۱۷. عَد خدا وا داود

شائول اَوَلی پادشاه اسرائیل بی. هِه اُو طور کِه مَردِم می‌حاستِن، بُلن قد ئو خوش قیافَه بی. او دِ اَوَل‎یا حکومت خُش، پادشاه خوئی بی اَما یَواش یَواش بی وِ پیا شَرآشوئی کِه دِ خدا فِرمُونبَری نمی‌کِرد. وِ ای خاطِر خدا پیائی هَنی وِ جا او سی پادشاهی پَسن کرد.

خدا یِه جِوُو اسرائیلی وِ نُوم داود پَسن کرد تا اونِه سی جانشینی شائول پادشاه آمادَه بَکَه. داود، چوپُونی دِ مَردِم بیت لحم بی. او دِ حالی کِه سرگرم نگه‌بُونی دِ دُنیایا بُوئَش بی، گَلَنِه دو دَفَه دِ یورِش خرس ئو شیر نجات دَ ئو وِنُونِه کُشت. داود پیا اُفتادَه ئوعادلی بی. او وِ خدا اِطمینُو داشت ئو دِ او فِرمُونبَری می‌کِرد.

زِمُونی کِه داود هَنی پیا جِوُونی بی وا جلیات هیکلی که سِه متر قد داشت ئو چیرَه‌دَس ئو قوی بی، جَنگِس. اَما خدا وِ داود کمک کِرد تا جُلیاتِه بَکُشَه ئو اسرائیلِه نجات بِئَه. دِما وَ داود چَن دَفَه وِ دشمن‎یا اسرائیل بُرد. او بی وِ سَرواز زِبَردَسی ئو دِ خیلی دِ جَنگ‎یا قوم اسرائیلِه رَبَری کِرد. هَمَه مَردِم خیلی دِ او تَریف می‌کِردِن.

محبت مَردِم نسبت وِ داود باعث حَسیدی شائول بی. آخِر شائول قَصد کِرد کِه داودِ بَکُشَه، اَما او جیست وِ بیابُو ئو خُشِه قایِم کِرد. یِه روز وَختی کِه شائول ئو سَروازیاش وِ دُم داود می‌گَشتِن، شائول نُوهَلمُونَه اوما دِ غاری کِه داود دِش قایِم بیئی. شائول داودِه نِئی. داود خیلی وِ شائول نِزیک بی ئو تیکِه دِ جُومَه شائولِه بُرّی. وَختی شائول دِ غار کِرد وِ دَر داود قارِنا ئو تیکَه جُومَه شائولِه وِش نِشُو دَ. وِ ای طور وِ شائول ثابت بی کِه داود نِمی‎حا وا کُشتِن او وِ پادشاهی بَرَسَه.

آخِر، شائول دِ جنگی کُشتَه بی ئو داود وِ پادشاهی اسرائیل رَسِس. او پادشاه خوئی بی ئو مَردِم دوسِش داشتِن. خدا وِ داود برکت دَ ئو اونِه دِ هَمَه کاریاش موفق کِرد. داود دِ جَنگ‎یا زیادی بیی ئو وا کمک خدا دشمن‎یا اسرائیلِه شِکَس دَ. داود اورشلیمِ گِرِت ئو کِردِش وِ پایتختِ خُش. داود هِه دِ اوچِه زِنِئی کِرد ئو دِ اوچِه خاک بی. او وِ مدتِ ۴۰ سال پادشاه بی ئو دِ ای مدت، اسرائیل قوی ئو دُولَمَن بی.

داود می‌حاست معبدی بَسازَه کِه هَمَه قومِ اسرائیل بَتُونَن دِش خدانِه بَپِرَستَن ئو سیش قربانی بَکَن. سی حدود ۴۰۰ سال، مَردِم دِ جائی عبادت ئو قربانی می‌کِردِن کِه نُومِش دآوار ملاقات بی ئو موسی وَنِه ساختَه بی.

اَما خدا پِیُمبَری وِ نُوم ناتان فِرسَن وا لا داود ئو وِش گُت: «سی‌یَه‌کِه تو دِ جَنگ‎یا زیادی بیئی‎یَه، معبدِه سی مِ نِمی‎سازی بلکه کُرِت وَنِه می‎سازَه. وا ای وجود مِ تونِه خیلی برکت مِئِم. کَسی دِ پُشت تو تا وِ ابد وِ قومِ مِ پادشاهی می‌کَه.» تَنیا کَسی دِ پُشت داود کِه می‌تُونِس تا ابد سلطنت بَکَه مسیح بی. مسیح اُو برگزیدَه خدا بی کِه جهانِه دِ گناه‎یاشُو نجات می‎دَ.»

وَختی داود ای کَلُومِه شِنَفت، خدانِه شکر ئو ستایش کِرد. خدا هَم اونِه سَربُلِن کِرد ئو برکت زیادی بَخشَن. البته داود دِ زِمُونِ اتفاق اُفتایِن وَعدَه‌یا خدا خَوَر ناشت. اَما ایسِه دُونیم کِه قوم اسرائیل بایس، دِ زِمُون داود، حدود هزار سال سی اُمایِن مسیح چَش وِ رَه بان.

داود سال‎یا زیادی وا عدالت حکومت کِرد. او مطیع خدا بی ئو خدا هَم اونِه برکت می‎دَ. وا ای حال دِ آخِریا عمر دچار گناه گَپی دِ بِراوَر خدا بی.

یِه روز، وَختی تَموم سَروازیا داود سی جنگ وِ دَر بی‎یِن، او دِ پُشت بُون کاخ خُش سِیلی دِ دَر کِرد ئو زینَه قِشَنگی دیی کِه مُوفتا دِ آو. او اُو زینَن نِمی‌شِنَخت اَما فَمِس کِه نُومِش بَتشِبَع اَ.

وِ جا یَه کِه دِ وَسوَسَه دیری بَکَه، داود کَسی‎نِه فِرسَن تا اُو زِینَه‌نِه بیارَه وِ تِش. او وا اُو زینَه حوفتی ئو اوسِه فِرسَنِش وِ حُونَه‌ش. دِما مدت کَمی بَتشِبَع پیغومی سی داود فِرسَن ئو گُت کِه آووِس بی‎یَه.

میرَه بَتشِبَع کِه اوریا نُومِش بی، یَکی دِ بهترین سَروازیا داود بی. اوریا دِ اُو مُوقَه دیر دِ حُونَه ئو دِ جنگ بی. داود اونِه حاست ئو وِش گُت کِه رُوئَه وِ حُونَه ئو وِ تِه زینَش با. اَما اوریا قبول نَکِرد دِ حالی کِه بَقیَه سَروازیا دِ مِیدُون جنگ بی‎یِن، وِرگَردَه وِ حُونَه. وِ ای خاطِر داود، دُوارَه اوریانِه فِرسَن وِ مِیدُون جنگ ئو دِ فَرمُوندَیا حاست تا اونِه دِ جنگ وا نِها هَمه بَنَن تا کُشتَه با. ئو چِنی بی کِه اوریا دِ جَنگ کُشتَه بی.

دِما کُشِسِن اوریا، داود وا بَتشِبَع دُوئَت کِرد ئو او سی داود کُرِی اُوِرد وِ دیی. خدا دِ کاری کِه داود کِردی عَصَبُونی بی، وِ ای خاطِر ناتان نبی‌نِه فِرسَن تا گنی گناه داودِه وِش بوئه .داود وِ گناه خُش اِتِراف کِرد ئو خدا اونِه بَخشَن. داود دِ بَقیَه سالیا زِنِئی خُش، حتی دِ سخت ترین مُوقَه‌یا، دِ دم خدا بی ئو اونه فِرمُونبَری ‌کِرد.

وِ خاطِر مجازات گناه، کُر داود مُرد. ئو خیلی دِ آیِم‎یا طایِفَش، دِ بِراوَر او نافرمونی کِردِن ئو قدرتِش خیلی کَم بی. اَما وا حال نافرمونی داود، خدا هَنی هَم وِ عَدی کِه واش بَستی وفادار بی ئو وَنِه انجُوم دَ. بَدیا داود ئو بَتشِبَع بی‎یِن وِ صاو کُرِی کِه نُومِش نیان وِ سلیمان.