِ آدامدُور.)

دعا موقَعسِه، عیسی نی ایزِ گین تَکِه نورانی اُلِّه و رختِ بیر نورتَکِه آق اُلِّه. بیر طور آق اُلِّه که یِر ایسِنَّ اُنی تَکِ بُولُونمِیردِ.

اُنّا موسی و ایلیایِ نبی ظاهر اُلُّلار. بُو کیشِه لَر، ایز ایل مُونّان ایلَرتَر یِر ایسِنَّ زندگانلیگ اِدیلَّرِدِ. اُلّار عیسی ینَن اُنی اِلّیگِ دَربارَه سِنَ که بُو تِزلیگدَ اورشَلیمنَ اتفاق دیشیردِ، دانُوشیلّارِدِ.

اُنّا موسی و ایلیا، عیسی یْنَن دانُوشیلّارِدِ، پترس عیسی یَ دِدِ:« ناقاد خوب دُور که بیز بُوردایاگ. اجازه وِر اوچ کِلگَه دیزَدَگ؛ بیر سَنی چِه، بیر موسی چِه و بیر ایلیاچِه.» پترس بیلمِیردِ که نَدِیر.

هَنِه پترس گَپِه تیکَنمَ میشِدِ که نورانی بُولوط آشاقِه گَلِّه و اُلّارِ تُوتدِ و سَسی اُنی ایچِنَّن گَلِّه که:« بُودُور مَنِم عزیز اُغُلُم که اُنّان راضیّام. اُنی گَپِنَ قُولاق آسی.» اوچ شاگرد قُورخُدان یِرَ دیشدِلَر.

عیسی اُلّارا اَل قُویدِ و دِدِ:« تُوری اَقِه و قُورخمای.» اُنّا که اُلّار هر طرفَ باخیلّارِدِ. عیسی دَن آیرِ هِچ کَسِ اُردا گِرمَدِلَر.

عیسی و اُ اوچ شاگرد داغدان آشاقِه گَلِّلَر. اُنّا عیسی اُلّارا دِدِ:« اینِّ از اُزادیکِه گِردینز هِچ کَسَ هِشنَه دِمَیز. من بُو تِزلیگدَ اِلَرَم و گَنَه دیرِّ اُلّام. اُنّان سُورا باشاریرایز آیرِ کَسلَرَ دِیَیز که نَه گِرمیشَیز.