۴- طارِنینْ عهدِ ابراهیمِنَن

ایلَردَن سُورا تیفان نوحدَن گَچَنَّ، اینسانلَری تعداد گَنَدَ چُخ اُلدِ. اُلّار گَنَه بیرْ بیرَ و طاریَّه گیناه اِدیلَّرِدِ و چون دیلَّرِ بیرِدِ، بجای بُو که طبق طارِنین فَرمانِ یِرِ دُلُرالّارْ، بِلَنَه بیرْ یِرَ یِقِلِّلَر و اِزلَرِچِه کَن دیزَدِلَر.

اُلّار چُخ مُتیکَبِر اینسانلَرِدِلَر و سَمِیلَرِدِ طبق طارِنینْ حُکمِ زِندِگانلیگْ اِدَلَّر و حتی سِیلَردِ بیرْ بُرجْ دیزَدَلَّر که باشِ آسمانا اِتیشَه. طارِه گِردِ که اُلّار شِرارَتلٍرِنَه ادامه وِرَلَّر، باشاریلَّر چُخ گیناه اِدَلَّر.

به بُو دلیل اُلّاری دیلِه مختلف دیلَّر اُلِّه و اُلّارِ دُونیانی وار یِرِنَه پخش اِدِ. اُ شَهری که اینسانلَر بَناسِنِه شروع اِدْمیشِلَرِدِ، آدِنِه بابل قُویْدُلار که مَعنیسِه اُلُر ایخْتِلاف.

ایزْ ایلَن سُورا، طارِه بیرْ کیشینَن ابرام آدلِه دانُوشْدِ. طارِه اُنا دِدِ، «یِر و آتایْ اَوِنِه ویلِد و بیرْ یِرَ گِد که من سَنِه اُرا هیدایَت اِدیرَم.من سَنِه بریکَت وِردَم و سَنَّن بِیگْ قوم دیزَدَرَم. من سَنی آدیِّه بِیگْ اِدَرَم. کَسلَریکِه سَنَه بَریکَت وِرَلَّر، موبارَک اِدَرَم و اُلّاری که سَنِه لعنت اِدَلَّر، ملعون اِدَرَم. وارِ خانوادِلَر که یِر ایسِنَّدِلَر بخاطر سَن بَریکَت وِردَم.»

ابرام طارِدَن ایطاعَت اِدِ. اُ زِیفَسِه سارای، خادِملَر و اَموالِنِه گِتِردِ و کنعان یِرِنَه که طارِه اُنا گِرسَدْمیشِدِ گِدِ.

اُنّا که ابرام گِدِ کَنعانا، طارِه دِدِ« دُریَّه باخ. وارِ بُو یِری که گِریرَی، سَنَه و اُشاقْلاریّا باقُوشْلیّارام.» اُنّا ابرام اُرا تُوردِ.

اُردا بیرْ کیشیّدِ که آدِ مِلکیصِدِقِدِ و طارِنین کاهِنیدِ. ابرام اُنِه بیرْ نَبَردلَرِنی آخِرُنّا دیدار اِدِ. ملکیصدق ابراهیمَ بَریکَت وِردِ و دِدِ،«طارِه که مالکِ آسمانلَر و یِردِر، ابرامَ بَریکَت وِرَ. « اُنّاسُورا ابرام اُن بیرِ غنائمِ جَنگِنِه ملکیصِدِقَ باقُوشْلادِ.

ایلَّر گَشدِ، آمّا ابرام و سارای، هَنِه اُشاقْ یُوخْلاریدِ. طارِه اِبراهیمِنَن دانُوشدِ و گَنَه قول وِردِ که اُلّارا بیرْ اُغلانْ باقُوشلیّار و اُنی نَسلِنَّن چُخ اُشاقْلار وُجودا گَلَر که آسمانی اُلدُوزْلَرِ تَکِه چُخ اُلار. ابرام طارِنین قُولِنِه اینانِّه و طارِه ابرامِ عادل اُخُدِ. چون اُ طارِنین قُولِنِه اینانْمُوشِدِ.

اُنّا طارِه اِبرامِنَن پیمان باقْلادِ. معمولا پیمان بیرْ توافقِ ایکِه یانلُدُر که طبق اُ هر ایکِه طرف متعهد اُلیلّار تا بیرْ بیرْ ایچِه بیرْ ایشیْ گِرَلَّر. آمّا ابرام موردِ، موقعی بُو پیمانِ باقْلاندِه که ابرام عمیق اُخِه ایچینَّیدِ. با بُو حال ابرام باشاریرْدِ طارِنین سَسِنِه اِشِدِ. طارِه دِدِ،« من سَنی اِز وجودینَّن بیرْ اُغلان سَنَه باقُوشْلیّارام. من کنعان یِرِنِه سَنی نَسلیَّه باقُوشلیّارام.» آمّا ابرام هَنِه اُغُلی یُوخیدِ.