۱۲ - خروج
اسرائیلییا خیلی خوشحال بییِن کِه دِ مصر میکِردِن وِ دَر. اونُو دَ بَردَه نِوین ئو میرَتِن وا لا سَرزِمین موعود. مصرییا هَرچی کِه اسرائیلییا حاستِن، مِثِ نُقرَه، طِلا ئو چیا قیمَتیشُونِه وِشُو بَخشین. قَری دِ قومیا هَنی هَم کِه وِ خدا ایمان اُوِردین، وا اونُو دِ مصر کِردِن وِ دَر.
سِتینی دِ اُر دِ روز ئو سِتینی دِ تَش دِ شُو، دِ نِهاشُو حَرکت میکِرد. بییِن خدا دِ سِتین اُر ئو تَش واشُو بی ئو هَمیشَه اونُونِه دِ ای سَفر رَمونی میکِرد. تَنیا کاری کِه اونُو بایس اَنجُوم میدَن، یَه بی کِه دِ دُم او رُوئَن.
دِما مُدَت کَمی فِرعون ئو قومِش، دِ کار خُشُو پَشیمُو بین ئو اُفتان دِ دُم اسرائیلییا، تا دُوارَه اونُونِه وِ بردِهای خُشُو دِرارَن. خدا نَظر اونُونِه عَوَض کِردی تا نِشُو بِئَه کِه تَنیا او خدای حقیقییَه، ئو مَردِم بَفَمَن کِه یَهُوَه، قویتِر دِ فِرعون ئو خدایا مصرَه.
وَختی اسرائیلییا قُشون مصرِه دییِن، فَمِسِن کِه دِ بِئن دریای سُر ئو قُشون فِرعون اُفتانَه دِ دُوم. اونُو خیلی تَرسِسِن ئو هِنا کِردِن: «سیچی دِ مصر کِردیم وِ دَر؟» «هَمَه اِیما وِ زیئی میمیرِیم!»
موسی وِ اسرائیلییا گُت: «زَلَهتُو نَرُوئَه! خدا ایمرو سی شِما میجنگَه ئو نِجات پیا میکیت. اوسِه خدا وِ موسی فرمایش کِرد: «وِ قوم اسرائیل بُو کِه حرکت بَکَن وا لا دریای سُر.»
اوسِه خدا سِتین اُرِه حرکت دَ ئو وَنِه نیا دِ بِئن بنی اسرائیل ئو قشونِ فِرعون، تا سَروازیا مصری دَ نَتُونَن اونُونِه بِئینَن.
خدا وِ موسی فِرمُون دَ کِه دَس خُشِه وِ بالا دریا بُلِن بَکَه. اوسِه خدا بادی فِرسَن کِه آو دریانِه وِ چپ ئو راس بُرد، وِ طُوری کِه رَهی دِ دریا واز بی.
اوسِه قومِ اسرائیل دِ حالِی کِه دِ هَر دو لاشُو دیواری دِ آو بی، دِ مین دریا وِ رَه خُشُو اِدامَه دَن.
دِما وَ، خدا سِتین اُرِه زَه وا لا تا مصرییا بَتُونَن جیستِن اسرائیلییانِه بِئینَن. اوسِه مصرییا قصد کِردِن کِه وِ دُم اونُو رُوئَن.
وِ ای خاطِر اونُو وِ دُم اسرائیلییا رَتِن دِ مین دریا، اَما خدا مصرییانِه وَن دِ هُول ئو کاری کِرد کِه گارییاشُو گیر بَکَه دِ خَرَه. اونُو قارِنن: « بَجیئِیت! سییَهکِه خدا سی اسرائیلییا میجنگَه.»
دِما وَ کِه قوم اسرائیل وِ سلامت وِ اولانِه دریا رَسِس، خدا وِ موسی فرمایش کِرد: «یِه گِل هَنی دَس خُتِه وا لا دریا دراز بَکُو.» زِمُونی کِه او ای کارِه کِرد، آو ریخت وِ سَر مصرییا ئو گارییاشُو ئو هَمَهشُو دِ دریا غَرق بییِن.
وَختِی اسرائیلییا نابودی کامل قشون مصرِه دییِن، وِ خدا اِطمینُو کِردِن ئو وِ ای باور رَسِسِن کِه موسی، پِیُمبَری دِ لا خدائَه.
قوم اسرائیل خیلی هوس کردن؛ سییَهکِه خدا اونُونِه دِ بردهایی ئو مرگ نِجات دِئی. اِیسِه اونُو آزاد بییِن کِه خدانِه بَپِرَسَن ئو دِ او فِرمُونبَری بَکَن. اسرائیلییا سِرویا زیادی سی آزادی خُشُو گُتِن ئو خدانِه ستایش کِردِن، کِه اونُونِه دِ دَس قشونِ مصر نِجات دِئی.
اوسِه خدا وِ قوم فِرمُون دَ، کِه هَر سال ای اتفاقِه جَشن بیرَن ئو وِ ویر بیارَن کِه خدا چِطُوری مصرییانِه شِکَس دا ئو قوم اسرائیلِه دِ بردهایی آزاد کِردَه. نُوم ای جشن نِرِس وِ پسَخ. اونُو هَر سال وا کواو کردن بِرَه قربانی وا نُونِ فَطیر، وَنِه جَشن میگِرِتِن.
مَتَلِی گِرِتِسَه دِ کِتآو مقدس: (کِتآو خروج فصل ۱۲ آیه ۳۳ تا فصل ۱۵ آیه ۲۱)
رایگان برای استفاده، اقتباس و اشتراکگذاری تحت مجوز باز (CC BY-SA 4.0).