32. عیسینینگ جن قاقان اِرْکِک آدٰمی و سیرقاو عٰیالی شفا بِریشی

بیر گۆن عیسی و شأگردلِری گأمی بیلِن کؤلینگ آنگْرْسینا جَدَرْلیلِرینگ یورْدینا گیتْدیلِر. قوریلیغا یِتِنْلِرینده گأمیدِن دۆشدیلِر.

اوُل یِرده جن قاقان بیر آدٰم بارْدی.

اوُل آدٰم بِتِر گۆیچْلیدی و اوُنی هیچ کیم کؤشیدیب بیلمِرْدی. نأچه گِزِک زنجیرلانْدی، یؤنه زنجیرْلاری قیرارْدی.

اوُل آدٰم شوُل یِرْدأکی مٰزارلانگ آراسینْدا یاشارْدی. اوُل گیجه گۆندیز قیغیرارْدی. اِشیک گِیْمِرْدی و کسگیر داشْلار بیلِن اؤزین یارالارْدی.

اوُل عیسیٰنینگ یانینا گِلِیب اؤنگینده دیزا چؤکْدی. عیسی جنه: »بو آدٰمی تِرک ات« دیب بویورْدی.

جن قاتی قیغیریب دیدی: »ای قدرتی گۆیچۏلی خداینگ اوُغْلی عیسیٰ، مِنْدن نأمه ایسْلِیأرسینگ؟ مانگا عٰذاب بِرْمأنگ! « سوُنگ عیسیٰ جنْدان سوُرادی: »آدینگ نأمه؟ « جن: »آدیم لژیون، سِبأبی بیز کؤپ« دیدی.)لژیون روم قوشینینْدا بیر نأچه مۆنگ عِسْگِرْدِن عبارٰتْدی.(

جنلار عیسیٰدان: »بیزی بو یورتْدان قاوْما دیب. « یالْبارْدیلار. شوُل یِرْده دپهنینگ اۆستینْده اوُتْلاب یؤرِن بیر سۆری دوُنگیز بارْدی. حرام جنلار عیسیدان یالْباریب: »اوُنْدا بیزی دوُنگیزْلانگ ایچینه ایبر. « دیدیلِر. عیسی اجازه بِردی و »بارینگ. « دیب بویورْدی.

جنلار اوُل آدٰمدان چیقیب دوُنگیزْلارا گیرْدیلِر. ایکی مۆنگه قولای شوُل دوُنگیزْلانگ هِمّهسی دِپهدِن آشاق کؤله دۆشیب غٰرق بوُلْدیلار.

اوُل دوُنگیز سوریسینی باقْیان چوُپانْلار بو بوُلیب گِچِن زاتْلاری، گؤریب شهره ایلْغادیلار و عیسیٰنینگ اِدِنْلِرینی خٰلْقه آیتْدیلار. شهرینگ ایلاتی گِلدیلِر و جن قاقان آدٰمینگ کؤشأنْدیگینی، اِشیک گِییب و عٰقللیجه اوُتیرانْدیغینی گؤرْدیلِر.

آدٰمْلار قاتی قوُرْقْیبْدی شوُنینگ اۆچین عیسیٰدان بو یِری تِرک اِتْمِگی ایسْلِدیلِر. سوُنگ عیسیٰ گأمأ مینْدی. یؤنه جندان قوتولان آدٰم عیسیٰدان اوُنینگ بیلِن همراه بوُلْماغینی خواهش اِتْدی.

یؤنه عیسیٰ اوُنگا: »اؤیْنگه قایْدیب خداینگ سانگا نأمه اِدِنْلیگینی و مِرْحِمِتینینگ نأهیلی سانگا یِتِنْلیگینی همّهلِره آیْدینگ« دیدی.

شِیْدیب اوُل آدٰم گیتْدی و قابات گِلِن آدٰما عیسیٰنینگ اوُنگا نأمه اِدِنینی آیْدارْدی. اوُنینگ حکایتینی اشیدِنْلِر گِنگ قالارْدی.

عیسیٰ کؤلینگ آنگرْسینا قایْدیب گِلْدی. اوُل یِره گِلِن سوُنگ بیر توُپار آدٰم اوُنینگ داشینا اۆیشدیلِر، اوُل معرکهنینگ آراسینْدا اوُن ایکی ییل بأری آیْباشی قانی آقْماسینْدان عٰذاب چِکْیأن بیر عٰیال بارْدی. اوُل همّه مالینی اؤزینی درمان اِتْمِک اۆچین خرج اِدیب طِبیبلِره بِریبْدی. یؤنه اوُنینگ یاغْدایی بِتِرْألبْدی.

اوُل عیسیٰنینگ کؤپ سیرْقاوْلارا شِفا بِرِندیگینی اِشْدیبْدی. اؤز یانینْدان : »دینگه عیسیٰنینگ اِشیگینه اِل دِگیرْسِم شِفا تاپْجاغیما اینانْیارین« دیدی. اوُل عٰیال معرکهنینگ آراسینْدان اؤزینی عیسیٰنینگ آرْقاسینا یِتیرْیب اوُنینگ دوُنینا الین دِگیرْدی. عیسیٰنینگ اِشیگینه ال دِگیرِن بادینا قان آقْماسی کِسیلْدی.

عیسیٰ دِرْرِو بیر گۆیْجگینگ اؤزینی تِرک اِدِنْدیگینی آنگْدی. ایزینا اؤریلیب دیدی: »کیم منینگ اِشیگیمه دِگْدی؟ « شأگردلِر دیدی: »کؤپ آدٰم یِرلی یِردِن سیزی قیسْیارْلار، نأمه اۆچین سورایارْسینگ »کیم مانگا اِل دِگیرْدی« دیب؟

اوُل عٰیال قورْقیدان یانگا تیتْرأب دوران یاغْدایْدا عیسیٰنینگ آیاقْلارْنینگ اؤنگینْده دیزا چؤکْدی. سوُنگ بوُلْسا اوُنگا نأمه اِدِنْدیگینی و نأهیلی شِفا تاپانْدیغینی آیتْدی. عیسیٰ اوُنگا دیدی: »ایمانینگ سنی شِفا بِرْدی ساغ آمان بارینگ. «