۹. خدا هِنا موسی میکَه
دِما مُردِنِ یوسف هَمَه فامیلیاش مَنِن دِ مصر. سی سالیا آزگار اونُو ئو بَچُونِشُو دِ اوچِه وِ زِنِئی خُشُو اِدامَه دَن ئو صحآو بَچُون زیادی بییِن. مصرییا وِ اونُو اسرائیلی میگُتِن.
دِما صدیا سال، شمار اسرائیلییا فره بیین. مصرییا دَ یوسف ئو کمکیاشِه وِ ویر ناشدِن. اونُو دِ اسرائیلییا میتَرسِسِن سییَهکِه شمارشُو فره بی. وِ ای خاطِر فرعونی کِه دِ اُو زِمُون وِ مصر حکومت میکِرد، اسرائیلییانِه کِرد وِ بَردَه مصرییا.
مصرییا، اسرائیلییانِه مَجبور وِ دُرس کردنِ ساختِمُونیا ئو شهریا زیادی کِردِن. کاریا سخت، زِنِئینِه سی اونُو تَل کِردی، اَما خدا اونُونِه برکت دَ ئو وِ صحآو بَچُونِه بیشتِری بییِن.
فرعون دیی کِه اسرائیلییا بَچَون زیادی میارَن، وِ ای خاطِر وِ قُومِش فِرمُو دَ کِه تَمُومِ بَچُونِه اونُو کِه کُر بییِن بُونَن دِ مین رو نیل ئو بَکُشَن.
تا یَه کِه یِه زینَه اسرائیلی کُری اُوِرد وِ دیی. او ئو میرَش تا زِمُونی کِه میتُونِسِن، بَچَنِه قایِم کِردِن.
وَختی کِه بُوئَه ئو دا بَچَه، دَ نِمیتُونِسِن قایِمِش بَکَن، سییَهکِه نِیلَن اونِه بَکُشَن، بَچَنِه نیان مین سَلِه وِ ریی آو دِ مین نِییا دِ لارُونَه رو نیل. اَما خُوَئر گَپَش دِ دیر سِیل میکِرد تا بِئینَه چِه پیش اُمائی سیش مُوفتَه.
دُختِر فرعون سَلَهنِه دیی ئو سِیل مینِش کِرد. وَختِی بَچَنِه دیی، اونِه وِ جا کُرِش قَبول کِرد. او یِه زینَه اسرائیلینِه گِرِت تا بَچَهنِه شیر بِئَه. بی خَور دِ یَه کِه اُو زینَه دا هِه اُو بَچَه بی. وَختی داش بَچَهنِه شیر بُر کرد، اونِه وِرگَردَن وِ تِه دُختِر فرعون. او نُومِ بَچَهنِه نیا وِ موسی.
زِمُونی کِه موسی گَپ بی، یِه مصرینِه دیی کِه بَردَه اسرائیلینِه میزِنَه. موسی تَقِلا کِرد بِرار اسرائیلیشِه نجات بِئَه.
موسی وا ای گِمُو کِه کَسی اونِه نِمِئینَه، اُو مصرینِه کُشت ئو لَشِش قایم کِرد. اما یَکی ای کارِ موسینِه دیی.
فرعون دِ ای کارِ موسی خَوَر دار بی ئو تَقِلا کِرد موسینِه بَکُشَه. اما موسی دِ مصر جیست وِ بیابُو ئو سَروازیا فرعون نَتُونِسِن اونِه دِ اوچِه پیا بَکَن.
موسی دِ بیابُونی دیر دِ مصر شُرو کِرد وِ چوپُونی. او وا زَنی دِ اُو وِلات دُوئَت کِرد ئو بی وِ صحآو دُو کُر.
یِ رو، وَختی موسی ویردار گَلَه میشُو بُوئَه زینَش بی، بُوتِهِ دیی کِه بِلیز بی اما نِمیسُخت. اوسه رَت وا نِزیکِش تا علتِشِه بَفَمَه. وَختی موسی وِ بوتَه بلیز بیه نِزیک بی، خدا دِ مین بوتَه هِنا کِرد: « کالَهیاتِه دِ پا دِرار، سییَهکِه جائی کِه ریش هِسائییَه مُقدَسَ.»
اوسِه خدا گُت: « مِ رنج ئو عذاوِ قومِ خُومِ دِ مصر دیمَه. مِ تونِه میفرِسِم وِ تِه فرعون تا قُومِ مِنِه دِ بردِهایی مصر دِراری. مِ ولاتِ کنعانِه مِئِم وِ اونُو، ولاتی کِه وَعدَشِه دَمی وِ ابراهیم، اسحاق ئو یعقوب.»
موسی گُت: «اَر قوم دِ مِ بَپُرسَن کِه کی مِنِه فِرسَنَه، وِشُو چی بُوئِم؟» خدا فَرمایش کِرد: «هستم آنکه هستم. وِ اونُو بُو "هستم" مِنِه فِرسَنَه تِه شِما. ئو وِشُو بُو کِه مِ یَهُوَه خدا بُوئَهیاتو ابراهیم، اسحاق ئو یعقوبِم. نُومِ مِ تا ابد هِه یِنا.
موسی نِمیحاست رُوئَه وِ تِه فرعون، سییَهکه میتَرسِس نَتُونَه خو صُبَت بَکَه، وِ ای خاطِر خدا بِرارِ موسی، هارونِ فِرسَن تا وِش کمک بَکَه.
مَتَلِی گِرِتِسَه دِ کِتآو مقدس: (کِتآو خروج فصل ۱ تا ۴)
رایگان برای استفاده، اقتباس و اشتراکگذاری تحت مجوز باز (CC BY-SA 4.0).