۱۸. بَر بی‎یِن پادشاهی اسرائیل

داود پادشاه ۴۰ سال سلطنت کِرد. دِما مُردِنِش، کُرِش سلیمان وِ پادشاهی قوم اسرائیل رَسِس. خدا وا سلیمان صُبَت کِرد ئو دِ او پُرسی: «دِ مِ چی میحای تا وِت بِئِم؟.» سلیمان دِ خدا حاست تا وِش حکمت بِئَه، حاستِ سلیمان بائث شادی خدا بی ئو اونِه وِ دُناترین پیا ریی زِمی کِرد. سلیمان چیا زیادی یاد گِرِت ئو پادشاه خیلی دُنائی بی. ئو خدا سلیمانِ خیلی دُولَمَن کِرد.

سلیمان دِ شهر اورشلیم معبدی دُرِس کِرد کِه داود وَنِه برنامَه‌ریزی ئو مَصالَح‎شِه جَم کِردی. دِ اُو زِمُون، مَردِم می‌تُونِسِن وِ جا دآوار ملاقات، دِ اوچِه خدانِه عبادت بَکَن ئو قربانی پیش‎کَش بَکَن. خدا دِ معبد حاضر بی ئو وا قوم خُش زِنِئی می‌کِرد.

اَما سلیمان وِ زَن‎یائی دِ قوم‌یائی هَنی دل بَست ئو اونُونِه حاست. او حدوداً وا ۱۰۰۰ زینَه دُوئَت کِرد ئو وِ چِنی دِ خدا نافِرمُونی کِرد. بُر زیادی دِ اُو زَن‎یا، دِ وِلات‎یا غریوه اُمایَه بی‎یِن ئو سی پرستش وا خُشُو بُت‎یائی داشتِن. وَختی کِه سلیمان وِ سنِ پیری رَسِس، او هَم بُت‎یا زَن‎یا خُشِه می‌پَرَستی.

هِه وِ ای خاطِر خداوند دِ سلیمان عَصَبُونی بی ئو وِ او گُت کِه سی تَقاص ای نافِرمُونی، پادشاهی اسرائیلِن دِما مُردِنِش می‎کَه وِ دو بَر.

دِما مُردِنِ سلیمان، کُرِش رِحُبعام وِ جا او بی وِ پادشاه. هَمَه قوم اسرائیل جَم بی‎یِن تا اونِه وِ عنوان پادشاه خُشُو قبول بَکَن. اونُو وِ رِحُبعام شِکائَت، کِردِن کِه سلیمان زیاد دِ اونُو کار می‌کَشی ئو مجبور بی‎یِن خراج زیادی بِئَن. اونُو دِ رِحُبعام حاستِن کِه چی بُوئَش سختگیر نوئَه.

اَما رِحُبعام جِوُو خُومی وِ اونُو دَ ئو گُت: «شِما فکر میکیت کِه بُوئَم سلیمان سختگیری می‌کِرد، اَما مِ شِمانِه بیشتِر وادار وِ کار می‌کِم ئو عَذآووِتُو مِئِم.»

دِما شِنَفتِن حرف‎یا او، خیلی دِ مَردِم وِ ضِدِش شورش کِردِن. دَه طایفه دِ طایفَه‌یا اسرائیل دِ او جِگا بی‎یِن. هِه دو طایفَه وِ او وفادار مَنِن ئو اونُو نُوم خُشُو نیان وِ پادشاهی یهودا.

ده طایفه هَنی پیائی وِ نُومِ یِرُبعامِ کِردِن وِ پادشاه خُشُو کِه دِ جایا شمالی اُو وِلات ساکن بین ئو وِ خُشُو پادشاهی اسرائیل ‌گُتِن.

یِرُبعام فرمونبرِ خدا نِوی ئو بائث بی مَردِم رُوئَن وا لا گناه. او دو تا بُت دُرِس کِرد ئو دِ مَردِمِ حاست کِه وِنُون بَپِرستن. اونُو دَ سی پرستش وِ اورشلیم کِه دِ پادشاهی یهودا بی، نِمی‌رَتِن.

پادشاهی یهودا ئو پادشاهی اسرائیل دشمن یَکتِری بی‎یِن ئو بیشتِر وختیا وا یَکتِری دِ حالِ جَنگ بی‎یِن.

دِ پادشاهی جدید اسرائیل، هَمَه پادشایا شَرآشو بی‎یِن. بیشتِر اونُو وِ وِ دَس کَسُونی کِه می‌حاستِن وِ صِحاو پادشاهی بوئَن، کُشتَه ‌بی‎یِن.

هَمَه اُو پادشایا ئو بیشتِر مَردِم اسرائیل وِ عبادت بُت‎یا سَرگَرم بی‎یِن. دِ مُوقَه پرستش بُت‎یا، وا زَن‎یا فاشَه مُحُوفتی‎یِن ئو حتی بَچُونِه سی بُت‌یا قربانی می‌کِردِن.

پادشایا یهودا دِ نسل(پشت) داود بی‎یِن. قَری دِ ای پادشایا آیِم‎یا خوئی بی‎یِن، وا عدالت حکومت می‌کِردِن ئو خدانِه می‌پرستین. اَما بیشتِر پادشایا یهودا، شَرآشو بی‎یِن. بَضی دِ اونُو حتی بَچَه‌یا خُشُون سی بُت‎یا قربانی می‌کِردِن. بیشتِر مَردِم یهودا هَم وِ ضد خدا وِریسان ئو خدایائی هَنی پرستش کِردِن.