۳۰. عیسی مسیح وِ پنج هزار نَفَر غذا مِئَه
عیسی رسولیانِه سی بشارت ئو یاد دَئِن فِرسَن وِ آبادییا زیادی. دِما وِرگَشتِن، اونُو عیسینِه دِ کاریائی کِه کِردَه بییِن با خَوَر کِردِن. اوسِه عیسی اونُونِه وِ جا چولی دِ نِزیکی دریاچه بُرد تا کَمی شَکَتی شو دِرا. اوسِه هَمَه سُوار قایقی بین ئو رَتِن وِ اولانِه رو.
سییَهکِه مَردِم دییِن کِه عیسی ئو شاگردیا سُوار قایق بینَه دِ اوچِه میرَن، دِ رُونَه دریا شُرو کِردِن وِ دُووِسِن تا وِرَز اونُو بَرَسَن وِ اولا دریا. وِ ای خاطِر وَختی عیسی ئو شاگِردیاش رَسِسِن وِ اوچِه، بُر گَپی دِ مَردِم چَش وِ رَهشُو بین ئو رَتِن وا نِهاشُو.
تعداد اونُو بِجُز زَنیا ئو بَچَهیا، نِزیک پنج هزار پیا بی. عیسی مسیح دِلِش خیلی وِ حالِشُو سُخت، سییَهکِه چی دُنیا بی چوپُو بییِن. اوسه شُرو کِرد وِ یاد دَئِن اونُو ئو کَسُونی کِه بیمار بین، شفا دَ.
ایوارَه، شاگردیا اُمان وا لا عیسی ئو گُتِن: «اِ استاد! مَردِمِ بَفرِس تا سی خُشُو غذا جور بَکَن؛ سییَهکِه دِ ای جا پِرت، چیئی سی حَردِن پیا نِمووَه.»
اَما عیسی وِ شاگردیا گُت: «شِما خُتُو وِشُو غذا بِئیت.» اونُو جِوُو دَن: «چطور میتُونیم ای بُر دِ مَردِمِ سیر بَکیم؟! اِیما هِه پنج نُون ئو دو ماهی کُچِک داریم ئو بَس.»
عیسی وِ شاگِردیاش فرمایش کِرد تا وِ مَردِم بُوئَن، کِه دِ دَسَه یا پَنجا نفری وِ ریی سُوزی یا بَشینَن.
اوسِه عیسی پنج نُون ئو دو ماهینِه گِرِت دِ مین دَس سِیل آسِمُو کِرد ئو خدانِه سی غذا شُکر کِرد ئو وَنِه برکت دَ.
اوسِه عیسی نُونیا ئو ماهییانِه کُت کُت کِرد ئو دَ وِ شاگِردیاش تا دِ بِئن مَردِم بَر بَکَن. شاگردیا وِ مَردِم غذا میدَن. هَمَه حَردِن ئو سیر بییِن، اَما چیئی دِ اُو غذایا کَم نِمِوی.
اوسِه شاگردیا پس مَنَه غذانِه جَم کِردِن، وِ ای طوری دِ بقیَه اُو پنج نُون ئو دو ماهی، دُوزَه سَلَه پُر بی.
مَتَلِی گِرِتِسَه دِ کِتآو مقدس: (کِتآو انجیل متی باب ۱۴ آیهیا ۱۳ تا ۲۱ ، کِتآو انجیل مرقس باب ۶ آیهیا ۳۱ تا ۴۴، کِتآو انجیل لوقا فصل ۹ آیهیا ۱۰ تا ۱۷، کِتآو انجیل یوحنا باب ۶ آیهیا ۵ تا ۱۵)
رایگان برای استفاده، اقتباس و اشتراکگذاری تحت مجوز باز (CC BY-SA 4.0).