۴۳. شُرو بیین ِ کلیسا

دِما یَه کِه عیسی وِرگَشت وِ آسِمُو، شاگردیا چِنُو کِه عیسی فِرمُو دِئی، مَنِن دِ اورشلیم. ایمانداریا مرتب(گِر گِر) وا یَک جَم مِئی‌یِن تا دُعا بَکَن.

یهودی‎یا هَر سال روزِ مهمی‎نِه وِ نُومِ پنتیکاست جشن می‎گِرِتِن کِه پَنجائِمی روز دِما عِد پِسَخ بی. پنتیکاست جشن یهودی‎یا سی وِرداشتِن ثمر گَنِم بی. اونُو دِ سرتاسر دُنیا می‌اُمان وِ اورشلیم تا ای جشنِه وا یَک بیرن. دِ اُو سال، جشن پنتیکاست، حدود یِه هَفتَه دِما رَتِن عیسی وِ آسِمُو پیش اوما.

وَختی هَمَه ایمانداریا وِ دور یَک جَم بینی، یِه‌دَفَه صدائی چی دَنگ بادِ تُنی شِنَفتِن. اوسِه چی‎ئی چی‎ بِلیزَه تَش وِ سر هَمَه اونُو بِلیز بی. اوسِه هَمَه دِ روح‎القدس پُر بی‎یِن ئو خدانِه وِ زِوُن‎یائی کِه بِلَد نِوین پرستش کِردِن. روح‎القدس قُووت حَرف زَئِن وِ زِوُن‎یانِه وِشُو بَخشَنی.

وَختی مَردِمی کِه اُمانی وِ اورشلیم، ای دَنگِه شِنَفتِن، وِ دُور یَک جَم بی‎یِن تا بِئی‎نَن چِه پیش اُوماَ. اونُو شِنَفتِن کِه ایمانداریا کاریا گَپ خدانِه وازگو می‎کَن. اونُو دِ ای جریان وا رَتِن، سی‎یَه‎کِه می‎تُونِسِن حرف‎یا اونُونِه بَفَمَن. دِ کِشور اونُو مَردِم زِوُنی هَنی داشتِن. شاگردیا اسرائیلی بی‎یِن ئو می‎تُونِسِن هِه وِ زِوُن‎یا آرامی، عبرانی ئو یا یونانی حرف بَزِنَن. اَما اونُو شِنَفتِن کِه شاگردیا وِ زِوُن مادری اونُو کاریا خدانِه وازگو می‎کِردِن.

قَری هَم گُتِن کِه شاگردیا مَس بی‎نَه. اَما پترس هِسا ئو وِ اونُو گُت: «گوش بَکیت! ای مَردِم مَس نیسِن! بلکه یَه هِه ‌اُو پیشگویی یوئیلِ پیومبَرَه کِه خدا گُته بی: « دِ روزیا آخِر، مِ روحِ خُومِه وِ تُمومِه آیِم‎یا میریزِم.»

«اِ قوم اسرائیل، عیسی کَسی بی کِه کاریا بِلاجئِی اَنجُوم می‎دَ تا خُشِه وِ اِیما بَشناسِنَه. او وا قدرتِ خدا کاریا بِلاجئِی زیادی اَنجُوم دَ. شِما یَنِه دُونیت، سی‎یَه‎کِه شاهد کاریاش بیئیت، اَما اونِه وِ صلیب کَشی‎ئیت.»

«عیسی مُرد، اَما خدا اونِه دِ مین مُردیا بُلِن کِرد. یِنَه راس دِراُمایِن پیشگویی اُو پیومبری‎ئَه کِه گُت: تو نِمِیلی کِه بدنِ پسرِ مقدسِ تو دِ قُور فاسد بووَه. اِیما شاهد یِنَه هیسیم کِه خدا عیسی‎نِه دِ مین مُردیا بُلِن کِرد.»

خدای بُوئَه، ایسِه عیسی‎نِه وِ بُلِنترین جا آسِمُو یعنی وِ دَسِ راس خُش نِشَنَه. عیسی هِه اُو طور کِه وَعدَه دِئی روح‎القدسِ سی اِیما فِرسَن. ای کاریائی کِه اِیمروز مِئی‎نیت ئو می‎شنَویت روح‎القدس اَنجُوم مِئَه.

شِما عیسی‎نِه مصلوب کِردیت، اَما خاطرجَم بوئیت کِه خدا اونِه، خداوند ئو مسیح، پسن کِردَه.

مَردِم سخت تحت تاثیر حَرف‎یا پترس قِرار گِرِتِن. وِ ای خاطِر دِ او ئو بَقیَه شاگردیا پُرسین: «اِ بِراریا، ایسِه بایس چی بَکیم؟»

پترس جِوُو دَ: «هَمَه شِما وِ آمرزش از گناهان نیاز داریت. پَ توبَه بَکیت ئو دِ نُوم عیسی مسیح تعمید بیریت. اوسِه خدا پیش کشی روح‎القدسِ هَم وِ شِما می‌وَخشَه.»

حدوداً ۳۰۰۰ نفر وِ حرف‎یا پترس ایمان اُوِردِن ئو بی‎یِن وِ شاگرد عیسی. اونُو تعمید آو گِرِتِن ئو وِ جَم ایمانداریا دِ کلیسا اورشلیم یَکاگیر بین.

ایمانداریا هَمیشَه وِ یاد دِن‎یا رسول‎یا گوش می‌دَن. وا یَکتِری جَم مِوین، وا یَک نُو می‎حَردِن ئو دُعا می‎کِردِن. اونُو دِ جَم خدانِه پرستش می‎کِردِن ئو هَرچی داشتِن وا یَکتِری بَر می‌کِردِن. مَردِم دِبارَه اونُو وِ خویی حَرف می‌زَن ئو هَر رو شمار بیشتِری ایمان می‎اُوِردِن.