۳۸. خیانت وِ عیسی

یهودی‎یا هَر سال، عِد پِسَخِه جشن می‌گِرِتِن. ای جشن، وِ خاطِر وِنَه بی کِه چِطور خدا صدها سال پیش، بُوئَه‌یا اونُون دِ بَنِه‎اِیی مصر نجات دِئی. نِزیک سه سال دِما وَ کِه عیسی شُرو وِ مُوعِظَه ئو تعلیم هَمَه مَردِم کِرد، وِ شاگِردیاش گُت کِه میحا عِد پِسَخِه وا اونُو دِ اورشلیم جشن بیرَه، ئو او گُت کِه دِ اوچِه کُشتَه مووَه.

یهودا یَکِی دِ شاگردیا عیسی ئو خَزُونَه‎دار دَسَه شاگردیا بی. بیشتِر موقَه‎یا هَم دِ اُو پیل مُوزی. دِما وَ کِه عیسی ئو شاگِردیاش رَسِسِن وِ اورشلیم، یهودا رَت وِ تِه کاهن‎یا گَپ یهود ئو پیشنهاد لُو دَئِن عیسی‎نِه دِ جا گِرِتِن پیل وِشُو دَ. او دُونِس کِه رَبَریا یهودی، مسیح بی‎یِن عیسی‎نِه باوَر نارَن ئو خواهان کشتِن او بین.

سران مذهبی یهود وِ رَبَری کاهن گَپ، سی خیانت یهودا ئو تحویل دَئِن عیسی و اونُو، سی سِکَه نُقرَه وِش دَن. دُورس هِه اُو طور کِه پِیُمبَریا پیش‎گویی کِردین. یهودا قبول کِرد ئو پیلِه گِرِت ئو اُفتا وِ رَه. دِ اُو مُوقَه او وِ دُم فرصتی بی تا عیسی‎نِه وِ اونُو تسلیم بَکَه.

عیسی دِ اورشلیم، عِد پِسَخِه وا شاگِردیاش جشن گِرِت. مُوقَه حَردِن شُوم پِسَخ، عیسی نُونِ گِرِت تیکَه تیکَش کِرد ئو گُت: «بی‎ریت ئو بُحُوریت، یِنَه بدنِ مِنَ کِه سی شِما فدا مووَه. یَنِ وِ ویر مِ وِ جا بیاریت.» وِ ای طوری، عیسی گُت کِه وِ خاطِر اونُو جُو مِئَه ئو بَدَنِش سی اونُو قربانی مووَه.

اوسِه عیسی جُوم شِرآوِی گِرِت ئو وِ اونُو گُت: «یِنَ خینِ مِ دِ عَد جدیدَه کِه سی آمرزش گناه‌یا شِما میریزی‎ئَه، دِش بُحُوریت. ای کارِه دِ آیندَه وِ ویر مِ اَنجُوم بِئیت.»

اوسِه عیسی وِ شاگردیا گُت: «یَکی دِ شِما وِ مِ خیانت می‌کَه.» شاگردیا وا رَتِن ئو پُرسین کِه چِه کَسی دَس وِ چنی کاری می‎زِنَه. عیسی گُت: «وِنَه کِه ای گُپ‎نُونِه دِ مِ می‎رَه، خیانتکارَه.» اوسِه نُونِه دَ وِ یهودا.

دِما وَ کِه یهودا نُونِه وِرداشت، شیطان رَت دِ مینش. او رَت وِ تِه گپون یهود تا سی دَسگیری عیسی وِشُو کمک بَکَه. یِنُو هَمَه دِ شُو اتفاق اُفتا.

دِما حَردِن غذا، عیسی ئو شاگِردیاش رَتِن وا لا کُوه زیتون. عیسی گُت: «اِمشُو شِما هَمَه مِنِ تَنیا مِیلیت. سی‌یَه‌کِه نوشتَه بی‎یَه، «چوپُونِه می‌زِنِم ئو هَمَه میشُو پَخش مووَن.»

پترس گُت: «حتی اَر هَمَه تونِه بِیلَن ئو رُوئَن، مِ ای کارِه نمی‌کِم.» عیسی وِش گُت: «شیطان میحا هَمَه شِمانِه مالِ خُش بَکَه، اَما مِ سی تو دُعا کِردِم تا ایمانِت دِ بِئن نَرُوئَه. وا ای حال، اِمشُو، وِرَز بُونگ کِلَشیر، تو سِه گِل حاشا میکی کِه مِنِه می‌شناسی.»

پترس وِ عیسی گُت: «حتی اَر بَمیرِم، تونِه حاشا نمی‌کِم» بقیه شاگردیا هَم چِنی گُتِن.

اوسِه عیسی وا شاگِردیاش رَتِن وِ باغ جتسیمانی. عیسی وِ اونُو گُت دُعا بَکَن تا شیطان نَتُونَه وَسوَسَه‎شُو بَکَه. اوسِه عیسی اونُون هیشت ئو رَت وِ خلوَت تا دُعا بَکَه.

عیسی سِه گِل ای طوری دُعا کِرد: «اِ بُوئَه مِ، اَر مووَه، بییل کِه دِ ای جُومِ رنج نُحُورم. اَما اَر رَهی هَنی سی آمرزش گناه‌یا آیِم‎یا نیسا، پس ارادَه تو اَنجُوم با.» عیسی چِنُو هُول گِرِتِشی کِه عرقِش چی تُکَه‎یا خین بی. خدا فرشتِه فِرسَن تا اونِه قوی بَکَه.

دِما هَر گِل دُعا، عیسی وِرمی‎گَشت وا لا شاگِردیاش، اَما اونُون دِ خآو مِئیی. دَفَه سِئم کِه وِرگَشت، گُت: «وِریسیت، اُو شاگرد خیانتکار ها ایچِه.»

یهودا وارْد رَبَریا یهود، سَروازیا ئو بُری آیم اُما. اونُو وا خُشُو شِمشیر ئو گُرز داشتِن. یهودا اُما وا لا عیسی ئو گُت: «سِلام اِ استاد» ئو اونِه ماچ کِرد. یَه نِشُونِه بی تا عیسی‎نِه وِ گپون یهود، سی دَسگیری بَشناسِنَه. عیسی وِ او گُت: «یهودا، وا ماچی وِ مِ خیانت میکی؟»

زِمُونی کِه سَروازیا، عیسی‎نِه دَسگیرِ کِردِن، پترس شِمشیر خُشِ کَشی ئو گوشِ خدمتکار کاهن گَپِه بُرّی. عیسی وِش گُت: «شِمشیرِت غلاف کُو. مِ می‌تُونِم دِ بُوئَم بِحام کِه قشونی دِ فرشتَه‎یا بفِرسَه وِ کُمَکِم. اَما بایس دِ بُوئَم فِرمُونبَری بَکِم.» اوسِه عیسی گوش اُو پیانِه شفا دَ ئو هَمَه شاگردیا جیستِن.