۵۰- عیسی آنگَردِه

نزدِکه به ۲۰۰۰سالِه که آدَمای زیادی دُنیادِ، عیسی مسیح اِنجیلِ خو خوشه خبَر مَشونِندِه. کلیسایون کارا زیادامِویندِه. عیسی وعدیش آدا که آخِرِ دنیا دِ آنگَردِه اگَر چه عیسی حالا نومی، ولی به خوشتَنَرِش وعده وفادارِه.

خدا چوما خو موقوش هَمی بییَن که منتظر مسیحِ آگَردَستَن یِیمون، ای جور زِندگی بییَروم که مقدس گَردوم و جاوِه عزیز بوزونوم. آ هَمی بییَن چوما خو موقوشه که جا پادشاهی بارِه دِ بَقیی وی گَب بِزَنوم. آ موقه که حالا مسیح زِمین سَرِه زِندگیش مییه، بیین واچه: «چِمه شاگردون خوشه خبر خدا پادشاهی پاکِ دنیا دِ موعظه مییَرِنده، بعد جا آخرت مِرَسه.»

اَلادِه طایفونی دِ یِندِه که حالا عیسی بارِه دِ هیچیشون نَشونِستی. قبل اینکه مسیح آگَردِه آسِمون، آ مسیحیونِش وات که جی خوشه خبرِ به همه جانایی که هیچوقت نَشونِستیشون اِعلوم یَرِندِه. عیسی واچه: «بِشِیا و پاک مِلّتون چِمِه شاگِردون یَرا، چون که قَلبون رَزِ وِرین بیچیندَنِ را آمادیه.»

عیسی جیشته وات که: «نوکر خوشتَنَرِش اَربابَر جور تَر نیه. هَمی بییَن که جی دنیا اَربابون چِمه خو بَدِشون مومه، شماشون دِ چِمِه خاطِره شِکَنجه مییَرِنده و موکوشِندِه. جی دنیا دِ اَذیَتامبِه یا ولی دِلیون قویه یَرا چون که اَ، شیطون که جی دنیا حاکِمه شِکَستِم آدا. اِگه تا آخر چِمه وفادار گَردا، آ موقه خدا شما نجات آندییِه!»

عیسی خوشتَنَرِش شاگِردون را اینِه داستونِش تَریف یِه، تا جانا را توضیح آدییِه که جی دنیا آخَره دِ چه بلا جی آدَمون سَر ما. آ واچه: «اِینه مَردک خوشتَنَرِش رَزِ مونه خورِه دونیش بِکِّر. وقتی حالا خوابه وِ، جاوِه دشمن بومه و گندم دونی لادِه، هَرزِه عَلَفِش توم بِکِّر و خوشتَنَرِش را بوشو.»

وقتی گندم دونون جیکِشون بِزَن، جا مردک کارگَرون واچون: «آقا، تَه خورِه دونی جی زِمین مونه بِکِّردی! چرا جینا لادِه هَرزِه عَلَف سوزاوی؟» آ مردَک جوابِش آدا: «اِم فقط موتونه چِمِه دُشمَنون کار گَردِه که جانا بِکِّرِندِه. اینِه چِمِه دشمَنون خو جی کارِش بییِردی.»

کارگَرون در جواب خوشتَنَرِشون اَربابون واچون: «آیا باید عَلَفون بِکَشوم بَر؟» اَرباب جوابِش آدا: «نه اِگه جی کارِ اَنجوم آدِیا، بعضی جی گَندومون دِ جانا بی مِکَشا بَر. تا وقت بیچیندَن صَبِر یَرا بعد عَلَفون گِردِه گِرا بیسوزدِنا، آمّا گَندومون بورا چِمِه آنبار.»

شاگِردون جی داستون معنی هالیانیویندِه و مسیحِ خو بوقوچون که جی داستون جانا را توضیح آدییِه. عیسی واچه : «مردِکی که خورِه دونیش بِکِّر اُونوَردِنه که مسیحِ. رَز دِ یِعنی اِم دنیایِ و خورِه دونه دِ یِعنی مردمی که خدا پادشاهی مونه دِرِندِه.»

هَرزِه عَلَفون دِ آدِمونی یِندِه که شیطونِ یِندِه، یعنی شَرِّندِه. جا مردَک دُشمن یعنی آ کَس که هَرزِه عَلَفونِش بِکِّر هَمی آ شیطونه. فصل بیچیندَن، دنیا آخِرِه و آنایی که میچینِندِه فِرِشتونِندِه.

آ موقعی که دنیا به آخِر بِرَسه، فِرِشتون هَمه جا مردمی که شیطونِندِه، پاک دنیا خو گِردِه مِگِرِندِه و ماشینِندِه آتِش مون. یاقایی که آنا سختیون مصیبت وحشتناکی وی مِربَنِندِه و خوشتَنَرِشون دَندون مِزَنِندِه سِرِندییَر.آمّا عادِلونی که عیساشون پی‌بِگِرده وی خورشید وارینا خوشتَنَرِشون پییَر پادشاهی دِ، خدا، مِوَشِندِه.

عیسی هَمی بییَن واچه قبل اینکه دنیا تاموناوِ آنگَردِم زِمین. آ هَمی باین که زِمین خو بیشی بَر هامون آنگَردِه، یِعنی اینِه یون که قابل لَمسِ دِرِ و آسِمونِ اَبرون سَرِه ما. آ موقه که عیسی آگَردِه، هر مسیحی که بُومِردی، هاموندِه زِندامبِه و جاوی آسِمونه ملاقات مییَرِه.

بعد جا آ مَسیحییونی که حالا زِندییِنده میشیندِه آسِمونه طَرَف و جاوِکین مَسیحییون پَلِف که زِنداویندِه. هَمه ی آنا عیسی وی آقادِه دِرِندِه و عیسی خوشتَنَرِش قومی وی زِندگی مییَرِه .آنا صلح همیشگی وی هَندییَر بی زندگی مییَرِندِه.

عیسی وعدیش آدا هر که جاوِ ایمون دِرِه، اِینه تاج مِبَخشِه جاوِ. آنا خدابی هَمِرا تا آخِر همه چی حکومت مییَرِندِه و آرامش کامل مونِه دِرِندِه.

آمّا خدا جانایی که عیساشون ایمون نوردیشون، داوِری مییَرِه. آ جانا ماشینِه جَهَنم مون. آقا یاقایی که آنا تا آخِر مِربَنِندِه و خوشتَنَرِشون دَندونون مِشقالِندِه سَرِندییَر و عذاب مِکَشِندِه. آتِشی که هیچ موقه خاموشا مِنِوِه جانا میسوزدِنِه و کِرمون جانا بوخاردَنِ خو دَس مِنِکَشِندِه.

آ موقه که عیسی آگَردِه، شیطون و جاوِ حکومت بینِه مِبَرِه. شیطون تا آخِر با جا آدَمونی که عوَض اِم که خدا خو اطاعت یَرِندِه، جاخو پیرَویشون یِردی آقادِه میسوجییِندِه .

آدَم و هوا گَب گوشه نییَردَن واسین و بومییَن گونا به جی دُنیا، خدا دُنیاش لَعنت یِه و تَصمیمِش بِگِه که جا بینِه بِبَرِه. ولی ای رِو خدا جِدیدِه آسِمونیون زِمین سامِدییه که کامِله.

عیسی قومِش وی جدیدِه زِمین مونه زِندگی مییَرِندِه، و آ تا آخِر بَر هر چی که یِه حکومت مییَرِه. آ هر اَرسِه مردِمون چوشمِه پاکه مییَره. دیه هیچ غَمی نییه و هیشکِه سختی مِنِکَشه. آنا هیچ موقه مِنِربَنِندِه، دیه هیشکَس مریضامِنِوِه و مِنومورِه. و هیچ هَدَرِه چی آقادِه نییِه و عیسی صلحیون عدالَتی وی خوشتَنَرِش پادشاهی مونه دِ حکومت مییَرِه. بعد جاوِ آ خوشتَنَرِش قومی وی تا آخِر یِه