10. Он жаза

Қудай Муўсаны Мысырға жибергенде, фараонның израиллыларды жибермейтуғынын айтып, оны алдын ала ескертти. Муўса менен Харон фараонға барып: «„Мениң халқымды жибер!“ — деп, Израилдың Қудайы айтып атыр», — деди. Бирақ фараон оларға қулақ салмады. Ол израил халқын азатлыққа жибериў былай турсын, ал оларды еледе көбирек жумыс ислеўге мәжбүрледи.

Муўса менен Харон фараонның алдына бир неше мәрте барды, бирақ фараон ҳәр келгенинде халықты жибериўден бас тартты. Соның ушын, Қудай Мысырға қорқынышлы он жаза жиберди. Усы жазалар арқалы Қудай фараонды жазалап, Өзиниң фараоннан ҳәм Мысырдағы барлық қудайлардан қүдиретли екенин көрсетти.

Биринши жаза мынадай болды: Қудай Нил дәрьясының суўын қанға айландырды. Бирақ фараон бул жазадан қорқпады ҳәм израиллыларды жибермеди.

Кейин Қудай Мысырда жүдә көп қурбақаларды шығарды. ФараонМысырды қурбақалардан азат етиўин Муўсадан өтинип сорады. Сонда Муўсаның еткен дуўасынан соң, барлық қурбақалар өлди, бирақ фараон жүрегин тас қылып, және израиллыларды Мысырдан жибергиси келмеди.

Соның ушын, Қудай Мысырды ширкейлердиң бастырып келиўи менен жазалады, бирақ фараон қатал турыўды даўам етти. Оннан кейин, Қудай Мысырға ийтшыбынларды жиберип, жазалады. Фараон Муўса менен Харонды шақырып, егер олар усы апатшылықты тоқтатса, израиллылардың Мысырдан шығып кете алатуғынын айтты. Муўса дуўа еткенде, Қудай Мысырдағы ийтшыбынларды алып таслады. Бирақ фараон жүрегин және тас қылып, израил халқын жибермеди.

Сонда Қудай мысырлылардың барлық ири ҳәм майда малларына қырғын келтиретуғын иллет жиберди. Бул да фараонның шешимин өзгерте алмады. Оның жүреги тас болып, бурынғыдай израиллыларды жибермеди.

Соннан кейин, Қудай Муўсаға фараонның алдында күлди ҳаўаға шашыўды буйырды. Муўса солай қылғанда, мысырлылардың денелеринде ириңли шыйқанлар пайда болды, ал израиллыларда бундай болмады. Қудай фараонның жүрегин қатал қылды ҳәм ол израиллыларды жибермеди.

Кейин Қудай мысырлылардың егислик өнимлериниң көп бөлегин набыт қылатуғын, және де ашық даладағы барлық тири жанларды өлтиретуғын буршақ жаўдырды. Фараон Муўса менен Харонды шақырып, оларға: «Мен гүна иследим. Буршақ тоқтаўы ушын Қудайға дуўа етиңлер, сонда мен сизлерди жиберемен», –деди. Муўса дуўа еткенде, буршақ тоқтады.

Бирақ фараон буршақ тоқтағанын көрип, және Қудайға бойсынбады ҳәм жүрегин тас қылды. Ол алдынғыдай израиллыларды жибергиси келмеди.

Сонда Қудай Мысырға шегирткелерди жиберди. Олар буршақтан аман қалған барлық өнимлерди набыт қылды.

Буннан соң, Қудай үш күн даўам ететуғын қараңғылықты жиберди. Қараңғы болғаны соншелли, мысырлылар үйлеринен шыға алмай қалды. Бирақ израиллылар жасап атырған жер жақты болды.

Ҳәттеки, усы тоғыз жазадан кейин де, фараон бәри бир израиллыларды Мысырдан жибериўден бас тартты. Қудай және бир соңғы жазаны жибериўди шешти, буннан соң фараон израиллыларды жибериўге ыразы болды.