۴۰. عیسی مصلوب بی

دِما وَ کِه سَروازیا عیسی‎نِه تیتال کِردِن، اونِه بُردِن وِ دَر تا مصلوبِش بَکَن. اونُو وادارِش کِردِن تا صلیب خُشِه بیرَه وا کول.

سَروازیا عیسی‎نِه بُردِن وِ جائی کِه وِش می‎گُتِن جُلجُتا (یعنی جُمجُمَه سر) ئو دَس ئو پاشِه وِ صلیب میخکو کِردِن. اَما عیسی گُت: «اِ بُوئَه! ای مَردِمِ بَوَخش، سی‌یَه‌کِه نُوئِنَن چِی می‌کَن.» وِ دستور پیلاتوس بالا سرِش نِوِشتِه نیان کِه وِ ریش نوشتَه بیئی: یِنا پادشاه یهود

اوسِه سَروازیا وِ جُومَه عیسی قُرَه وَنِن. وا ای کارِ اُو پیشگویی کِتآو مقدس اَنجُوم بی کِه مُوئَه: «جُومَه ‌یامِه مین خُشُو بَر کِردِن ئو وِ چوغا مِ قُرَه وَنِن.»

سروازیا هَمزِمُون دو دُوزِه هَم مصلوب کِردِن ئو عیسی‎نِه ریی صلیب نیان دِ مین اونُو. یَکِی دِشُو عیسی‎نِه مَسخِرَه می‌کِرد، اَما اُو یَکی وِ او گُت: « تو دِ خدا نمی‌تَرسی؟ اِیما گناهکاریم اَما ای پیا بی‎گناهَه.» اوسِه وِ عیسی گُت: «اِ عیسی! مِنِ دِ پادشاهی خُت وِ ویر بیار.» عیسی وِ او جِوُو دَ: «تو هِه اِیمروز وا مِ دِ بهشت هیسی.»

گپونِ مذهبی یهود ئو مَردِمی کِه اوچِه بی‎یِن عیسی‎نِه ریش خن ش می‌کِردِن ئو می‌گُتِن: «اَر تو پسرِ خدا هیسی دِ صلیب بیا وِ هار ئو خُتِه نجات بِه! اوسِه اِیما وِ تو ایمان میاریم.»

هَرچَن ظُر بی، اَما آسِمُو سرتاسر اُو وِلات تاریک بی. ای ظُلمات تا سِه ساعت هه بییش.

اوسِه عیسی هَوار زَه: «تَمُوم بی. اِ بُوئَه، روح خُومِه وِ دَس‌یا تو می‌سپارم ». اوسِه سر خُشِه وَن وِ هار ئو روحِ خُشِه تسلیم کِرد. وَختی کِه جُو دَ زِمی اُما وِ لَرزَه ئو پردَه گَپ معبد، کِه مَردِمِ دِ ته خدا جِگا می‌کِرد (قدس‎القداس)، دِ بالا تا هار بی وِ دو کُت.

عیسی وا مُردن خُش رَهی واز کِرد تا مَردِم بَتُونَن بیان وِ ته خدا. وَختی نِگَه‌بُون رومی ای اِتفاقِه دیی، گُت: «دِ راسی کِه ای پیا بی‎گناه بی. او پسرِ خدا بی.»

اوسِه دو نَفَر دِ گپونِ یهود، نیقودیموس ئو یوسف کِه ایمان داشتِن عیسی هِه اُو مسیحِ موعودَه، رَتِن وِ تِه پیلاتوس ئو حاستِن کِه لَش عیسی‎نِه تحویل بیرَن. اونُو لَشِه وا پَرو کَتُون پی‎چَنِن ئو دِ قُور بَردی‎ئی نیان ئو بَرد گَپی هَم پِل دَن دَم در قُور تا بَوَنی‎ئَه.