25. Шайтанның Ийсаны сынаўы

Ийса суўға шомылдырылғаннан соң, дәрҳәл Мухаддес Руўх Оны шөлге алып барды. Ийса ол жерде қырық күн ҳәм қырық түн болды. Ол қырық күн даўамында ораза тутты ҳәм усы күнлердиң ақырында Ол қатты аш болды. Сонда Ийсаның алдына шайтан келип, Оны сынап баслады.

Шайтан Ийсаға: «Егерде Сен — Қудайдың Улы болсаң, жеў ушын тасларды нанға айландыр!» — деди.

Бирақ Ийса шайтанға былай деп жуўап берди:«Қудайдың сөзинде: „Адам тек ғана нан менен емес, ал Қудайдың аўзынан шыққан сөз бенен жасайды!“ — деп жазылған».

Соннан соң шайтан Ийсаны Ибадатхананың төбесине алып барып, былай деди: «Егер Сен — Қудайдың Улы болсаң жерге секир, себеби:“ Қудай периштелерине буйрық береди. Аяғыңды тасқа урып алмаӯың ушын, олар Сени қолларында алып жүреди”, — деп жазылған-ғо».

Бирақ Ийса шайтанның қәлеген нәрсесин ислемеди. Ол:«Қудай былай дейди: „Ийең болған Қудайды сынама“», — деди.

Сонда шайтан Ийсаны жүдә бийик таӯға әкелип, Оған дүньяның барлық патшалықларын, олардың қүдиретин ҳәм байлығын көрсетти. Шайтан Ийсаға: «Егер Сен мениң алдымда жерге жығылып, маған табынсаң, мен булардың барлығын Саған беремен», — деди.

Бирақ Ийса оған жуўап берип: «Меннен ары кет, шайтан! Қудай Өз сөзинде халқына: “Тек өзлериңиздиң Қудай Ийеңизге табының. Жалғыз Оған хызмет етиң”, — деп буйырған», — деди.

Ийса шайтанның азғырыўларына жеңилмеди ҳәм шайтан Оның қасынан кетти. Буннан соң периштелер Ийсаға келип, Оған ғамхорлық ете баслады.