۳۳. مَتَل کشاورز
یِه رو عیسی دِ رُونَه دریاچه دِ حالِ یاد دیین وِ بُر گَپی دِ مَردِم بی. شمار اونُو اُقَه زیاد بی کِه عیسی جا وِ اندازه سی صُبَت وا اونُو ناشت. وِ ای خاطِر سُوآر قایقی بی کِه دِ رُونَه آو بی ئو دِ اوچِه شُرو وِ یاد دیین مَردِم کِرد.
عیسی ای مَتَلِه سی مَردِم تَریف کِرد: «کشاورزی سی تُم وَنِن رَت وِ دَر. دِ حالی کِه تُومیانِه وِ هَر لائی میپاشَن، قَری دِشُو اُفتان دِ مین رَه ئو بالِنَهیا اُمان ئو هَمَهشُونِه حَردِن.»
قَری وِ ریی بَردکو اُفتان کِه رییشِه کَمی خاک پوشِنائی. تُمیا ریی اُو خاک کَم عمق، خیلی زیی سُوز بییِن. اَما ریشهیاشُو نِمیتُونِسِن تا زیر خاک رُوئه. وِ ای خاطِر وَختی اَفتاو داغ نیا وِشُو، هَمَه سُختِن ئو دِ بِئن رَتِن.
«قَری دِ تُمیا هَم دِ مین خاریا اُفتان. خاریا ئو تُمیا وا یَک سُز کِردِن ئو قاویا تازَهِ گیاه زیرِ زورِ خاریا دِ بِئن رَتِن ئو هیچ ثَمَری وِ بار نیاُوِردِن.»
«قَرِی دِ تُمیا اُفتان وِ ریی خاک خو، ئو دِ هَر تُم، سی، شص ئو حتی صد براوَر ثمر اُوِرد. هَر کَس کِه میحا دِ خدا فرمون بری بَکَه وِ حرفیا مِ گوش بَکَه.»
شاگردیا دِ شِنَفتِن ای مَتَل گیج بییِن. اوسِه عیسی سیشو چِنی واز کرد: «تُم، کِلومِ خدائَه. رَه، آیِمییَه کِه کِلومِ خدانِه میشنَوَه اَما وَنِه نمیفهمه ئو شیطان کِلومِه دِ او وِرمیراقنَه. دِ راسی شیطان نِمیلَه او کِلومِ خدانِه بفهمه»
«زِمی بَردکو، آیِمییَه کِه تا پیغومِ خدانِه میشنَوَه، وَنِه وا هَوَس قبول میکَه، اَما دِ مُوقَه سختییا یا وَختی مَردِم عذاوش میَن، دِ خدا ریی وِرمیگَردِنَه. دِ کلومی هَنی او دِ اعتماد وِ خدا دَس وِرمیارَه.»
«زِمینی کِه دِ خاریا پوشِسَه، آیِمییَه کِه پیغومِه میشنَوَه اَما نگرانییا زِنِئی ئو دل بستگی او وِ پیل ئو وِ دَس اُوِردِن چیا زیاد، دِما مدت کَمی اونِه دِ عشق وِ خدا وِرمیگَردِنَه. دَ نِمیتُونَه خدانِه دِ ریی اُو چییائی کِه دِ کلوم خدا یاد گِرتی راضی بَکَه. او چی گلیا گَنِمییَه کِه ثمری نِمیه.»
«اَما زِمی خو، آیِمییَه کِه پیغوم خدانِه میشنَوَه، باوَرِش میکَه ئو ثَمَر میارَه.»
مَتَلِی گِرِتِسَه دِ کِتآو مقدس: (انجیل متی فصل ۱۳ آیهیا ۱ تا ۸؛ فصل ۱۳ آیهیا ۱۸ تا ۲۳؛ انجیل مرقس فصل ۴ آیهیا ۱ تا ۸؛ فصل ۴: آیهیا ۱۳ تا ۲۰؛ انجیل لوقا فصل ۸ آیهیا ۴ تا ۱۵)
رایگان برای استفاده، اقتباس و اشتراکگذاری تحت مجوز باز (CC BY-SA 4.0).