۱۰ - ده بلا
خدا وِ موسی ئو هارون ای هُشدارِه دَ کِه فِرعون یِهگَرَه. موسی ئو هارون رَتِن وِ تِه فِرعون ئو گُتِن: «یَه پیومِ خدا اسرائیلَه سی تو: قومِ مِنِه وِل کُو تا رُوئَن.» فِرعون مَحلی وِ حَرف اونُو نَنیا ئو وِ جا وِل کِردِن قومِ بنی اسرائیل، اونُون مَجبور کِرد تا سَختتِر دِ زی تِری کار بَکَن.
فِرعون هَنی دِ وِل کِردِن قومِ اسرائیل تفره میرت. وِ ای خاطِر خدا دَه بِلا وَحشتناکِ وِ مصر نازِل کِرد. دِ تُرّ اُو بِلایا، خدا وِ فِرعون نِشُو دَ کِه قُوَتِ او دِ فِرعون ئو هَمَه خدایا مصر بیشتِرَه.
خدا آو رو نیلِ کِرد وِ خین. اَما فِرعون هَنی، قومِ اسرائیلِ وِل نَکِرد.
خدا تَمُومِ وِلاتِ مصرِه پُر کِرد دِ قُوروآق. فِرعون دِ موسی حاست کِه قُوروآقیانِه دِ وِلاتِ اونُو دیر بَکَه. اَما دِما یَه کِه قُوروآقیا دِ بِئن رَتِن، دِل فِرعون سَختتِر بی ئو اِجازَه وِ دَر کِردِن دِ مصرِه وِ اونُو نَدَه.
اوسه خدا بِلا پَشخَه کورَیا ئو دِما وَ بِلا پَشخَهیانِه فِرسَن. فِرعون وِ موسی ئو هارون گُت کِه اَر ای بِلانِه دیر بَکَن، وِشُو اِجازَه مِئَه تا دِ مصر بَکَن وِ دَر. دِما دُعا موسی، خدا ای بِلایانِه دیر کِرد، اَما فِرعون قَلب خُشِه سَخت کِرد ئو هَنی هَم وِ اونُو اِجازَه نَدَه دِ مصر بکن و دَر.
دِما وَ، خدا کاری کِرد تا هَمَه حِیوُنیا مصرییا مریض بان ئو بَمیرَن. اَما قلبِ فِرعون سَخت بیئی ئو ای دَفَه هَم وِ اونُو اِجازَه رَتِن نَدَه.
خدا وِ موسی گُت تا مُشتیا خُشِه پُر بَکَه دِ خاکِسَر ئو وِنُون دِ ریوِری فِرعون بَپاشَه وِ هَوا. وَختی موسی ای کارِ کِرد، تَمُومِ مَردِم مصر بِهجُز اسرائیلییا دُچار دُمَلیا دردناک بییِن. اَما خدا قلبِ فِرعون سَخت کِرد ئو فِرعون اِجازَه نَدَه کِه اونُو رُوئَن.
اوسِه خدا بِلا تگرگِه فِرسَن ئو بیشتِر ثمریا ئو هَر جُونِوَری کِه دِ دَر بییِن دِ بِئن بُرد. اوسِه فِرعون، موسی ئو هارونِ هِنا کِرد ئو گُت: «مِ ای دَفَه گناه کِردِمَ، شِما آزادیت کِه رِیت.» اوسِه موسی دُعا کِرد ئو بارِسِن تگرگ تَمُوم بی.
اَما فِرعون هَنی گناه کِرد ئو قلبِ خُشِه سَخت کِرد ئو نِهیشت کِه اسرائیلییا آزاد بان.
وِ ای خاطِر خدا قَری دِ قُلَهیانِه وِ وِلاتِ مصر فِرسَن. اونُو تَمُومِ ثمریایی کِه دِ بِلا تگرگ مَنه بیین، حَردِن.
اوسِه خدا بِلا تاریکینِه فِرسَن کِه وِ مُدَت سِه روز طول کَشی. هَمَه جا چِنو تاریک بیئی کِه مصرییا نِمیتُونِسِن دِ حُونَه بَکَن وِ دَر. اَما دِ جائی کِه اسرائیلییا زِنِئی میکِردِن، روشْنایی بی.
دِما ای نُه بِلا، فِرعون نِهیشت اسرائیلییا رُوئَن. دِ اوچِه کِه فِرعون مَگر گوش بی ، خدا حاست تا آخِری بِلانِه هَم بَفرِسنَه. ای بِلا باعث مووَه کِه فِرعون حاسته خُشِه عَوَض بَکَه.
مَتَلِی گِرِتِسَه دِ کِتآو مقدس: (کِتآو خروج فصل ۵ تا۱۰)
رایگان برای استفاده، اقتباس و اشتراکگذاری تحت مجوز باز (CC BY-SA 4.0).