۳۱. عیسی وِ ریی آو رَه میرَه
دِما وَ کِه عیسی وِ جَمیَت غذا دَ وِ شاگردیاش فرمایش کِرد کِه سُوآر قایق بووَن، رُوئَن وِ اولانِه دریاچه، اَما او سی گِری دِ اوچِه مَن. اوسِه شاگردیا اُفتان وِ رَه ئو عیسی دِما وَ کِه مَردِمِ کِل کِرد، رَت بالا کوهی تا دُعا بَکَه. او دِ اوچِه تَنیا بی ئو تا نِصمِه شُو دُعا میکِرد.
دِ ای بِئن، شاگردیا دِ مین قایق سرگرم پارو زَئِن بییِن، اَما بادِ چپ میاُما ئو تا نیمَه شُو تَنیا تا مینجا دریاچَهن رَتین.
اوسِه عیسی دُعا خُشِه تَمُوم کِرد ئو رَت وا لا شاگردیا. او وا لا قایق اونُو وِ ریی آو رَه رَت.
وَختی شاگردیا عیسینِه دییِن، خیلی تَرسِسِن، سییَهکِه فکر کِردِن روحی هیسا. عیسی دُونِس کِه اونُو زَلَهشُو رَتَه، اوسِه وِشُو فرمایش کِرد: «زَلَهتُو نَرُوئَه من هستم !»
اوسِه پترس وِ عیسی گُت: «سرورِم، اَر تونی، امر بَکُو تا ریی آو وِ تِه تو بیام.» عیسی وِ پترس فرمایش کِرد: «بیا!»
اوسه پترس دِ قایق اُما وِ دَر ئو وِ ریی آو وا لا عیسی رَت. اَما دِما رَتِن رَه کَمِی، او ریی خُشِه دِ عیسی وِرگَردَن ئو پی وِ موجیا بُلن ئو زورِ زیادِ باد بُرد.
اوسِه پترس، هول گِرِتش ئو دِ حالی کِه وِ زیر آو میرَت ، داد زَه: «سرورِم نجاتِم بِه!» عیسی دَر جا دَس خُشِه دراز کِرد ئو اونِه کَشی وِ دَر. اوسِه عیسی وِ پترس فرمایش کِرد: «اِ کَم ایمان، سیچی وِ مِ اعتماد نَکِردی تا دِ اَمُو بَمُونی؟»
وَختی پترس ئو عیسی سُوآر قایق بییِن، باد یِه دَفَه دِ حرکت هِسا ئو آو آرُوم گِرِت. شاگردیا کِه خیلی وا رَتین، عیسینِه پرستش کِردِن، وِ او گُتِن: «دِ راسی کِه تو پسرِ خدا هیسی.»
مَتَلِی گِرِتِسَه دِ کِتآو مقدس: (انجیل متی فصل ۱۴ آیهیا ۲۲ تا ۳۳؛ انجیل مرقس فصل ۶ آیهیا ۴۵ تا ۵۲؛ انجیل یوحنا فصل ۶ آیهیا ۱۶)
رایگان برای استفاده، اقتباس و اشتراکگذاری تحت مجوز باز (CC BY-SA 4.0).