۳۹. محاکِمَه عیسی

دِ نِصمِه شُو، سَروازیا عیسی‎نِه بُردِن وِ حُونَه کاهن گَپ تا دِش بازجویی بَکَه. پترس هَم دِ دیر وِ دُم اونُو می‌اُما. وَختی عیسی‎نِه بُردِن وِ مین حُونَه، پترس هِسا وِ دَر حُونَه وا لا تَش تا خُشِ گَرم بَکَه.

دِ مین حُونَه، گپونِ یهود دِ عیسی بازجویی کِردِن. اونُو شاهدیا دِروزِنه زیادی اُوِردِن کِه تُمَت‎یا ناروا وِ عیسی می‎زَن. اَما، حرف‎یا اونُو وا یَک، یَکی نِوی، وِ ای خاطِر رَبَریا یهود نَتُونِسِن گناهی‎نِه وِ او ثابت بَکَن. عیسی هَم هیچ حَرفی وِ زِوُون نی‌اُوِرد.

آخِر، کاهنِ گَپ سِیل عیسی کِرد ئو گُت: «وِ اِیما بُو، آیا تو مسیح پسرِ خدای زِنَه هیسی؟»

عیسی گُت: «اَ هیسِم، ئو یِه روز مِنِه مِئی‎نیت کِه دِ دَس راسِ خدا نِشِسِمَه ئو دِ آسِمُو وِ زِمی وِرمی‎گَردِم.» کاهن گَپ، کِه دِ حرف‎یا عیسی عَصَبُونی بی‎ئی، جُومَه خُشِه دِرّی ئو وا قارَه وِ بَقیَه رَبَریا مذهبی گُت: «اِیما وِ شاهدیائی هَنی نیاز ناریم. هَمَه شِنَفتِن کِه او گُت مِ پسرِ خدائِم. چِی نظر مِئیت؟»

رَبَریا یهود هَمَه دِ جِوُو کاهن گَپ گُتِن: «او حقشَ بمیره» اوسِه چَشیا عیسی‎نِه بَستِن، آو دَم وَنِن دِ مین ریش، اونِه زَن ئو تیتالِش کِردِن.

پترس دِ دَر حُونَه هِسائی. کنیزی اونِه دیی ئو وِش گُت: «تو هَم وا عیسی بیئی» پترس حاشا کِرد. کَمِی بَد کنیزی هَنی هِه ای حرفِ وِش زَه ئو پترس هَنی حاشا کِرد. آخِر، کَسُونی کِه اوچِه هِسائین وِش گُتِن: «دُونیم کِه تو یَکی دِ شاگردیا عیسی‎ئی، سی‎یَه‎کِه تو هَم جلیلیی‎ئی.»

اوسِه پترس قسم حَرد ئو گُت: «خدا مِنِه لَنَت بَکَه اَر ای پیانِه بَشناسِم». هِه اُو مُوقَه کِلَه‎شیر بُونگ زَه ئو عیسی وِرگَشت ئو سِیل پترس کِرد.

پترس رَت ئو روآرو گِریوِس. هِه دِ اُو زِمُون، یهودای خیانتکارِ دیی کِه رَبَریا یهود عیسی‎نِه وِ مُردن مَکوم کِردِنَه. غم ئو غصه گِرِتِش، رَت ئو دَس وِ خودکشی زَه.

دِ ای روزیا پیلاتس فَرمُوندار رومی وِ یهودا حکومت می‎کِرد. سران یهود عیسی‎نِه بُردِن وِ تِه او. حواستَه اونُو یِنَه بی کِه پیلاتوس عیسی‎نِه وِ مُردِن مَکوم بَکَه. پیلاتوس دِ عیسی پُرسی: «آیا تو پادشاه یهودی؟»

عیسی جِوُو دَ: «دُرس گُتی. اَما پادشاهی مِ زِمینی نیسا. اَر چِنی بی، پیرویام سی مِ می‌جَنگِسِن. اَما مِ اُمامَه وِ ای دُنیا تا حقیقتِه دِبارَه خدا وِ هَمَه بُوئِم. هَر کَس کِه حقیقتِه دوس داشتَه با وِ مِ گوش مِئَه.» پیلاتوس پُرسی: «حقیقت چی‎نَه؟»

پیلاتوس دِما صُبَت وا عیسی رَت وِ دَر وا لا جمعیت ئو گُت: «مِ گناهی دِ ای کَس پیا نَکِردِم کِه حقش مُردن با.» اَما گپون یهود ئو جمعیت هَوار زَن: «مصلوبِش بَکُو.» پیلاتوس جِوُو دَ: «او گناهکار نیسا.» اَما اونُو ای دَفَه وا دَنگ بُلِنتِری هَوار زَن. اوسِه پیلاتوس سی دَفَه سِئم گُت: «او گناهکار نیسا.»

پیلاتوس دِ تَرس یِنَه کِه شورِش نووَه، قبول کِرد ئو عیسی‎نِه وِ سَروازیاش سِپارد تا مصلوبِش بَکَن. سَروازیا رومی عیسی‎نِه شلاق زَن ئو چوغا سلطنتی کِردِن دِ وَرِش ئو تاجی دِ خار نیان ریی سَرِش. اوسِه وِ تیتال می‎گُتِن: «زِنَه با پادشاه یهود».